Salmos 88 - La'qaatqa ñi qota'olec Qota'olec & Qota'olec Novita Na Qomyipi

Qami' ỹa'gaxala', ¿chi'neco' ma' sqai coñichiguit aỹim?

¹ Qami' ỹa'gaxala' qota'olec chaqai ica'laxaqui, quiyi na'xa'a chaqai yi pe sashiila'isac quiyim yotauañi',

² ¡coñichiguit da ñqouagaxainaxac, chaqai na'xaỹaxañita da ỹoỹaxanaxac.

³ Chalego lecaic dá'maq se no'uen taalec aỹim, ca mashic sham yileu;

⁴ ca ¡mashic 'ec shi'gue qayalecqajnougui na leuaxaiquipi, ma' mashic tot qaica ca iquesaxanaxa!

⁵ Ỹim qayalataugui na leuaxaiquipi; shintam ca ileuaugui ca lauataq chaqai shi'gue qaishinñi; shintam ná'maq tot qaiquepaqataxanlec, chaqai ná'maq mashic coua'ire'e qami'.

⁶ Yinaqairi'ñigui aca paguec qoỹoqochi'ñigui tema, quecá'maq paguec lapalqa' chaqai qoỹoqochi'ñigui.

⁷ Ca' ỹaatqajam machirailec da ronogoxonaxaqui', ca' ¡ỹaatqajam iyinñi nqai'ñi' aỹim quena lo'paxa!

⁸ 'Viichi' quiyim na ñauochaxauaripi yalat; 'viichi' quiyim qanaqaica'guit aỹim quenaua'maxare. ¡Shintari' ca ncoñiiteguesec quiyim se qohitauec!

⁹ Ca' paguec da ñoỹenaxac, ca' vire'ta sham se ñiuanñi. ¡Naua'que naua na'xata' yaualqatacot qami' ỹa'gaxala', saansashi'ma qami' naua iqai'laqate'!

¹⁰ ¿Peeta'a shichi'o' chaxañitem ca se qaiuanapega na leuaxaiquipi? ¿Peeta'a ishito' na leuaxaiquipi ỹaanot qami' ca na'aachic?

¹¹ ¿Peeta'a qaỹa'xato' ma'le da ra'qaachiqui' lliqueta chaqai da re'xorenataxanaxa'e' cañi napal lahi' loqo'm queca ỹoiquentac da nelauaxa?

¹² Queda la'al da nelauaxa yí'maq hua'ñi quiyim ná'ogue qaicoua'e, ¿peeta'a 'uo' ma'le ca ỹa'deena'a dá'maq 'viichi' quiyim ỹa'maqachiguiñi chaqai qaimaqachin?

¹³ Qam ỹim yaualqatacot qami' ỹa'gaxala'; quiyi nete'eta, ca saanot qami' da ñqouagaxainaxac.

¹⁴ ¿Chi'negue ma' se rqo'chiriua', qami' ỹa'gaxala'? ¿Chi'negue ma' nañoxochirapeguem aỹim?

¹⁵ Shi'gue na' ñaqai ỹim ne'necoqui' ỹaatqajam 'xoic da i'xoric chaqai sham yileu; qam ỹaatqajam ña'ñaxachiguit da lichic dá'maq chicqo'ot qami', qam mashic tot yalo'guit nagui.

¹⁶ Da lichic da ronogoxonaxaqui' mashic shi'gue quejlec aỹim, ca' ỹim loxonec;

¹⁷ ỹaatqajam ỹimá'ogue yapoxonaxanchiguiñi 'ec ca nedep.

¹⁸ Ỹoochire'ogalo caua ñauochaxaua' chaqai caua ñauegaxaua', ca' nagui qainaata na napalaxa huaqui'chiguit aỹim.