Salmos 137 - La'qaatqa ñi qota'olec Qota'olec & Qota'olec Novita Na Qomyipi

Qoyinto'oto na lachiuguellipi quiyi Babilonia

¹ Na' senqato'oto naua lachiuque quiyi Babilonia, ñoỹenqatac quena' so'leenqataque yi qara'a' Sión.

² Ana nanecse la'llaaxai lasote quiyi na'a' lodegaxat sanqashiguim quen ana qariviiguellipi arpa.

³ Ca ná'maq qomi' la'aquipi, ná'maq rouootaxana'gue cá'ogue cá'maq hueeto'oto qomi', qarashiila quiyim ñitoonqatac, ca' so'ueenaxanaq; ¡so'ueenaxe' naua no'ueenaxanaxaco quiyi Sión!

⁴ ¿Negue' queto' ca 'neeta quiyim so'ueenaxanaq, so'ueenaq ca no'ueenec quiñi qara'gaxala' quenajo ỹoqa'a 'laua?

⁵ ¡No'm sa'laxate qami' Jerusalén, ca' rashivi da iqai'laxat ỹoic!

⁶ Chaqai ñi ỹo'legaxanaxat ronaỹo'ot na ñoquiaq, no'm se so'leenta'a qami', no'm se spa'xanashiguim caqami', Jerusalén, quedá'ogue dá'maq chi ñitoonaxac.

⁷ Qami' ỹa'gaxala', ñaqai o'lliinchira'a so llaalqaipi so Edom, na' noxonec yi Jerusalén, ca 'naiquen: ¡Nopoxoỹaxachiñi, nopoxoỹaxachiñi, vire'ta nqai'ñii yí'maq pa'aañi no'xonaxala'!

⁸ ¡Qami' Babilonia qanopoxoỹaxajñi qami' ma'le! ¡Chalego la'maxa ma'le quecá'maq ỹo'uet ca nouaxanaxashichi' quedá'maq 'ñiteteguelo qomi' na'le!

⁹ ¡Chalego la'maxa quecá'maq iconlec na ñaaqaipioqui' caqami', ca' i'guentalec pataqa'guit nqai'en ana qa'!