Proverbios 31 - La'qaatqa ñi qota'olec Qota'olec & Qota'olec Novita Na Qomyipi

Naua la'qaatqa so Lemuel

¹ Nauajo naua la'qaatqa so nashi Lemuel na'ñi yi Masa nauá'maq lapaxaguinataxanaxaco aso late'e, 'neetasa':

² Qami' ỹaalec, chicqoiraugui na iuel, qami' lopilaxaset da ỹashiilaxanaxac quiñi qota'olec, ¿negue' queto' ca liỹa shinac caqami'?

³ 'Neeto' 'ỹaañisapeguec da rquesaxanaxa'e' quena 'aallipi, ma' da'maxare na'laxatañi quen na nashillipi.

⁴ Qami' ỹaalec Lemuel, se ỹa'maxañi quiyim ca nashi chaqai na'gaxala' ne'et quena lataxa chaqai na quesaxan lataxa,

⁵ ma' sqoue coua'e da naqataxaquipi chaqai se ipacqajñigui quiyim qoshiilec na 'xoraiquipi.

⁶ 'Xañiriñi na lataxa chaqai na lataxa quesaxanaxaic, na'maxare ta'chiguit ca qaica ca la'ñaxac chaqai rachicota;

⁷ ¡le'neetari' ñaq ne'et, qaiyi tot ỹo'leenta'a da le'xoric chaqai da lachitachic!

⁸ Nelamaxariñi', taalec nqai'ñi' ná'maq tot qaica ca lelamaxa; ¡'ootaxañirelec ná'maq qaica ca ro'ootaxanlec!

⁹ Nelamaxariñi', 'ootaxañirelec; ¡'viichi' ca ỹa'maqachiguiñi quená'maq qaicanqaiyi 'xoraiquipi!

Qaimaqachin acá'maq no'uen 'aalo

¹⁰ Aca no'uen 'aalo 'xoic lqalaic quiyim qaỹanata; ¡paguec lesega'a queca qa' lo'yaxanec 'ueetaxat!

¹¹ Cá'maq loua ỹaatqajam pi'ỹa'a aca'maxare, chaqai se ỹauanapega quiyim qaca quet aca lauegue.

¹² Ỹaatqajam ỹa'maqachigui lauel nqai'en ca loua quenaua'que naua na'xata' quiyim ñaq nca'leetauec.

¹³ Eec idaanaque na qagreta laue chaqai na noshite, chaqai nemeeten ỹo'uet na no'xonec.

¹⁴ Mashic 'ec aca qom lahi' quiñigui na huaxaỹaq, qoỹoqo'tegue na ỹachigoxota'gue na na'ic.

¹⁵ Quena' saqa' richiguiñi, ca' ne'laxashiguim, ca' ỹa'ue na loq na llaalqaipi chaqai ana lelaatallipi.

¹⁶ 'Au ỹa'ajanta ca 'laua, ca' rishiujnaxana, ca caná'maq lo'ueenataxanaxac laseuete, ca' ỹanñi ca 'uva loma'.

¹⁷ Dala'chiguit da lquesaxanaxa, ca na'ñaxat ro'ueenataxan.

¹⁸ Ỹaatqajam ỹa'maxate'tegue da lashivichaxac na lemeenec, chaqai vire'ta pem, qam ñaq ro'ueenataxantac.

¹⁹ Quenaua chi lqai'laqate', ca' raqaletenaxan chaqai ro'xonaxan.

²⁰ Ỹaatqajam se coua'e quiyim ỹotauan ca 'xoraic chaqai ná'maq 'ue ca louenaxanaxa.

²¹ No'm loñi, qam qaica huapigui lauel, ma' na llaalqaipi pa'ỹaxaraic na looỹac.

²² Chaqaca nodajlec ỹo'ueete' naua le'laalqo, chaqai ỹantegueñi ná'maq no'uen nooỹac.

²³ Ca loua ỹaatqajam qaỹa'deenta queca na'a' lodegaxat, chaqai ỹalequetaugui nqohin ná'maq qaimaqachin queca 'laua neetalec.

²⁴ Aca'maxare ỹo'uet ana loxoqui chaqai na saataxaqui, ca' imeenot na nemeenaxaiquipi.

²⁵ Ca' nqo'neuec da lquesaxanaxa chaqai qaimaqachin, chaqai sqaica huapigui lauel quenaua lichico naua naasaho na'xata'.

²⁶ Quena' retaqa, qam ỹa'den dá'maq ỹa'xat, quiichigui nqai'en da le'xorenataxanaxa da lapaxaguinataxanaxac.

²⁷ Ỹaatqajam ỹa'ajanta dá'maq 'neetari' ca la'a', chaqai se ỹa'ic cá'maq se laseue' cá'maq lo'ueenataxanaxac.

²⁸ Ca llaalqaipi chaqai ca loua imaqachine', ca 'nerac:

²⁹ Ná'maq no'uen 'aalo 'xoic, qam qami' paquirauec caná'ogue.

³⁰ Da la'maxa ca 'ueenataxac rayinaxan, da noyac imeuo, qam aca 'aalo acá'maq imaqachin ñi qara'gaxala' qota'olec, chaqaca ta'chiguit quiyim qaimaqachin.

³¹ ¡Maqachiñii quená'ogue na qomyipi! ¡'Xachitac dá'ogue dá'maq lo'ueenataxanaxac!