Romanos 4 - La'qaatqa ñi qota'olec Qota'olec & Qota'olec Novita Na Qomyipi

Qaraloqojnaxañigui so Abraham

¹ Ca' qomi' shinqaco': ¿Negue' cá'maq lauegueco' na'le so Abraham, só'maq 'auaxaic qareta'a?

² Ma' quiyim so'maxare ỹaatqajam qaỹa'maxarenta quiñi qota'a chicqochigui cá'maq canchaqaica ỹo'uet, ca 'ue quet cá'maq 'em quiyim nemaqajan, qam mesqai quiyim nemaqajan quiñi qota'olec.

³ Qam ¿negue' ca 'nerac naua nerecse' na'qaatqa? 'Nerac: “So Abraham 'uo' da lpi'ỹaxac quiñi qota'olec, ca' quedajo lpi'ỹaxac, ca' ñi qota'olec icoñi'chiguit, ca ỹamata'gue lo'yaxanec ỹale.”

⁴ Ca vichiguiño' quiyim no'm 'ue ca qom 'ue ca ỹo'uet, mesqai 'ec neme ca nishiuetenaxac, ma' chi qaishiueten ca laseue' ca lo'ueenataxanaxac.

⁵ Qam no'm 'ue ca qaica ca ỹo'uet, qam huelec ñi qota'olec quiyim icoñi'chiguit ca sauaqhuaic, ca' ñi qota'olec icoñi'chiguit ca'maxare, ma' 'ue da lpi'ỹaxac.

⁶ Chaqai so nashi David qai'neeta ỹa'xat na'le da la'maxa ca qom qaỹamata'gue lo'yaxanec ỹale quiñi qota'a, se ra'iitapigui cá'maq 'neeta ca ỹo'ueetetac.

⁷ Ca 'naaco' so David: Chalego loyac ma'le cá'maq qomyipi quiyim ñi qota'a ỹapalaxat ná'maq ỹo'ueetetac se no'uen, chaqai se ra'igui na lasauaxaseteripi.

⁸ Chalego loyac queca qom quiyim ñi qara'gaxala' se ra'igui na lasauaxaseteripi.

⁹ Ca' dajo na'maxa ¿peeta'a qainaata na 'ue na netanec na loshicmaxa taỹaugui, loqo'm taỹaugui qai'neeta ná'maq qaica ca netanec? Shi'gue shinqac quiyim ñi qota'a icoñi'chiguit so Abraham, ca ỹamata'gue lo'yaxanec ỹale, ma' 'ue da lpi'ỹaxac.

¹⁰ Qam ¿laquio' na' icoñiguit? ¿Na' ime quiyim so Abraham mashic qaỹa'ue so netanec na loshicmaxa, loqo'm na' saqa'leca? Mesqai na' mashic 'ue so netanec. 'E', ta'ta'a quiyim na' saqa'leca so netanec.

¹¹ Ca co'na' ime, ca' so Abraham qaỹa'ue so netanec na loshicmaxa, ca 'ec chi netanec quiyim ñi qota'a mashic icoñi'chiguit, ca ỹamata'gue quiyim no'uen ỹale, ma' 'ue da lpi'ỹaxac. Ca co'na' 'neeta dajo, ca' so Abraham chi ỹovireta'a quiyim qai'neeta leta'a ná'ogue ná'maq 'ue da lpi'ỹaxac, 'eno'm sqaica ca netanec na loshicmaxa. Ca' ñi qota'olec icoñi'chiguit qai'neeta na'maxare, ca qai'neeta ỹamata'gue lo'yaxanec ỹale.

¹² Qam llic quiyim so Abraham leta'a ná'maq 'ue na netanec na loshicmaxa. Qam qai'neeta quiyim quiichi'ñigui chaqai ipacqajanchigui dá'maq lpi'ỹaxac só'maq qareta'a Abraham na' saqa'leca so netanec na loshicmaxa.

Ipaquichigui dá'maq shi'gue qaỹachaxantac, qam chicqochigui nqohin da npi'ỹaxac

¹³ Ma' ñi qota'a ỹachaxan na'le dajo queso Abraham chaqai quena llaalqaipi quiyim qoỹaanem ma'le na 'laua quiyim lalamaxaret la'a'. Qam na' qaỹachaxanapeguem dajo so Abraham, mesqaida quiyim ỹo'ueetetaiquet dá'maq 'naac na naqataxaquipi, ta'ta'a quiyim 'ue da lpi'ỹaxac quiñi qota'olec. Ca' ñi'maxare icoñi'chiguit, ca ỹamata'gue lo'yaxanec ỹale.

¹⁴ Ma' quetqai qainaata ná'maq ỹo'ueetetac na naqataxaquipi icoñiguit cá'maq qaỹachaxantac, ca qaica quet cá'maq 'negue da npi'ỹaxac, chaqai dá'maq ỹachaxantac ñi qota'a na'laañi quet da loyac.

¹⁵ Ma' ná'maq naqataxaquipi ỹo'uet ca nouaxanaxaset na qomyipi; qam cá'maq hua'ñi quiyim qaica ca naqataxac, qai'neeta qaica quet cá'maq napacalec ca naqataxac.

¹⁶ Ca vichiguiño' quiyim dá'maq qaỹachaxanem so Abraham quiyim qai'taxajñi taỹaugui nqohin ná'ogue na llaalqaipi quiyim neme, qam chicqochigui nqohin da npi'ỹaxac. Ca da'maxare 'neetasa': quiyim dá'maq qaỹachaxantac mesqainaata ná'maq ỹo'ueetetac na naqataxaquipi, ma' qai'neeta ná'maq huelec ñi qota'a 'nejem so Abraham ma' huelec ñi'maxare. Ca so'maxare ỹovira'a quiyim qomá'ogue qareta'a

¹⁷ quiñi qota'a, ma' so'maxare qai'neeta huelec ñi'maxare. Ma' 'nerac naua naneresañi na'qaatqa: “Aỹim so'uet quiyim qami' leta'a na 'xoic ỹoreta'oguit qomyipi.” Ma' ñi qota'olec ỹa'ue da lca'laxa ná'maq mashic ileu, chaqai re'oq nqai'en ná'maq saqa' re'oq.

¹⁸ 'Eno'm mashic tot qaica ca naquitaxac, qam so Abraham huelec ñi qota'a, chaqai 'uo' da naquitaxac. Ca vire'to' na' “'xoic na ỹoreta'oguit qomyipi leta'a so'maxare.” Ca ipaquichigui dá'maq 'naaco' na'le ñi qota'a: “Ca 'eda 'neeta quiyim ỹorete' ma'le ca qachaalaxai'pi.”

¹⁹ So Abraham se naqaguiñi da lpi'ỹaxac, 'eno'm mashic ipalata'pegueto caua cien ñaxari, chaqai ỹa'deenta quiyim so'maxare chaqai aso loua Sara tot qaỹaloq ileue', mashic qo'xoiqam quiyim 'ue quet ca llaalegue'.

²⁰ Qam so'maxare qaica ca huapigui na lauel, chaqai se ỹoqolliguit dá'maq ỹachaxantac ñi qota'a. Ta'ta'a quiyim nqo'neuec da lpi'ỹaxac chaqai da naquitaxac. Ca' imaqachintac ñi qota'a

²¹ quiyim ỹaatqajam i'taxachichiguiñi quiyim ñi'maxare 'ue da lquesaxanaxa quiyim ỹo'uet ipacqajanchigui dá'ogue dá'maq ỹachaxantac.

²² Ca' quedajo, ca' ñi qota'olec icoñi'chiguit, ca ỹamata'gue lo'yaxanec ỹale, ma' 'ue da lpi'ỹaxac.

²³ Ca' quedajo quiyim ñi qota'olec icoñi'chiguit ca ỹamata'gue lo'yaxanec ỹale ma' 'ue da lpi'ỹaxac, mesqaisoota so Abraham só'maq 'em qoỹiriñi dajo.

²⁴ Qoỹiriñi, qam qai'neeta taỹauguilo qomi'. Ma' quedá'maq qarpi'ỹaxac, ñi qota'olec icoñi'chiguita qomi' qai'neeta, ca ỹamata'guelo qomi' lo'yaxanqa ỹale'. Ma' mashic seuaqlec ñí'maq nca'laxatec na'le queso lelauaxa so qara'gaxala' Jesús,

²⁵ só'maq qoỹaañiguit da lelauaxa sauaxat na qarasauaxaseteripi, chaqai liỹa qanca'laxatec, qaiyi icoñi'chiguita qomi' ñi qota'olec.