Proverbios 25 - La'qaatqa ñi qota'olec Qota'olec & Qota'olec Novita Na Qomyipi

Liỹa' la'qaatqa so Salomón

¹ Nauajo qai'neeta la'qaatqa so Salomón qoỹeretañi queso qomyipi lelaatqaipi so Ezequías, nashi quiyi Judá, 'neracsa':

² Da lecaic ñi qota'olec hueetagui nqai'en ca se re'xogui, chaqai nemaqajnataxanaxa quena nashillipi quecá'maq ỹovirau'a ỹa'xat ca'maxare.

³ Da lishicshi'ma na piguim, da lishigui'ña na 'laua chaqai da la'deenataxanaxac na nashillipi, da'maxare se qaique'guenejlec qaỹovira'a qaỹa'den.

⁴ No'm qanaqat na lishile na lecat plata, ca cá'maq ỹo'ueetac na'maxare ishit ỹo'uet aca 'taxaqui;

⁵ Se ro'ueenataxanot nqohin ca nashi ca hualoxonaq, ca' 'chiñi ma'le da lelaataxanaxac queda ỹa'maqachiguiñi.

⁶ 'Neeto' 'ec 'ue ca 'ñitegue quiyim loqoisa'guit ca nashi, chaqai 'neeto' 'iri'ñi ca loma' ca qom qaimaqachin;

⁷ paguec la'maxa quiyim qohinac caqami': Nochirishiguim quenajo, quiyim qarenotaxanaxanec qami' quiyim loqoisa'guita caua nashil leta'al. Cá'maq huañichirigui quenaua nqochichi'

⁸ mesqai chaqa'ma' do'ira'a ca nimiitaxanqa' quena nasauaxaset, ma' sqoue ca liỹa ỹoqa'a ca 'naac, ma'le, ca' sqa 'yiiñi' ca 'ñiite'.

⁹ Taqaisa'guit nemaqaire'e' cá'maq 'ue ca pataqateguelec qami', qam sqai choxochi' cá'maq ỹoqa'a se re'xogui qoỹoxotetañi;

¹⁰ ma' sqoue ca 'qaatapega qami', ca' rayilqochichi', ca' qaica lata' da se no'uen na'qaataxaqui'.

¹¹ 'Oonoqui' ca ra'qaachiqui', qam 'maxaraic quiyim ỹaatqajam chaqaica qaỹouentaque, 'ec aca nadenqata manzana imaañi 'oro 'ue na no'ueetaxat plata.

¹² 'Ec aca nichicshaqate chaqai aca nqola chicqaugui ná'maq no'uen 'oro, ná'maq paguec loyac napaxaguinataxanaxac quecá'maq ỹa'den icoñi'chiguit.

¹³ Cá'maq qamaxaraic na'qaataxanqajnec quecá'maq nelaatqo', 'ec ca lo'oomaxa aca loñi queca npa'iiñi na'xa'a, ma' ỹadalaxat da na'ñaaqataxac cá'maq na'co'.

¹⁴ Naueguelec chaqai nonot, qam qaica ca ỹaxat, 'ec ca qom 'naac 'ue ca ỹaan, qam se ỹauanapega ipacqajñigui.

¹⁵ Da la'ñaxac neuel taauec nqai'en ca nonogoxonaxac; naua ỹolaauete' na'qaatqa iuagaxatac ca neuel.

¹⁶ No'm huañiterelec ca rapic li'i, 'neeto' paguelec ca 'qui', ma' no'm 'xoic ca 'qui', ca' sqoue resalli'.

¹⁷ No'm 'piichira'a ca nauochaxaua'e', qam 'neeto' sqai 'migui nqai'ñi', 'ase' no'm neuala'a qami', ca noquii'raxaua'.

¹⁸ ¡'Ec pon, lecat, novic shitaxaraic, cá'maq na'majan 'naac quiyim se no'uen ca 'ñiisari' queca nauochaxaua'e'!

¹⁹ 'Ec qagaxaic ca liỹa richi'i' loqo'm qui'ỹaxañita aca lasooxoi rovi'i', 'ec quiyim qaipi'ỹa'a ca se ỹaqamaq quiyim 'ue ca reuogoxo'e'.

²⁰ Qaro'ueenaxanlec aca ne'taxanata 'ue ca leuogoxo, 'ec qaỹocorigui aca ne'neete queca lataxa lochiviaxaic, loqo'm qanaqate' caua noho quiyim 'xoic ca no'oomaxa.

²¹ No'm qopat ca npa'guenaxaua'e', ca qui'ỹaxañi'; chaqai no'm ỹalauat laquip, ca ne'taxañi';

²² ca' queda, ca' ỹoqa'a nqai'ñi' na lashic quena layiloxo, ca' ñi qara'gaxala' rishivichiñi' ma'le.

²³ Quena nonot chicqa'gue da rapiguim chicqaugui na ỹaxat, chaqai naua se no'viiñi na'qaatqa chicqochigui da se no'uen nashicyaxac.

²⁴ Paguec la'maxa qoyintau'e na lahi ca 'imec lelaq, qam mesqai quiyim qoyintaugui ca 'imec lodegaxat, qam loquiaxai aca na'aalo'e'.

²⁵ 'Ec na 'oom huaxaỹaq queca qom ỹalauat laquip, ca' chaqaida 'neeta da no'uen na'xaỹaxac qoỹoqo'tegue ca chicqa'gue.

²⁶ 'Ec ne'paxantashiguim na icolqata huaxaỹaq, ca' chaqaida 'neeta cá'maq qom huagaxaraic i'loxol quiyim reloqota'guit ca hualoxonaq.

²⁷ Se no'uen quiyim 'xoic ca qaỹa'ic quena rapic li'i, qam chalego loyac quiyim qaimitaque ca leloxoỹaxac ná'maq 'xoic ca lqalaic.

²⁸ 'Xoic na lichic ca qom se ỹa'den nollaalta' queda no'ueenataxac, 'ec ca na'a' lodegaxat qaica ca lquepaqataxanaxat.