Salmos 139 - La'qaatqa ñi qota'olec Qota'olec & Qota'olec Novita Na Qomyipi

Ñi qota'olec ná'ogue ỹa'den

¹ Qami' ỹa'gaxala', qami' ya'ajñisac chaqai ya'yiiñi';

² qami' 'yiiñi' ná'ogue ná'maq so'uet; chaqai ñaq qoỹoqo'ta aỹim chaqa'ma' 'yiiñi' da ỹa'deenataxanaxac.

³ ¡'Yiiñi' naua'que naua ỹouoxoco, 'yiiñi' ná'ogue ná'maq so'uet!

⁴ 'Eno'm saqa' sa'xat ca ỹa'qaatec, qam qami' ỹa'gaxala', shi'gue 'yiiñi'.

⁵ Ỹaatqajam qaica ca idaaqa' nqai'ñi' yahiquinchiriñi; nalojlec nqai'ñi' aỹim da rqai'laxachi'.

⁶ Chalego lecaic dá'maq na'deenaxanaxa ỹaatqajam se sovi'; ¡chalego lishicshi'megue, qaica quet cá'maq ñaquitetaque quiyim sa'den quet!

⁷ ¿Negue' queto' ca saigue, qaiyi qoỹoqo'ta ỹim queso ne'espíritu'e'? Chaqai ¿negue' queto' ca saigue, qaiyi sqo vichiriua'?

⁸ Queta' ỹim saashiguim quena piguim, qai'neeta chaqaiyi viise'e; chaqai queta' sa'ñigui da lauajñi na 'laua, qaiyiita viisa'ñi yi'maxare;

⁹ chaqai quet ñaỹoshiguim, saigue da lqodoigue, loqo'm queta' sena'gue da lqodoc aso huaaxai queda lauashiguim,

¹⁰ qaiyiita ỹovira'oga ỹim queta'le da rqai'laxachi'; ¡qaiyiita da rqai'laxachi' se yayaxanec lo'qootañi aỹim!

¹¹ Loqo'm queta' sahotaque ñañoxotougui na napalaxa, loqo'm ñigui napalaxa ná'maq lauaq coỹaretailec,

¹² na napalaxa se ishit yayoxojñi caqami', yi pe richiichiguiñi 'ec nqai'ñi' yi na'xa'a. ¡Yi napalaxa chaqai yi na'xa'a qaican ỹapaguec caqami'!

¹³ Chaqaiqami' ná'maq 'viichi' na'le ná'ogue na ỹoshicmaxa; 'maxachireta' na'le aỹim quena lauel aca ỹate'e.

¹⁴ Semaqachiñi', ma' 'xoic da i'laxa, ma' chalego la'maxa dá'maq 'viichi'o' na'le. ¡Ca' quedajo, ca ỹaatqajam sa'yiinchigui!

¹⁵ Mesqaida quiyim se re'xogui quet dá'maq lqo'naxac na ỹoshicmaxa, ca dá'maq se re'xogui na' qaya'maxatetegueñi, na' qayo'ueetetac ỹaatqajam spa'ỹaañom quena 'laua.

¹⁶ Naua nqochichi' ỹa'ajansac na ỹoshicmaxa na' na'maxatetecta'; dá'ogue dajo naneretañi hueetalec aca nilliri'i'. Retañite' cá'maq ỹorete' caua na'xata' queda ñachaalataxac na' saqa'leca canchaqaica queda'maxare.

¹⁷ Qami' qota'olec, chalego lecaigue' naua ra'deenataxanaxagohi'; ¡quiyim ima'ta', qaica naloqochin na'maxare!

¹⁸ Quetqai sahotaque ñaloqochin, ca' paguec 'xoic quet quena lo'uaxanaxa; chaqai queta' somat, qam qaiyiita seueto'ot qami'.

¹⁹ Qami' qota'olec, naqachi' da nachaalataxac na hualoxonyipi chaqai ỹoochire'oga caỹim na lauataxanaxairipi,

²⁰ ná'maq se no'uen na ỹa'xatetac caqami', quená'maq ne'laxashiguim, ỹahotaque nco'ỹa'e' qami'.

²¹ Qami' ỹa'gaxala', ¿se yoquii'o' quen ná'maq qami' loquiiaxat chaqai se yqo'ta ná'maq queetapegueu'a qami'?

²² ¡Ỹaatqajam qaica 'nejem da ỹoquiiaxa! ¡Shinta'gue cá'maq ñpa'guenaxaua!

²³ Qami' qota'olec, ya'ajñi', 'yiiñira'a añi i'taxanata; yi'guiñi', 'yiiñira'a da ỹa'deenataxanaxac;

²⁴ ya'ajñi' no'm shiqueta'gue ca se no'uen nayic, ca' yashaxañiri'ñigui ca nayic sqaica lqodoc.