Salmos 31 - La'qaatqa ñi qota'olec Qota'olec & Qota'olec Novita Na Qomyipi

Quena' ỹaatqajam qaipi'ỹa'a ñi qara'gaxala'

¹ Ỹa'gaxala', se'guenot qami' quiyim 'ootaxañirelec aỹim. ¡Totaxan vite ca ỹayiloxo! ¡Yca'laxachirec, ma' 'maxaraic ca ro'ueenataxanaxaqui'!

² Qouaquiric na'xaỹaxañiriua'; ca ¡chaqa'ma' yca'laxachirec! ¡'Ñiisari' ca i'guenaxaqui qa', 'ñiisari' ca i'guenaxaqui chaqai ica'laxaqui!

³ ¡Ma' mashic 'ñiisari' ca qa' chaqai ca 'imec i'guenaxaqui! ¡Yashaxañisac chaqai quepaqataxañiseguelec aỹim; 'viichi' ca lichoxoric da qadeenaxachi'!

⁴ ¡Yaqachi' cañi noqoina qaỹa'maxatetañi ñanoxonaxaqui, qam qami' ná'maq quepaqataxañiseguelec aỹim!

⁵ Sañiguilo naua napoquenalli' da ñachaalataxac; ¡coñira'ñigui aỹim, qami' ỹa'gaxala', qami' qota'olec queda lliqueta!

⁶ Ỹaatqajam se yqo'ta ná'maq nqouagaxaintacot na nqolaquipi qaica ca 'negue. Ma' ỹim selliito'ot da ñaquitaxac ñi qara'gaxala'.

⁷ Da re'xorenataxanaxa'e' ỹo'uet da ñitoonaxac chaqai da ỹa'maxa. Qami' huañichirigui da ỹachicoxo, chaqai 'yiiñite' naua ñi'guenaxaco.

⁸ Se yayaañichiguit ca ñpa'guenaxaua; ¡yachaalataxañiriñi quiyí'maq hua'ñi qaica ca youetaque!

⁹ Qami' ỹa'gaxala', qouaquiric, ma' ỹim seuetaugui na lichic. Nolaviñi naua ñqote' queda nqui'ic, na ỹoshicmaxa chaqai ỹimá'ogue.

¹⁰ ¡Da nqui'ic chaqai naua ñoỹenaxaco imero nqai'ne' naua niñaxari da ñachaalataxac! Tot qaica ca ỹa'ñaxac quena ỹachicoxo; ¡na ỹoshicmaxa qaica ca la'ñaxac!

¹¹ Chaqaỹim le'nec na ñpa'guenaxauaripi, ỹaatqajam 'xoic da le'naxanaxac na ỹa'aayaxauaripi, ỹaatqajam 'ue da laqaigaxa ná'maq iuañiua'. ¡'Eetapiguit quena' iuañi'chiguit aỹim quena nayic!

¹² Ỹaatqajam qaicoua'tem aỹim, mashic 'ec shi'gue yileu. 'Ec ỹim aca nehoma ropoqogui.

¹³ Sa'xaỹa na qomyipi nemootetecta': Ná'ogue hueetaugui da nqolonaxa. 'Xoic, qam 'oonoqui' da la'deenataxanaxac quiyim na'xalentapigui aỹim; ¡na'xalentapigui aỹim quiyim ỹahotaque yalauat!

¹⁴ Qam ỹim spe'eetapega qami' ỹa'gaxala', ma' ỹim shinac: ¡Qami' qota'olec caỹim!

¹⁵ Qami' lo'qo'isañi da ñachaalataxac; ¡'ootaxañirelec aỹim quena ñpa'guenaxauaripi, ma' na'maxare yocantac!

¹⁶ Ñaqai 'ajñi' da le'xoric najo relaachiqui', ca yca'laxachirec queda re'xorenataxanaxa'e'.

¹⁷ Yaualqatacot qami' ỹa'gaxala'; ¡se pataxañi nqai'ñi' aỹim da nayiloxo! ¡Da nayiloxo pataxañi nqai'ñi' na hualoxonyipi; ỹaatqajam ỹovira'ña nqai'ñi' ca hua'ñi na leuaxaiquipi!

¹⁸ I'maxañi nqai'ñi' na 'maatqaiquipi ná'maq re'naxantac quenaua la'qaatqa chaqai naqaica'guit, ca' ỹo'ooqochit ca qom no'uen ca la'deenataxanaxac.

¹⁹ ¡Chalego lecaic da rqouagaxa'e' quená'maq imaqachin qami'! 'Maxachisac da'maxare, 'ec nqai'ñi' ca nouenec 'xoic loyac, chaqai iuanchigui nqai'ñi' na qomyipi, ma' huagaxachirec quená'maq pi'ỹa'a qami'.

²⁰ 'Ootaxañiseguelec quiyim loqoisa'a, no'ueenaxachisac quena na'deenaxac se no'uen na qomyipi, quepaqataxañiseguelec na'maxare queda loquiiaxa na npa'guenaxauaripi.

²¹ Ỹaatqajam qaimaqachin ñi qara'gaxala', ma' queda le'xorenataxanaxa, ca chalego lecaic da ỹo'uet caỹim na' ỹaatqajam yiuocqotac.

²² Na' tot qaica ca ỹa'maqa', ca' shintapega quiyim shi'gue yo'yirauec; qam na' sashiila'e' quiyim yotauañi', ca' 'qa'ita ca ỹaualaxac.

²³ Ca' chaqaida 'neeta ñi qara'gaxala' quená'maq imaqachin ñi'maxare. Ñi qara'gaxala' netela'a ná'maq huelec ñi'maxare, qam ná'maq nemaqajnaxairipi nqo'naxatetauec da nouaxanaxaset.

²⁴ Ca ỹaatqajam 'taxachiñi quiyim 'ue nqai 'negue nqai'ñii añi re'taxanatahi ná'ogue ná'maq pi'ỹa'a ñi qara'gaxala'.