Salmos 6 - La'qaatqa ñi qota'olec Qota'olec & Qota'olec Novita Na Qomyipi

Da qouagaxainaxac quena' 'ue da neuogoxo

¹ Qami' ỹa'gaxala', totaxan relaqairiua' quiyim 'ohi', chaqai sqa vite ca ñouaxanaxaset quiyim roqui'raỹa'.

² Qami' ỹa'gaxala', yi'xoriñi', ma' ñauate'e quiyim qaica ca ỹa'ñaxac. Qami' ỹa'gaxala', rapilaxachi' ca ỹa'maxa, ma' ná'ogue na ỹoshicmaxa i'loxol.

³ ¡Mashic yi'loxoltari' quena iqolonaxa! Ca' qami' ỹa'gaxala', ¿laquio' chi novichi'?

⁴ Qami' ỹa'gaxala', na'itquena, ¡nca'laxachirec da ñachaalataxac! ¡Yca'laxachirec queda re'xorenataxanaxa'e'!

⁵ Qaica quet cá'maq mashic ileu, ca ỹo'leenta'a qami'; ¿negue' queto' ca ishit quiyim imaqachin qami' quiyim mashic hueetañigui aca napal lahi'?

⁶ Ỹaatqajam mashic yco'te'guesop da ñoỹenaxac. Naua'que naua piri ñoỹentac, vire'ta pi'guiloxolta yi ña'xanaxat quenaua ỹachi'.

⁷ Da nqui'ic mashic sham ỹo'mate' naua ñqote'; ¡sham o'me' sauaxat na ñpa'guenaxauaripi!

⁸ ¡Noỹoochiuec caỹim ma' 'viichitac da se no'uen ma' ñi qara'gaxala' mashic 'xaỹa da ñoỹenaxac!

⁹ Ñi qara'gaxala' na'xaỹaxana da ñi'xoresenaxac, ¡ñi qara'gaxala' icoñiguit da ñqouagaxainaxac!

¹⁰ Na ñpa'guenaxauaripi ileuapeguem da lqolonaxa, ỹaatqajam qaica ca 'negue; ¡'ec quiyim 'oonoqui' nqatagoxoñi, ca' 'eete', paguec da layilqo'!