Salmos 8 - La'qaatqa ñi qota'olec Qota'olec & Qota'olec Novita Na Qomyipi

Da lauaq ñi qota'olec chaqai da lemaqachic ca chaqai qom

¹ Qami' qara'gaxala' ma' cochi'sapegalo qomi', ¡da qadeenaxachi' ỹaatqajam ỹoiquentac ná'ogue na 'laua!, ¡da remaqachiqui' napacalec na piguim!

² Queda lemaqajnataxanaxa na ñaaqaipioqui' chaqai ná'maq ñaqai llipetac, ca no'xoñirishiguim ca re'guenaxagui'i', sauaxat na npa'guenaxaua'e'ipi, qaiyi nomachichiriñi na sqai huelec qami' chaqai ná'maq se reuojñi'.

³ Quena' ya'iito'ot na piguim ná'maq ro'ueenachiqui', ñi shiraigo chaqai ana huaqajñi ỹañiso'ot na'maxare,

⁴ ca viichigui na iuel quiyim shinacsa': ¿Negue' quet ná'maq chi ỹale? ¿Negue' quet ná'maq chaqai qom? ¿Chi'negue ma' sqa 'laxachite chaqai quelollisapega na'maxare?

⁵ Ma' sham nalo'chiguit nqai'ñi' qami' na'le, chaqai 'ỹaañitem quiyim qaimaqachin chaqai da lichoxoric,

⁶ chaqai 'ỹaañitem quiyim ỹapacauec quena liỹa ro'ueenachiqui', chaqai 'ỹaañitem quiyim ỹapacauec quená'ogue nanchaqaina:

⁷ ỹapacauec quena qagretaipi chaqai quena ñii'lolaipi, chaqai quena iseripi neuec,

⁸ chaqai quená'maq ỹoipi quená'maq ỹootac quena piguim, chaqai na nalliñipi hueetañigui ana huaaxai, ¡chaqai quená'ogue ná'maq hueetañigui ana huaaxai!

⁹ Qami' qara'gaxala' ma' cochi'sapegalo qomi', ¡da qadeenaxachi' ỹoiquentac ná'ogue na 'laua!