Salmos 19 - La'qaatqa ñi qota'olec Qota'olec & Qota'olec Novita Na Qomyipi

Da lecaic ñi qota'olec quena lo'ueenatqaipi

¹ Na piguim ỹa'xat da lecaic ñi qota'olec, ca' quená'maq lo'ueenatqaipi ichoxot ná'maq hueeto'ot na'maxare.

² Naua na'xata' chi na'xajta', naua piri chi na'qaataxantecta'.

³ 'Eno'm se qara'xaỹaque ca na'qaatec, chaqai sqaica ca qara'xaỹaque nivillaxac,

⁴ qam da'maxare imaalec ná'ogue na 'laua, chi ỹovireta'a ca lqodoc na 'laua, chi ỹovireta'a ca na'ñi añi ra'aasa.

⁵ Añi ra'aasa netoon quena' quegue so llic, 'ec ca nalliquinaxai, 'ec ca piitaxaua quena' nenoxonec queca lo'naqa'.

⁶ Nenoxonshiguim añi ra'aasa queda lqodoigue, ca queeto'ot na piguim, chi ỹovireta'gue da lahi. Ca' qaica ca ishit 'eetapeguem na lauaq.

⁷ Da lapaxaguinataxanaxac ñi qara'gaxala' ỹaatqajam lamaxaraic, ma' ỹadalaxat da chaalataxac. Da laqataxac ñi qara'gaxala' ỹaatqajam qamaxaraic, ma' da'maxare ỹo'uet ca la'deenec ca qaica ca ỹa'den.

⁸ Naua lelaataxanaxaco ñi qara'gaxala' ỹaatqajam 'maxaraqa, ma' ỹo'ueete' da netoonaxac añi ne'taxanata. Da laqataxac ñi qara'gaxala' ỹaatqajam co'teeta, chaqai neloxotec yi na'deenataxanaxac.

⁹ Da nqolonaxa quiñi qara'gaxala' ỹaatqajam co'teeta chaqai qaica ca lqodoc. Naua laqataxaco ñi qara'gaxala' ỹaatqajam lliquete', naua'que naua'maxare ỹaatqajam 'maxaraiqa,

¹⁰ ¡ỹaatqajam napacalec ca lesega'a cá'maq ỹaatqajam no'uen 'oro!, ¡paguec lo'daxa queca rapic li'i hueetagui aca lapa!

¹¹ Chaqai qai'neeta naqataxaco quenajo relaachiqui' ca ma' na'xaỹaxanalo, ca' 'ue da la'maxa.

¹² ¿Negue' cá'maq ỹa'deene' cauá'maq chi lo'maxaco? ¡Qami' ỹa'gaxala', palaxachi' naua se re'xoi' ỹo'maxaco!

¹³ Naqachi' da nemaqajnaxac najo relaachiqui'; mesqai 'xañitegue quiyim queetalec da nemaqajnaxac, qaiyi co'teeta da ñachaalataxac, qaiyi qaica cá'maq ỹasauaxaset lodegaxat.

¹⁴ 'Maxariñite' naua ỹa'qaatqa chaqai naua ỹa'deenataxanaxaco, qami' qarashi, i'guenaxala' chaqai ica'laxaqui.