Proverbios 30 - La'qaatqa ñi qota'olec Qota'olec & Qota'olec Novita Na Qomyipi

Naua la'qaatqa so Agur

¹⁵ Na pit dos naua llaale, qaica ca liỹa ỹa'deene', qaidaata da lashiilaxanaxague'. 'Vii naua tres chaqai ỹovite' cuatro quiyim se ỹauanapega 'nerac: ¡Yi, nalootañi!:

¹⁶ ca napal lahi', aca 'aalo se co'o, na 'laua quiyim ỹouen ca huaxaỹaq, chaqai ca norec ỹouen ca lasoc.

¹⁷ Cá'maq se nqo'ta ca leta'a quiyim ra'iito'ot chaqai ca i'neetac aca late'e quiyim qo'xoỹom, paguec la'maxa quiyim qaỹa'gue' naua nqote' queca ratecsan chaqai qaỹa'ic queca o'ic.

¹⁸ 'Vii naua tres chaqai ỹovite' cuatro nauá'maq ỹo'ueete' da i'laxa chaqai quiyim se sa'deene':

¹⁹ ca llicyaxac ca o'ic quena piguim, ca llicyaxac ca nanaic quena qa', ca llicyaxac aca qom lahi' huaxaỹaqse cana huaaxai, chaqai ca llicyaxac ca ỹale caca 'aalo.

²⁰ Aca 'aalo nanatqa lo'o' 'neetasa': que'e, ca' quiỹogui na lap, ime, ca' 'teetegueñi 'naac: Qaica ca so'uet se ỹa'maxañi.

²¹ Tres lashiigo' na qom, chaqai ỹovi' cuatro, quiyim se qanalo'guit chaqai i'loxol nqai'en cá'maq 'laua neetalec:

²² ca nelaatec ỹovirau'a quiyim nashi, ca sqailligueme' nachinñi quiyim 'xoic ca loq,

²³ aca 'aalo naqaicqate quiyim 'ue ca loua chaqai aca nelaata quiyim pa'aalec ca loma' aca na'cooro.

²⁴ 'Vii naua cuatro iserolqai' quena 'laua quiyim paguec la'deenaxanqa' queca 'deenaxanqachaqaiquipi:

²⁵ na chinaq, chalego lecai alliripi qaica ca lquesaxanaxa, qam ỹa'maxat na loq quiyi nosaxa;

²⁶ ana nesoxona late'e mesqai 'xoic, qam lauaquiaxaqui ana qa';

²⁷ ana piñai qaica ca lashi, qam lapo'ojta' quena' eec;

²⁸ na lecolaxaraic ná'maq nalootagui ana poquena, qam ỹovirau'a ca lauo' lodegaxat ca nashi.

²⁹ 'Vii naua tres 'ñaaxaqa, chaqai ỹovite' cuatro, lo'yaxanec da louoxogue':

³⁰ na sauaxaic leta'a ná'maq isecỹac paguec lichic, qaica ca 'eetapeguem chaqai qaica ca no'cha'a;

³¹ ca huaqa'e nemaqajnaxai, ca quetaq loua' chaqai ca nashi 'auetauec queca nalliripi.

³² No'm vi'saque ca chi remaqachiqui' chaqai 'ue ca na'deenaxaqui' se ỹa'maxañi, nolli'ralta', ca 'deenataxañi'sac

³³ quiyim no'm ni'ỹa'ichiriguilo caua lo'i', ca nenoxonec na ra'ñi'ijta', no'm paguec lamaxachirigui na rimiqui', ca' toca'a ma'le, chaqai no'm 'ooqochichi' ca liỹa, ca ỹovireto'o' ma' nco'ua'ire'e'.