Salmos 95 - La'qaatqa ñi qota'olec Qota'olec & Qota'olec Novita Na Qomyipi

Ñitoonqatac, so'ueenaxanqatalec ñi qara'gaxala'

¹ Nahiquena, so'ueenaxanqatalec ñi qara'gaxala', ñitoonqatac; so'ueenaxanqatalec ñí'maq quepaqataxanteguelgoto qomi' chaqai qarca'laxaqui.

² Senoxonaxau'a, sachoqotaho da qana'aachic, chaqai so'ueenaq ca no'ueenec, semaqachinqatac.

³ Ma' ñi qara'gaxala' chaqaiñi ñi qota'olec lodegaxat, chalego lecaic lashi ná'ogue na nashiilqaipi nqolaquipi.

⁴ Ñi'maxare lo'qootañi ná'maq paguec qoỹoqochi'ña pa'ỹaañi quena 'laua; looỹaco nauá'maq paguec qoỹoqoshi'mque quemaralgoto qari.

⁵ Ana huaaxai lalamaxarete ma' chaqaiñi lo'ueenata; ¡ỹahota'ahi naua lqai'laqate' na' ỹo'uet na 'laua!

⁶ Ỹalahi, sa'daqaiñi naua qare'cootal; sa'daqoto naua qare'cootal ñi qara'gaxala', ma' ñi'maxare qomi' lo'ueenatqa.

⁷ Ñi'maxare qota'olec coqomi', chaqai qomi' lalamaxarete'; 'ec qomi' qagreta lqui'ỹaxanata. Na'xaỹaxañiỹa dá'maq 'naac nagui ñi'maxare caqamiri:

⁸ Totaxan 'ñaxachii añi re'taxanatahi, 'ec na'le quiyi Meriba, 'nejem so na'xa'a quiyi Masah, quiyi 'laua qaica qom,

⁹ na' yi'guen so 'auaxaic qataa'illipi, 'eno'm mashic iuana da ỹo'ueenataxanaxac.

¹⁰ Quecaua cuarenta ñaxari so'ootapega so qomyipi, chaqai shinac: Najo qomyipi chalego da llitaxanaxac; ¡se na'xaỹaxanalo naua ilaataxanaxaco!

¹¹ Ca na' so'o, ca' saanec da ỹa'qaatec quiyim se inoxona'a ma'le yi ñco'matqa'.