Salmos 110 - La'qaatqa ñi qota'olec Qota'olec & Qota'olec Novita Na Qomyipi

Ñi qara'gaxala' qota'olec ỹaanem da lquesaxanaxa ca nashi

¹ Ñi qara'gaxala' qota'olec 'naac caqami' ỹa'gaxala': Nqa'xañiriñi queda ỹoic, toco' ma' ỹovita quiyim sillo'oto naua qapiaachichi' na npa'guenaxaua'e'ipi.

² Quena Sión ñi qara'gaxala' qota'olec ỹaanem qami' so lashile' hueetagui da lquesaxanaxa, qaiyi 'viiquiñi'sac na npa'guenaxaua'e'ipi.

³ Na ralamaxarichi'ipi nañaanot qami' quiyim qami' lashi queca na'xa'a na' huegaxañi'. Ca' da nenocchishiqui' nqo'neetauec quenaua na'xata', quedaua quemaralgoto qari looỹaco ñi qota'olec, 'ec aca 'ỹa' chicqochigui na lauel añi ra'aasa.

⁴ Ñi qara'gaxala' qota'olec ỹaanec da la'qaatec, ca' se netogot: Nagui, ca qami' netaxaỹaxanqajnec sqaica lqodoc ma' qaretaxaỹa'pegue' aỹim, 'ec na'le so Melquisedec.

⁵ Ñi qara'gaxala' qota'olec hueeta'gue da qatoiqui'; queca na'xa'a ma' ro'o, ca nalauajñi ma'le na nashillipi;

⁶ ỹa'xat cá'maq taachi'ñi ca lasauaxaset ná'ogue na ỹoreta'oguit qomyipi; lapoonñi ma'le na leuaxaiquipi; ¡co'ueetapigui na lqahigoripi quená'ogue na 'laua!

⁷ Ca' queso llicyaxac, ca' ni'chigui na huaxaỹaq quena ñaachi, ca ná'maq huaxaỹaq, ca' ỹo'uet da dalaxaic lquesaxanaxa.