Salmos 22 - La'qaatqa ñi qota'olec Qota'olec & Qota'olec Novita Na Qomyipi

Naualaxac queda ne'xoric chaqai qaỹo'uen da nemaqajnataxanaxa

¹ Qami' qota'olec, ¿chi'negue ma' yo'ueenaxachisañi?, ¿chi'negue ma' sqa na'itquena, ca yca'laxachirec?, ¿chi'negue ma' se quelollita da ñoỹenaxac?

² Qami' qota'olec, soỹaxantaque qami' quiyi na'xa'a chaqai yi pe, qam sqai saachichiguit aỹim; ¡chaqai mashic qaica ca ñco'matqa'!

³ Qam ỹaatqajam co'teeta qami'; qami' nashi, ca imaqachintac qami' na Israel.

⁴ So qareta'allipi pi'ỹa'a na' qami'; pi'ỹa'a na' qami', ca' qami' nca'laxachirec;

⁵ rashiila'e' quiyim tauañi', ca' qami' souec nqai'ñi'; pi'ỹa'a qami', ca' qami' sqa yiñi'.

⁶ Qam ỹim sqaỹim ỹale, ta'ta'a quiyim 'ec ỹim ñilo'; ¡chaqaỹim le'nec na qomyipi!

⁷ Ná'ogue ná'maq iuañiua' chi yi'neetac; ileguemaxachigui na lashic, ca' ỹaxaỹaxan na lqahic.

⁸ Ca 'naac: Ñijo ỹale pe'eetapega quen ñi qara'gaxala'; ca ñi'maxare souec nqai'en ma'le, ma' lqo'itaxat, ca' nca'laxatec.

⁹ Ca' chaqaida 'neeta: ne'qaañi nqai'ñi' na'le aỹim sachicqotougui aso ỹate'e; ca nco'mataxañirec na'le aỹim na' seuetalec ana lotogue.

¹⁰ Shi'gue na' saqa' ñi'qaañi, qa' cochi'sapiguiỹa'; na' ñaqai seuetaugui na lauel aso ỹate'e, ca qami' qota'olec caỹim.

¹¹ Sqoỹoqaque nqai'ñi' aỹim, ma' sqo ỹoxe'oga da i'xoric, chaqai qaica ca yotauan.

¹² Na ñpa'guenaxauaripi yahiquinchiguiñi 'ec toorollipi, 'ec na nocqaic toorollipi quiyi 'laua Basán;

¹³ da lonoxoỹaxac 'ec na toxonaxai sauaxaic leta'allipi, ỹauachigui na lap, ca' i'guentailec.

¹⁴ Mashic shinta na huaxaỹaq qaỹocorec; naua ipi'naqa 'ec sootaguilo. Añi i'taxanata 'ec ana lapa, 'ec quiguiñi quena iuel.

¹⁵ Rashivichigui na ỹap 'ec ca nehoma lahi nqateleguesec; ñi ỹo'legaxanaxat mashic ronaỹo'ot na ñoquiaq. ¡Yilli'sa'guit na namoxoỹaxa 'ec yileu!

¹⁶ 'Ec na pioxoripi na' lapoỹata' na hualoxonyipi ỹaatqajam lapoỹa'asop aỹim, coñirqachite' naua ñapoquenal chaqai naua ipiaate'.

¹⁷ ¡Seshit ñaloqochine' naua'que naua ipi'naqa! Na ñpa'guenaxauaripi ỹaatqajam qaica ca liỹa ra'ỹa'gue, qaỹimeta;

¹⁸ nallichiguilo saua ỹoho, ca' neuagaxachiguilo saua'maxare.

¹⁹ Qam qami' ỹa'gaxala', qami' iquesaxanaxa, ¡se loỹoochiraque aỹim!, ¡chaqa'ma' nanaqui' quiyim yotauañi'!

²⁰ 'Ootaxañirelec aỹim quiyim qayalauat quena lecat, mesqai 'xañitegue quiyim yalauat najo pioxoripi,

²¹ 'ootaxañirelec aỹim, qaiyi se ya'ic najo sauaxaic leta'allipi, ¡quepaqataxañirelec aỹim cana lasote najo toorollipi!

²² Ỹim sa'xat qami' ma'le quena ỹaqaỹaripi, semaqachintac qami' ma' salequetau'a ca lapoxoc.

²³ Qamiri ma' maqachiñitac ñi qara'gaxala', ca ¡maqachiñii ma'le! ¡Qamiri llaalqaipi so Jacob, qamiá'ogue pacqajñiỹauec ñi'maxare! ¡Nqouagaxainot ma'le ná'ogue na llaalqaipi so Israel!

²⁴ Ma' qaica quet cá'maq imaqa'guit ñi'maxare chaqai qaica ca napacalec quena leuogoxo ca 'xoraic, chaqai se nañoxotapeguem. ¡Quena' rashiilaxan quiyim qaỹotauan, ca na'xaỹaxanta!

²⁵ Ỹauanchigui nqaishin ná'ogue na ralamaxarichi'ipi semaqachintac quiyim ipaquichigui nqai'ñi' da ra'qaachiqui'; ca ỹauanchigui nqaishin ná'ogue ná'maq remaqachiñi'sac quiyim somachichigui dá'maq ỹa'qaatec na'le.

²⁶ Qui'ii, qamiri 'xoraiquipi, chi ỹovireta'a quiyim rquemarii; qamiri ma' daañitaque ñi qara'gaxala', ca' maqachiñii, ca 'xoic ca ñaxaripi rca'lliitauec.

²⁷ Qamiri ni'ic, chaqai ná'ogue na ỹoreta'oguit qomyipi quenaua'que naua lahil na 'laua: o'lliinchii'a ñi qara'gaxala', ca' naguipegue'; ¡'yiỹoto naua re'cootallii ñi'maxare!

²⁸ Ma' ñi qara'gaxala' chaqaiñi ñí'maq nashi, ñi'maxare ỹoiquentac ná'ogue na ỹoreta'oguit qomyipi.

²⁹ Qaiñiita 'yiỹoto naua re'cootallii, ca nqouagaxainot ná'ogue ná'maq qaica ca ỹouen, ná'ogue ná'maq pilougui ma'le na 'laua, ma' qaica quet cá'maq chi nanoiquentac nca'leetauec.

³⁰ Na ỹaxataxahipi nqouagaxaintacot ma'le ñi qara'gaxala', chaqai ỹa'xatetac ma'le ñi'maxare quedá'ogue da nachaalataxac;

³¹ ca ná'maq dalaxaic ne'qaañi qara'qaataxana ma'le quedá'maq 'maxaraic no'ueenataxac chaqai quena lo'ueenataxanaxaquipi.