Salmos 146 - La'qaatqa ñi qota'olec Qota'olec & Qota'olec Novita Na Qomyipi

Ñi qota'olec qaimaqachin quená'maq ỹo'uet

¹ ¡Qaimaqachin ñi qara'gaxala' qota'olec! Semaqachin ñi qara'gaxala' quedá'ogue da ñachaalataxac.

² Semaqachin ñi qara'gaxala' quiyim ñaqai yca'leetauec. So'uen ca no'ueenec quiñi qota'olec caỹim quiyim ñaqa 'ue aỹim.

³ Mesqai hueeto'ot nqai'ñii ca naquitaxaguii ca qom 'ue nqai 'negue, quecá'maq chaqai qom se ca'laqataxan,

⁴ ma' quena' ileu, ca' pilougui na 'laua, ca' chaqaica cá'maq na'xa'a, ca imeuo na na'deenaxaquipi.

⁵ Chalego loyac quecá'maq qom qaỹotauan quiñi nqota'olec so Jacob, cá'maq ỹomato'ot da naquitaxac quiñí'maq qara'gaxala' qota'olec.

⁶ Ñi'maxare ỹo'uet na piguim, 'laua, chaqai ana huaaxai, chaqai ná'ogue ná'maq hueetaugui na'maxare. Chaqai chaqaidaata 'neetari' da la'qaatec, se ỹadalaxat.

⁷ Qoshiilec ná'maq se qaỹa'maxata'gue chaqai ỹa'ue ca loq na qopaaxaiquipi. Ñi qara'gaxala' souec nqai'en na ncoñiitecseripi;

⁸ ñi qara'gaxala' liỹa neuanñi nqai'en na qai'laq; ñi qara'gaxala' nanojshiguim ná'maq mashic huaañi; ñi qara'gaxala' i'xoren ca ỹale 'maxataxaraic;

⁹ ñi qara'gaxala' ro'ootaxanlec na ỹoqa'a ca chicqa'gue, qui'ỹaxan na na'peloq chaqai ana pa'ỹe, qam na hualoxonyipi ỹit nqai'en ca llicyaxac.

¹⁰ Ca' qami' na'a' lodegaxat Sión, ñi qara'gaxala' se neme quiyim nashi; ñi qota'olec caqami' sqaica lqodoc quiyim nashi. ¡Qaimaqachin ñi qara'gaxala' qota'olec!