Salmos 63 - La'qaatqa ñi qota'olec Qota'olec & Qota'olec Novita Na Qomyipi

Ñi qota'olec qaica ca ỹouen nqai'en na qom

¹ ¡Qami' qota'olec, qami' qota'olec caỹim! 'Ue da ipagaxallic quiyim sedaantaque qami'; ma' vi'saxauot cá'maq souentaque; ỹimá'ogue souentaque qami', shintari' ca 'laua rashivijlec, qaica ca huaxaỹaq chaqai qaica ca nca'laxa.

² ¡Sahotaque seuañiraxaua' nqa'xañisa'ñigui aca co'teeta nqa'xanaxagui'i', chaqai seuana da rquesaxanaxa'e' chaqai da rauaqe',

³ ma' da re'xorenataxanaxa'e' ỹapacauec queda chaalataxac! Ca' quena ỹap semaqachintac qami',

⁴ semaqachintac qami' quedá'ogue da ñachaalataxac, ỹiquesashiguim naua iqai'laqate' quiyim ñqouagaxainot qami'.

⁵ Ỹaatqajam ya'maqachiguiñi ma'le, shinta cá'maq chita'gue ỹomat ca no'uen nqui'ỹaxac, ca' ñitoontac, semaqachintac qami' ma'le.

⁶ Quena' ñinanñi quiyi pe, ca so'leentaxan, ca' sa'deentaque qami';

⁷ ma' qami' ná'maq yotauañi'sac. ¡Ỹaatqajam 'xoic ỹa'maxa quiyim sento'oto naua rauachi'!

⁸ Dá'ogue da ñachaalataxac ima'guit aqami'; da qatoiqui' se yayaxanec.

⁹ Ná'maq ỹahotaque yalauat ta'ñigui ma'le aca napal lahi';

¹⁰ ¡qaỹalauat, qaỹodoota'a na lecat chaqai qaito quena isecỹac toxonaxai!

¹¹ Qam ñi nashi netoontac quiñi qota'olec; ro'ueenaxantalec da lemaqajnataxanaxa ná'ogue ỹaanec da la'qaatec quiñi'maxare, qam ná'maq na'majantac, ca qaỹapogui na lap.