Salmos 103 - La'qaatqa ñi qota'olec Qota'olec & Qota'olec Novita Na Qomyipi

Semaqachin ma'le ñi qara'gaxala'

¹ Semaqachin ma'le ñi qara'gaxala' qota'olec quedá'ogue da ñachaalataxac; semaqachin ma'le quedá'ogue da shinta da co'teeta leenaxat.

² Semaqachin ma'le ñi qara'gaxala' quedá'ogue da ñachaalataxac; se scoua'ahi naua lqouagaxaco caỹim.

³ Chaqaiñi ñí'maq sqai caapeguem ná'ogue na se no'uen so'ueetetac, ñí'maq ỹomaterec naua'que naua i'neete',

⁴ ñí'maq nca'laxatec da ñachaalataxac queda nelauaxa, ñí'maq ỹomatalec aỹim da le'xorenataxanaxa chaqai yineequesenta,

⁵ ñí'maq ỹomataỹot ná'ogue ná'maq paguec na loyac chaqai yadalaxateta 'ec nqai'en aỹim ca o'ic.

⁶ Ñi qara'gaxala' ỹaatqajam llic iuejlec ná'maq hueetaugui da nqa'viic.

⁷ Ñi'maxare ỹachaxan na'le na nayiquipi chaqai na lo'ueenatqaipi queso Moisés chaqai so llaalqaipi so Israel.

⁸ Ñi qara'gaxala' isoteta da lqouagaxa; hualaxauaic chaqai imaañi ne'xorenataxanaxa.

⁹ Mesqai naua'que naua na'xata' nelaqatapegalo qomi', chaqai mesqaida quiyim se neme quet ca lauel coqomi';

¹⁰ se ipacqajñigui cá'maq ỹaatqajam qanouaxanaxaset quet quenaua qareualoxonqaishico chaqai naua qarasauaxasete';

¹¹ chalego lecaic dá'maq le'xorenataxanaxa quená'maq imaqachin ñi'maxare, da'maxare 'ec paguec lishicshi'megue quena piguim quena 'laua.

¹² Ỹoỹoote'ogalo naua qarasauaxasete' coqomi', 'ec na' ỹoỹojchi da lqodoigue queda lauashiguim.

¹³ Ñi qara'gaxala' ineequesenta ná'maq imaqachin ñi'maxare, 'ec ca neta'a quiyim ineequesen ca llaalec;

¹⁴ ma' ñi'maxare ỹa'deenta cá'maq ỹachigoxotauguilo qomi' na' qaro'uet: ñi'maxare ỹa'deenta quiyim sachigoxosqaugui na 'laua.

¹⁵ Da nachaalataxac na qom 'ec ana peue; renohi 'ec aca peue quena no'ueenaxa:

¹⁶ ỹaatqajam sqaỹaloq ỹasoxot na nonot, ca' qaica cá'maq qaỹa'den caca'maxare.

¹⁷ Qam da le'xorenataxanaxa ñi qara'gaxala' qaica ca lqodoc quená'maq imaqachin ñi'maxare; qaica ca lqodoc dá'maq no'uen lo'ueenataxanaxac, ỹovira'oga ná'maq co'uaataxanaxaic qomyipi,

¹⁸ quená'maq ỹomachichigui dá'maq na'maqataxac chaqai se coua'ahi naua naqataxaco.

¹⁹ Ñi qara'gaxala' neeta'gue nqai'en da piguim ca nqa'xanqa' quiyim nashi, ca' da lo'ueenataxanaxac ỹoiquentac ná'ogue nanchaqaina.

²⁰ ¡Maqachiñii ñi qara'gaxala', qamiri nelaatqaipi piguim laseripi! Qamiri ma' 'viichii' nauá'maq qaramaxailgoto, qamiri ma' na'maxachitañi quiyim na'xaỹaxañita.

²¹ ¡Ỹaatqajam qaimaqachin ñi qara'gaxala' quená'ogue na nalliripi, ná'maq mashic ro'ueenataxantacot chaqai mashic ỹo'ueetetac dá'maq ỹahotaque ñi'maxare!

²² ¡Maqachiñii ñi qara'gaxala' ná'ogue ná'maq lo'ueenatec, ná'ogue ná'maq hueeta'ñi ná'maq ỹoiquentac ñi'maxare! ¡Semaqachin ma'le ñi qara'gaxala' quedá'ogue da ñachaalataxac!