Salmos 104 - La'qaatqa ñi qota'olec Qota'olec & Qota'olec Novita Na Qomyipi

Qaimaqachintac ñí'maq lo'ueenatec ná'ogue nanchaqaina

¹ ¡Semaqachin ma'le ñi qara'gaxala' quedá'ogue da ñachaalataxac! ¡Chalego dá'maq recaiqui', qami' ỹa'gaxala' chaqai qota'olec caỹim! Ỹaatqajam ñi'sañi da necaic chaqai da nauaq;

² lepachisagui da lauaq 'ec napoxogui'i'. ¡Qami' piguiñirec na piguim, 'ec nqai'ñi' ca napoxonaxat!

³ ¡Qami' 'yirelgoto na huaxaỹaq caua nojnaxal ca qauochi' queda pa'aashiguim! Ñigui rahoglena'e' nqai'ñi' na naueguelec; ¡ca' quiyim qui', ca ñiisalgoto naua laua' na nonot!

⁴ Na nonot chaqaina na ra'qaataxanqajanqui', chaqai relaataxahi' naua norqa lauaxa'.

⁵ Ñi'ralec na'le ca lomala' na 'laua, qaiyi qaica ma' reda quet.

⁶ Na lishiguiñi ana huaaxai ỹapootalec na 'laua, 'ec aca neloxoqui. Na huaxaỹaq ỹapolec ana quemaralec qa' ladocai.

⁷ Qam qami' relaqaita, ca' eec; chaqa'ma' 'eet na' 'xaỹaque da qavilli', 'ec soxonaxa.

⁸ Quelgoto naua quemaralgoto qa' ladocahi, chaqai qui'ñiguilo naua ca'meguelo, ca quepegue' ná'maq loma' 'ñirapega quiyim hua'ñi,

⁹ se napacalec ná'maq lqodoquiaqa' nqai'ñi', qaiyi tot liỹa ỹapolec na 'laua.

¹⁰ Qami' lachi' na huaxaỹaq chicqañi quiyim ne'paxantashiguim, qaiyi que'uegue ana lachiugue, ca' queuguilo naua quemaralgoto ladocahi,

¹¹ Ca' na huaxaỹaq chaqaina na ne'teetapigui na iseripi neuec; ca' chaqaina na nomat na laquip na lolgaqaipi.

¹² Quena lahi na lachiuguellipi ỹo'uet na lco'viichaxaqui na qo'oollipi; ¡ca' quiyi, ca' noỹentac neetaguilo naua lasote ana qo'paq!

¹³ Chaqai qami' ná'maq cochiiseguelgoto naua quemaralgoto qa' ladocahi, viise'e ca ra'aachi' queda piguim; ca quená'maq ỹaxat chicqo'ot na piguim, ca' ỹaatqajam huaquichiguiñi nqai'ñi' na 'laua.

¹⁴ Ca' ñaxat nqai'ñi' na 'uaqapi, vi'raque loq na iseripi, chaqai ana nanecse quiyim qoỹanñi quena qomyipi, qaiyi 'ue ca loq, ỹachigoxotaugui na lanec quena 'laua,

¹⁵ ca loq, qaiyi 'ue ca lquesaxanaxa, chaqai 'uva li'i, qaiyi netoon da nachaalataxac, ca ỹo'uet quiyim nenoqouec na lashic 'ec na'meentapigui ca 'aceite.

¹⁶ Nomat na laquip ana qo'paq, leenaxat cedro na'ñi yi Líbano, ná'maq lanecse ñi qara'gaxala'.

¹⁷ Na'maxare co'viichigui ana qo'oole paguec cocho'lli', ca' ana qo'paq pino, ca' co'viichigui na damqaipi.

¹⁸ Ana quemaralec qa' ladocai qaỹauaaque loma' ana qagreta neuec, ca ná'maq qa'ipi, ca' chi lauaquiaxaqui ana nesoxona late'e.

¹⁹ 'Viichi' ñi shiraigo, qaiyi qanaloqochine' naua na'xata'; añi ra'aasa ỹa'den ma' lagui inoxonñi.

²⁰ Ca' piguiñirec na lapalaxa yi pe, quena'le, ca' nenoxonec na iseripi quena 'oochi.

²¹ Na sauaxaic leta'a ronoqotaque ca letoc; ỹashiilatac ñi qota'olec quiyim ỹa'ue ca loq.

²² Qam quena' nenoxonshiguim añi ra'aasa, ca eec, nenanñi quenaua lauaco.

²³ Ca' eec na qom ro'ueenataxan, ca ro'ueenataxantac, chi ỹovireta'a inoxonñi añi ra'aasa.

²⁴ ¡Ỹaatqajam 'xoic na ro'ueenachiqui', qami' ỹa'gaxala'! Ná'ogue na'maxare chicqochigui da ra'deenaxanaxa'e'; ¡ná'ogue na 'laua no'qajlec quená'maq ro'ueenachiqui'!

²⁵ Ca' yí hueeta'ñi aso huaaxai, ỹaatqajam chalego lecaic chaqai da leca'gue, chaqai chalego na isecỹac hueetañigui, tot qaishit qanaloqochin, 'ue na cocho'qui' chaqai na lodegaxat;

²⁶ ca' ana qom lahi' huaxaỹaqse quiñigui yi'maxare, ca qai'neeta hueetañigui so Leviatán, só'maq isecỹac lodegaxat 'viichi', qaiyi hualaxaisa'pegue' so'maxare.

²⁷ Ná'ogue na'maxare naquiteta'a qami' quiyim ma' ỹovita ca laloqo', ca' vite ca loq.

²⁸ Qami' 'ỹaañitem, ca' na'maxare lapoon; huachirigui ana napoquena'e', ca ỹa'maqachiguiñi quema';

²⁹ no'm 'xochiriñi na qashiiqui', ca na'maxare no'chi; ca no'm huootaxañira'gue na lacat, ca' ileu, ca' lotqai pilligui quiyim 'laua.

³⁰ Qam no'm nelachi' ca racachi', ca nca'leuec. Ca' chaqaida 'neeta quiyim dalaxachi' na lauat na 'laua.

³¹ ¡Da lauaq ñi qara'gaxala' sqaica lqodoc! ¡Ñi qara'gaxala' netoonegue na lo'ueenatec!

³² Na 'laua i'loxol quena' ra'ỹa'a ñi'maxare; ¡chaqa'ma' nichiiuec ana quemaralec qa' ladocai quena' qaipootau'a quiñi'maxare!

³³ Quiyim ñaqa 'ue aỹim yca'leetauec, so'ueenta'pe naua no'ueenqa quiñi ỹa'gaxala' chaqai qota'olec caỹim.

³⁴ Saxanchi' nqo'talo naua ỹa'deenataxanaxaco ñi qara'gaxala', ma' qaiñiita ỹo'ueetetac da ñitoonaxac.

³⁵ Ca' ¡ỹaatqajam co'tejlec ma'le na 'laua quena sauaqhuaiquipi! Chaqai ¡tot qaica na hualoxonyipi! ¡Semaqachin ma'le ñi qara'gaxala' quedá'ogue da ñachaalataxac! ¡Ca' ỹaatqajam sqaica lqodoc qaimaqachintac ñi qara'gaxala'!