Salmos 50 - La'qaatqa ñi qota'olec Qota'olec & Qota'olec Novita Na Qomyipi

Ñi qota'olec sqai ỹit quena' imit ca nasauaxaset

¹ Ñi qara'gaxala' qota'olec ñí'maq ỹapacauec quená'ogue nanchaqaina retaqa nagui; ñi'maxare roỹaxana ná'ogue na hueetalec na 'laua queda lqodoigue chaqai queda lauashiguim.

² Ñi qota'olec re'oq da lauaq quiyi Sión, yí'maq na'a' qaica nqai 'nejem da loyac.

³ Ñi qota'olec anac, qam se i'maqata: 'aueta nqai'en so norec navicqataxanaq; chaqai quenaua lahil, ca 'ue na nonot lodegaxat.

⁴ Ca' quiyi neetashi'me qoỹoqoshi'ma ñi qota'olec roỹaxana na piguim chaqai na 'laua, qaiyi reloqotaho quiyim imit na lalamaxareteripi, ca 'naac:

⁵ Lapooñiỹata' ná'maq qamaxaraiquipi caỹim quená'maq mashic 'ue da qana'deenaxac quiyim ỹavigaxat ca lachitaxanataxanaxat, ca' ỹaanot aỹim.

⁶ Ca' na piguim ỹa'xat quiyim ñi qota'olec qaica ca ỹit quiyim imit ca nasauaxaset.

⁷ Ñaq na'xaỹaxañiua', qamiri llaalqaipi so Israel, ma' qamiri ỹalamaxarete'; nagui, ca' ỹaatqajam ñichoxotalo qamiri. ¡Ỹim ná'maq ỹim qota'olec! ¡Ỹim qota'olec caqamiri!

⁸ Qam se sa'ue ca rayiloxo'e' quena rachitaxanataxanaxachi', vigaxachi'sac se neme nañaañisapego.

⁹ Se soỹaxantaque ca huaqui llaalec quena qalo'e'ipi chaqai ca quetaq loua' hueetaugui ana qalo'e' lahi',

¹⁰ ma' ỹim ỹalamaxaret ná'ogue na iseripi neuec, chaqai na iseripi hueetalec ana quemaralec qa' ladocai;

¹¹ chaqai ỹalamaxaret na ỹoipi hueetalec ana quemaralec qa' ladocai, chaqai ná'ogue na ỹaỹaaquioxontac na no'ueenaxa.

¹² Quetqai yqopat, qam se sa'qaataxana qami', ma' ỹooỹac ná'ogue na 'laua, chaqai ná'ogue ná'maq hueetalec na'maxare.

¹³ Ca ¿ỹimo' ná'maq sa'queetac na huaca la'at, loqo'm ñi'teetapiguilo naua leuo' na quetaq loua'?

¹⁴ ¡Da na'aachiqui' quet dá'maq 'ỹaañisacot ñi qota'olec; ipaquichigui nqai'ñi' ca ra'qaachiqui' quiñí'maq qaica ca lqalanec!

¹⁵ Ca ỹaxañita ỹim quiyim 'ue ca reuogoxo'e'; ca ỹim so'ootaxanlec qami', ca qami' yimaqachiñi' ma'le.

¹⁶ Qam quecá'maq hualoxonaq, ca' ñi qota'olec 'naapega: ¿Chi'negue ma' 'quiiseguelgoto naua ỹaqataxaco loqo'm 'xachisac da ña'maqataxac,

¹⁷ qam no'm sqai 'maxariñi' quiyim sapaxaguiñi' chaqai qaica ca 'neguelo nqai'ñi' naua ỹa'qaatqa?

¹⁸ Ma' coñichichiguit na cuataxai chaqai ¡lliquisa'piguit na nedequenaxaiquipi!

¹⁹ Vi'saque da se no'uen, chaqai no'viichisecshiguim da na'maachic, chicqoteguelec ñi ro'legaxanaxachi' chaqai ñi qadapi'.

²⁰ Ca' naqaisac ca rqaỹa'e'; ¡sqai 'maxachira'gue cá'maq ralamaxarichi' rqaỹa'e'!

²¹ Ca ná'ogue najo 'viichi'sac, qam ỹim yi'maqata, 'neetapigui qavilli' quiyim shintam aqami'. Qam nagui seloxoiqata'ta', ca soviraxachiraxaua', ca' ¡nagui sa'maxajta' naua rasauaxashichichi'!

²² Ca' 'yiiñita nagui dajo qamiri mashic couahi'e ñi qota'olec, 'neeto' lahiletajlgoto nqaishine' qamiri, ca' qaica ca ro'ootaxanlgoto qamiri:

²³ cá'maq ỹaantacot aỹim ca na'aachicyaxac, ca' yimaqachin. ¡Ỹim ñca'laxatec cá'maq se neme queetalec da ñayicyaxac!