Salmos 14 - La'qaatqa ñi qota'olec Qota'olec & Qota'olec Novita Na Qomyipi

Ca qom se ỹo'uet ca ỹa'maqachiguiñi

¹ Na se nouoguiñi 'neetapigui lauel qaica ñi qota'olec: ná'ogue ỹo'meetajlec; chalego la'aaxa na ỹo'ueetetac; ¡qaica quet cá'maq ỹo'uet ca ỹa'maqachiguiñi!

² Ñi qara'gaxala' qota'olec na'iitañi queda piguim, ỹa'ajantac na qomyipi, sha'apiguito' 'ue ca 'deenataxanaxai ca' idaanaque ñi'maxare.

³ Qam ná'ogue quegue so ñicyaxac se no'uen; ca ná'ogue 'neeta'oguit ỹo'meetajlec. ¡Qaica ca ỹo'uet ca ỹa'maqachiguiñi! ¡Ỹaatqajam ñaqai 'ue quet ca 'oonoqui'!

⁴ Qaica ca la'deenataxanaxac na hualoxonyipi, ná'maq ỹahotaque ỹomato na ỹalamaxareteripi, 'ec ca qom ỹa'queetac ca pan, ná'maq se ỹa'xat da leenaxat ñi qara'gaxala'.

⁵ I'loxol ma'le quena lqolonaxa, ma' ñi qota'olec liỹaatac ná'maq na'xaỹaxane'ta ñi'maxare.

⁶ I'neetac dá'maq ỹahotaque na 'xoraiquipi, qam ñi qara'gaxala' ro'ootaxanlec na'maxare.

⁷ ¡Saxanchi' cada quemaralec qa' ladocai Sión chicqojlec ca lca'laxa na llaalqaipi so Israel só'maq liỹa leenaxat da Jacob! Ma' ñi qara'gaxala' ỹadalaxat ca iloxoỹaxane'tegue na lalamaxareteripi, ca' netoon ma'le ná'ogue na lalamaxaret llaalqaipi so'maxare.