Salmos 84 - La'qaatqa ñi qota'olec Qota'olec & Qota'olec Novita Na Qomyipi

Da niỹalaxa quiyim qoyiuetau'a ca la'a' ñi qota'olec

¹ ¡Ỹaatqajam chalego loyac ñí'maq qauochi', qami' ỹa'gaxala' qaica ca rqalañiqui'!

² ¡Ỹaatqajam chalego da ishoxo chaqai da iyaxa quiyim seuete'e yi pa'aauo quiñi qauochi'! ¡Cañá'ogue añi i'taxanata so'ueenta'uegue da ñitoonaxac quiñi qota'olec chicqo'ot da nca'laxa!

³ Chaqai vire'ta na re'palligot chaqai ana liỹa qo'oole na'a' lo'o, 'ue na loma' quiyi leseeque'ta na ncopatoxonaxalateipi, ca' ỹo'uet na lpa'gue' na llaalqaipioqui', qami' ỹa'gaxala' qaica rqalañiqui', qami' ỹashi chaqai qota'olec caỹim.

⁴ ¡Chalego la'maxa quená'maq mashic neetaugui añi ro'ueenaxanaxagui'i', ca' se neme ro'ueenaxantalec qami'!

⁵ ¡Chalego la'maxa quená'maq chicqo'ot qami' da notaanaxac, ná'maq ỹahotaque ỹouoxontac añi ralamaxarichi'i' quemaralec qa' ladocai, leenaxat Sión!

⁶ Ca ma' ỹovita ca ca'megue leenaxat oỹenqa', ca' ñigui nqai'en ca huaxaỹaq ne'paxantashiguim, ca vire'ta na ỹaxat i'paxanlec nqai'en quena nqouagaxa;

⁷ ca' noquiiquetauec da lquesaxanaxa, ca' quiyi Sión, ca' iuana ñi qota'olec qaica nqai 'nejem.

⁸ Qami' ỹa'gaxala' qota'olec qaica ca qalañirac, qami' qota'olec queso Jacob, ¡na'xaỹaxañita da ñqouagaxainaxac!

⁹ Qami' qota'olec, quepaqataxañiseguelgoto qomi', huagaxaraic qami' quiyim ra'iisa'a cá'maq rca'acshiqui' quiyim qarashi.

¹⁰ ¡Paguec la'maxa quiyim 'oonoqui' ca na'xa'a seuetalec ca nasoxoqui', quecaua mil na'xata' spa'aatauec! 'Ue da ishoxo quiyim ỹim lasom lo'o quiñi lo'ueenaxanaxaqui ñi qota'olec, sqai 'nejem quiyim seueta'ñi ca hua'ñi na se no'uen.

¹¹ Ma' ñi qara'gaxala' qota'olec coỹareta'ñalo chaqai quepaqataxanteguelgoto qomi'; ñi qara'gaxala' i'xoren chaqai imaqachin cá'maq qaica ca lasauaxaset chaqai qaica ca ỹollaapeguem quená'maq no'uen.

¹² Qami' qara'gaxala' qaica ca rqalañiqui', ¡chalego la'maxa quená'maq 'ue da lpi'ỹaxac caqami'!