Salmos 16 - La'qaatqa ñi qota'olec Qota'olec & Qota'olec Novita Na Qomyipi

Chalego loyac dá'maq qoỹaan ma'le

¹ ¡Qami' qota'olec, loqoisa'a aỹim, ma' qaqamite' se'guentacot!

² Ca' ỹim shinac caqami': Qami' ná'maq qami' ỹa'gaxala' ỹaatqajam qami' ỹa'maxa; qaica ca 'nejem qami'.

³ Na lqolaquipi na qomyipi quena 'laua paguec quesaxanaxaiquipi, 'naac ná'maq lashiilqaipi na'maxare.

⁴ Ca' noquiigaxatetauec na lashiilqaipi lqolaquipi, ca' queeta'pegue', chalego da lemaqajnataxanaxa. ¡Qam ỹim qaica ma' salecau'a quet na ỹalauatetac quiyim ỹavigaxat lachitaxanataxanaxat! ¡Ỹaatqajam qaica ma' ña'xatec quet na leenqateripi!

⁵ Qami' ỹa'gaxala', ỹaatqajam qaqamite' caỹimá'ogue; ma' qami' machiralec aỹim da rqouagaxa'e'; qami' lo'qo'isañi da ñachaalataxac.

⁶ Ỹaatqajam chalego loyac yí'maq taalec nqai'ñi' aỹim; ¡ỹaatqajam lo'yaxanec yi ỹa'a' vi'saque nañaañirim!

⁷ Semaqachin ñi qara'gaxala' ma' ñi'maxare yashaxantac, chaqai dá'maq pa'ỹaauo ño'ueenataxac ñi'maxare ỹa'maxajñi quiyi pe.

⁸ Chaqai 'neetari' sqo ỹoxe'oga nqaishin ñi ỹa'gaxala', ñi'maxare hueeta'gue da ỹoic, ca' qaica cá'maq huaañi nqai'en aỹim.

⁹ Vichiguiño' dá'maq pa'aauo queda ño'ueenataxac, añi i'taxanata ỹaatqajam no'qaachigui queda ñitoonaxac. Ca caỹimá'ogue qaica ca huapigui iuel,

¹⁰ ma' qami' se no'ueenaxachira'ñigui aỹim aca napal lahi', ¡sqa lachira'ñigui aca lahi' ná'maq ỹaatqajam qamaxaraic nauochaxaua'e'!

¹¹ Ca' chaxañitem aỹim ca nayic da nca'laxa. Ỹaatqajam chalego da na'maxa quiyim sqoỹoqaque qami'; qaica ca lqodoc da toonaxac quiyim qarauaqate'e' qami'.