Salmos 42 - La'qaatqa ñi qota'olec Qota'olec & Qota'olec Novita Na Qomyipi

Saanto'ot da ñaquitaxac ñi qota'olec

¹ Ỹaatqajam shintari' ca peele ỹalauat laquip, imitetaque ca huaxaỹaq, chaqaida shintari' sedaantaque qami' qota'olec.

² 'Eco' ỹaatqajam 'xoic da ỹaquip quiñi qota'olec, ñí'maq chicqo'ot da nca'laxa. ¿Chi' laquio' liỹa ñovira'a ñi qota'olec?

³ Quiyi na'xa'a chaqai quiyi pe 'ec sa'queeta'pe naua ỹachi', qam se neme quiyim qayinatetac: ¿Hueeta'gue ca qota'olec caqami'?

⁴ Ca quena' sa'deentaque dajo, ca' ñañaañiguit da nqui'ic. So'leente'te quena' salequeta'guit so qomyipi, sauequetau'a añi no'ueenaxanaxaqui quiñi qota'olec, ỹaualqatagui queda netoonaxac chaqai da na'aachicyaxac. ¡Ca' chalego lemaqachic quena'le!

⁵ ¿Chi'negue queta' yiualtegueñi? ¿Chi'negue queta' 'ue ca hueetapigui iuel? Ma' da ñaquitaxac saanot ñi qota'olec, Ñí'maq ỹim shiquetalec semaqachintac. ¡Ñi'maxare qota'olec caỹim chaqai ica'laxaqui!

⁶ Ỹaatqajam 'xoic na i'miaqataxanaxa. Vichiguiño' ỹaatqajam sa'deentapega quen qami' quena' seuete'e yi 'laua huaugui aso lachiugue Jordán chaqai cada qoỹoqoshi'megue qa' ladocai leenaxat Hermón chaqai yi Mizar.

⁷ Ca qara'xaỹa quena tocot qoỹoqochi'ñigui ca lelamaxa na huaxaỹaq; na 'xoic huaxaỹaq remaxashiqui' quiyim queeteguelec aỹim.

⁸ Quiyi na'xa'a noviriua' da le'xorenataxanaxa ñi qara'gaxala', chaqai quiyi pe, ca' se neme da ỹo'ueenaxanaxac chaqai da ñqouagaxainaxac quiñi qota'olec, ñí'maq chicqo'ot da ica'laxa.

⁹ Ca' shinac quiñi qota'olec ñí'maq ro'ootaxanteguelec aỹim: ¿Chi'negue ma' coua'ire'e aỹim? ¿Chi'negue queta' sachicota chaqai quiyim ypataqatañi na ñpa'guenaxauaripi?

¹⁰ Ỹovire'talo naua ipi'naqa seuete' paguelec na la'qaatqaipi na ñpa'guenaxauaripi, chaqai quiyim se yayaxanac yinatetac: ¿Negue' ca hueeta'gue ca qota'olec caqami'?

¹¹ ¿Chi'negue queta' yiualtegueñi? ¿Chi'negue queta' 'ue ca hueetapigui iuel? Ma' da ñaquitaxac saanot ñi qota'olec, Ñí'maq ỹim shiquetalec semaqachintac. ¡Ñi'maxare qota'olec caỹim chaqai ica'laxaqui!