Salmos 46 - La'qaatqa ñi qota'olec Qota'olec & Qota'olec Novita Na Qomyipi

Ñi qota'olec ỹalequetauguilo qomi'

¹ Ñi qota'olec quepaqataxanteguelgoto qomi' chaqai qarquesaxanaxa; chaqai quena' 'ue da qareuogoxo, ca' qarotauan.

² Vichiguiño' se qaro'chi 'eno'm sogui na 'laua, 'eno'm iyinñi ana quemaralec qa' ladocai quena lauajñi aso huaaxai,

³ 'eno'm ilamigui aso huaaxai chaqai naỹoxonshiguim na lo'paxa, 'eno'm i'loxol ana quemaralec qa' ladocai sauaxat da lonogoxonaxac.

⁴ Aso lachiugue chaqai na taỹau'alo ñaachi ỹo'uet da netoonaxac yi qota'olec la'a' yí'maq paguec co'teeta quena la'aateripi ñí'maq ỹapacauec quená'ogue.

⁵ Ñi qota'olec neetañigui lavinñi yi'maxare chaqai ro'ootaxanteguelec, ñi qota'olec ỹotauantac quena' sham richiguiñi.

⁶ 'Ue da lelamaxa na qomyipi quena 'laua, chaqai i'loxol na nashillipi, na 'laua sogui quena' qara'xaỹaque quiyim retaqa.

⁷ ¡Ñi qara'gaxala' ñí'maq qaica ca lqalanec ỹalequetauguilo qomi'! ¡Ñi qota'olec queso Jacob chaqaiñi ñi quepaqataxanteguelgoto qomi'!

⁸ Nahiquena ñaqai 'ajñii ná'maq ỹo'uet ca ne'laxa quená'maq ỹo'uet ñi qara'gaxala' quena 'laua:

⁹ ñi'maxare ime nqai'en na lauataxac quenaua'que naua lahil na 'laua; ỹaqaguit na no'xoshic, ỹaqaguitetajlec ana niquillipi, ¡copata'a ana nahoglena lauataxaqui!

¹⁰ ¡Nemanachichii! ¡'Yiiñii'a quiyim ỹim qota'olec! ¡Ỹim spa'aatashiguim quená'ogue na qomyipi! ¡Ỹim spa'aatashiguim quená'ogue na 'laua!

¹¹ ¡Ñi qara'gaxala' ñí'maq qaica ca lqalanec ỹalequetauguilo qomi'! ¡Ñi qota'olec queso Jacob chaqaiñi ñi quepaqataxanteguelgoto qomi'!