Salmos 118 - La'qaatqa ñi qota'olec Qota'olec & Qota'olec Novita Na Qomyipi

Chalego lecaic da lquesaxanaxa ñi qara'gaxala'

¹ 'Ỹaañiỹot da na'aachicyaxaguii ñi qara'gaxala' qota'olec, ma' ñi'maxare huagaxaraic, ma' sqaica lqodoc da le'xorenataxanaxa.

² Na llaalqaipi so Israel 'naiquet: Da le'xorenataxanaxa ñi qara'gaxala' sqaica lqodoc.

³ 'Naiquet na netaxaỹaxanqajanqaipi quiñi qota'olec: Da le'xorenataxanaxa ñi qara'gaxala' sqaica lqodoc.

⁴ 'Naiquet ná'maq imaqachin ñi qara'gaxala': Da le'xorenataxanaxa ñi qara'gaxala' sqaica lqodoc.

⁵ Na' yiuocqotac, ca' soỹaxanot ñi qara'gaxala'; ca ñi'maxare na'xaỹaxañiua', ca nañaañim da iuagaxa.

⁶ Ñi qara'gaxala' iuora; ca qaica quet cá'maq yo'chiitaque. ¿Negue' quet ca 'ne'tegue aỹim ca qom?

⁷ Ñi qara'gaxala' iuora; ñi'maxare yotauantac. ¡Ca' seuana ma'le quiyim loxonqaipi ná'maq noquiaatapiguiỹa'!

⁸ Paguec la'maxa quiyim qaipi'ỹa'a ñi qara'gaxala' quiyim qaipi'ỹa'a quet ca chaqai qom.

⁹ Paguec la'maxa quiyim qaipi'ỹa'a ñi qara'gaxala' quiyim qaipi'ỹa'a quet na nashillipi.

¹⁰ Ná'ogue na ỹoreta'oguit qomyipi yahiquinchiguiñi, qam sahote'e da leenaxat ñi qara'gaxala', ca' ỹoxonqaipi.

¹¹ Ỹaatqajam yaqallichinchiguiñi, qaica ca ỹiguec nqai'en, qam sahote'e da leenaxat ñi qara'gaxala', ca' ỹoxonqaipi.

¹² Nqueuorigui aỹim 'ec na lauoic, qam 'ec na norec quena' ỹovirougui na leesat, chita'gue, ca' no'miñi; ¡qam sahote'e da leenaxat ñi qara'gaxala', ca' ỹoxonqaipi!

¹³ Ỹaatqajam netenegue aỹim yamaxañi, ma' ỹahotaque seuañi, qam novi' ñi qara'gaxala', ca' yotauan.

¹⁴ Ỹim so'uen ñi qara'gaxala', ma' ñi'maxare ỹo'uet da iquesaxanaxa. ¡Chaqai chaqaiñi ñí'maq ica'laxaqui!

¹⁵ Quena la'a' na qamaxaraic qomyipi 'ue na naỹaac qaro'ueenaxantalec da nauegaxanaxac, qohinac: ¡Da lquesaxanaxa ñi qara'gaxala' ỹovirelec quiyim rauegaxan!

¹⁶ ¡Da lquesaxanaxa ñi qara'gaxala' chalego lecaic! ¡Da lquesaxanaxa ñi qara'gaxala' ỹovira'a quiyim rauegaxan!

¹⁷ ¡Se yileu, ta'ta'a quiyim yca'leuec, qaiyi sa'xat dá'maq lo'ueenataxanaxac ñi qara'gaxala'!

¹⁸ Ñi qara'gaxala' chalego lquesaxanaxa da louaxanaxanaxac caỹim, qam sqai ỹaxanegue aỹim quiyim yileu.

¹⁹ ¡Huachiguilo naua lasomi' ana no'ueenaxanaxaqui, ma' sahotaque senoxono, ca' saanot da ña'aachic ñi qara'gaxala'!

²⁰ Chaqaina najo nasom ñi qara'gaxala', ca' chaqaina taatougui ma'le ca qom qamaxaraic.

²¹ Ỹa'gaxala', saanot qami' da ña'aachic, ma' saachichiguito' aỹim, chaqai ma' qami' ná'maq qami' ica'laxaqui.

²² Só'maq qa' lañijnec na 'imec lo'ollipi, ca' chaqaiso só'maq 'auaxaic qailliguiñi caso lasogue so 'imec.

²³ Dajo ỹo'uet ñi qara'gaxala', ca' qomi' chalego da qare'laxa.

²⁴ Chaqaina najo na'xa'a ná'maq quiyim 'ue ca ỹo'uet ñi qara'gaxala': ca' nagui, ca ¡ñitoonqatac chaqai qara'maqachiguiñi!

²⁵ Qouaquiroxoric, qami' qara'gaxala', ¡qarca'laxachirec! Qouaquiroxoric, qami' qara'gaxala', ¡'viichi' quiyim qaicanqaida queda qoyicyaxac!

²⁶ ¡Qaimaqachin cá'maq qom naquetaugui da leenaxat ñi qara'gaxala'! Semaqachinaxe' qamiri quena no'ueenaxanaxaqui quiñi qara'gaxala'.

²⁷ Ñi qara'gaxala', ñi'maxare qota'olec, ¡ñí'maq coỹaretalgoto qomi'! Taañi nqai'ñii ca nemaqachic, 'xachii ana qo'paq lasote, viraxachiỹau'alo naua 'ec lasote ada ncopatoxonaxalate.

²⁸ Saanot qami' da ña'aachic chaqai semaqachin da recaiqui', ma' qami' ná'maq qami' qota'olec caỹim.

²⁹ 'Ỹaañiỹot ca na'aachiguii ñi qara'gaxala', ma' ñi'maxare huagaxaraic ma' da le'xorenataxanaxa sqaica ca lqodoc.