Salmos 24 - La'qaatqa ñi qota'olec Qota'olec & Qota'olec Novita Na Qomyipi

Ñi nashi 'ue da lauaq

¹ Ñi qara'gaxala' lalamaxaret ná'ogue na 'laua, lalamaxaret ná'ogue ná'maq 'ue, chaqai ná'ogue ná'maq nca'leetauec hueetalec.

² Ma' ñi qara'gaxala' ỹo'viijñi ca lo'xonaxala' na 'laua, ca' ỹanalec ana huaaxai chaqai na lachiuguellipi.

³ Ca ¿negue' ca ishit quishi'megue añi quemaralec qa' ladocai lalamaxarete ñi qota'olec? ¿Negue' ca ishit shi'gom hueetaugui añi co'teeta qouagaxainaxaqui quiñi'maxare?

⁴ Cá'maq co'teete' naua lqai'laqate' chaqai añi le'taxanata quená'ogue na nasauaxaset; cá'maq se ỹashiila nqouagaxainot na nqolaquipi chaqai se nallitalta'.

⁵ Ñi na'gaxala' ñí'maq qota'olec nca'laxaqui nqouaguegue ma'le cajo ỹale chaqai ỹo'uet cá'maq ỹa'maqachiguiñi.

⁶ Ca' chaqaida dá'maq 'neeta quet cá'maq imitetaque ñi qara'gaxala', cá'maq ỹahotaque reloqoto'ot ñi qota'olec queso Jacob.

⁷ ¡Ca' huatouguilo naua lasomi' qaica lqodogue'! ¡Ca' chaqai 'neetari' nauatetauguilo, ca' inoxono ma'le ca nashi 'ue da lauaq!

⁸ ¿Negue' cá'maq nashi 'ue da lauaq? ¡Chaqaiñi ñi qara'gaxala' quesaxanaxaic chaqai 'ñaaxaic! ¡Chaqaiñi ñi qara'gaxala' 'ñaaxaic quena' nalauat!

⁹ Ca' ¡huatouguilo naua lasomi' qaica lqodogue'! ¡Ca' chaqai 'neetari' nauatetauguilo, ca' inoxono ma'le ca nashi 'ue da lauaq!

¹⁰ ¿Negue' cá'maq nashi 'ue da lauaq? ¡Chaqaiñi ñi qara'gaxala' ñí'maq qaica ca lqalanec! ¡Chaqaiñi ñí'maq nashi 'ue da lauaq!