Salmos 91 - La'qaatqa ñi qota'olec Qota'olec & Qota'olec Novita Na Qomyipi

Ñi qara'gaxala' qare'guenaxala'

¹ Cá'maq hueeto'ot da lquepaqataxanaxac ñí'maq qoỹoqoshi'megue chaqai qaica lqalanec qota'olec,

² ca'maxare 'naac quiñi qara'gaxala': Chaqaqami' ná'maq si'iito'ot, chaqaqami' i'guenaxala', ¡qami' qota'olec, spi'ỹa'a qami'!

³ Qaiñiita ñi'maxare ishit ro'ootaxanlec qami' caca noqoina se re'xogui chaqai na 'ueenataxac ralauataxan,

⁴ ma' quepaqataxanlec qami' quenaua laua', ca quiyim vi'so'oto, ca' qaica ca rovichiraque. Ca ma' ipaquichiguilo naua la'qaatqa, naua'maxare 'ec aca nquepaqataxanqate caqami'.

⁵ Totaxan ro'chitalo naua lichico naua piri, chaqai na novic qaỹahinec quiyi na'xa'a,

⁶ chaqai naua nanatqa novirero quena' napalñi, chaqai nauá'maq ralauataxana'pe quena' richiguiñi,

⁷ ma' no'm mil ca ileu pa'aata'gue da nemaqai' chaqai diez mil queda qatoiqui', qam caqami', ca' qaica canchaqaica.

⁸ Ta'ta'a quiyim chaqai huañita: 'ajñisac ma'le na hualoxonyipi ma' icoñiguit ca nouaxanaxaset.

⁹ Ma' mashic 'guiñitot ñi qara'gaxala', chaqai quiyim ñí'maq qoỹoqoshi'ma quepaqataxanlec qami',

¹⁰ ca' qaica ca taalec qami' quena se no'uen, vire'ta na nalolaxa se ỹovira'a ca ra'aachi';

¹¹ ma' ñi'maxare ila' ma'le na lelaatqaipi piguim laseripi, ca na'maxare reloqota'a qami' quecanchaqai vi'sa'gue.

¹² Nanojshiguim qami' quenaua lqai'laqate', qaiyi qaica ca roqopia'guita naua qapiaachichi' quena qa'.

¹³ Ca shichi' qui'sañigui ca sauaxaic leta'allipi, chaqai na iseripi leta'allipi chaqaiquipi chaqai na nanaiquipi.

¹⁴ Ca' ñi qota'olec 'naac: Ỹim ñca'laxatec quená'ogue noxonaxanaxaquipi ma' ca'maxare nqo'chiiua' chaqai iuañiua'.

¹⁵ Ma' roỹaxanaque aỹim, ca' sasaachiguit; ¡ca chaqaỹim ná'maq iỹaatac ma'le! Ñaqata'a quenaua le'xoyaxaco, ca so'uet quiyim 'xoic na imaqachin;

¹⁶ ca' saanem quiyim ỹaatqajam ladoc da nachaalataxac: Ca ¡so'uet quiyim ỹovirau'a da ica'laqataxanaxac!