Salmos 1 - La'qaatqa ñi qota'olec Qota'olec & Qota'olec Novita Na Qomyipi

Dá'maq ỹaatqajam na'maxa

¹ Chalego la'maxa queca qom quiyim sqai que'uegue na lapaxaguinataxanaxac na hualoxonyipi, chaqai se naỹa'a da 'neetari' na sauaqhuaiquipi, chaqai se ỹalecau'a cá'maq i'neetac ñi qota'olec;

² ta'ta'a quiyim ỹaatqajam nqo'ta na laqataxaquipi ñi qara'gaxala', chaqai napaxaguintapegalo quiyi na'xa'a chaqai yi pe.

³ Cajo qom 'ec aca qo'paq neeto'ot na lahi aca lachiugue, ca' se napacalec yi laloqo' quiyim 'ue aca la chaqai se ỹaso ana laue. ¡Chaqai quená'ogue ná'maq ỹo'uet ỹaatqajam ỹa'maqachiguiñi!

⁴ Qam quena hualoxonyipi mesqai 'neeta dajo, ma' na'maxare 'ec na 'uaqapi qai'xat quena nonot.

⁵ Vichiguiño' na hualoxonyipi se qaicoñiguit ma' ime qaimit, ca' na sauaqhuaiquipi se ỹalliguiguit nqohin na 'maxataxaraiquipi.

⁶ Ma' ñi qara'gaxala' qota'olec netela'a da llicyaxac na 'maxataxaraiquipi, qam da llicyaxac na hualoxonyipi taata'a quiyim na'laañi.