Proverbios 24 - La'qaatqa ñi qota'olec Qota'olec & Qota'olec Novita Na Qomyipi

—19—

¹ Totaxan pa'guiñi'sac na hualoxonyipi, chaqai sqai viisaque quiyim qauora'e',

² ma' qaica ca liỹa ỹa'deenapega, qaidaata da lqa'viic, chaqai qaica ca liỹa ỹa'xat, ta'ta'a quiyim ỹo'uet ca se no'uen.

—20—

³ Da na'deenaxanaxa chicqochigui quiyim qano'xonshiguim ca 'imec, ca' queda nco'ỹaxaric, ca qaỹo'viijñi ca no'xonaxala';

⁴ ca' queda na'deenec, ca qaiỹoxouguilo caua 'imqa quena nouenec qoỹoqota'a chaqai lo'yaxanec.

—21—

⁵ Paguec la'maxa ca qom 'deenaxanqachaqaic queca qom quesaxanaxaic; paguec la'maxa ca na'deenec queca nquesaxanaxa,

⁶ ma' ca lauataq qaỹo'uet, qam 'au qana'yiinchigui qana'maxachichigui, chaqai da nauegaxanaxac chicqochigui ca 'xoic napaxaguinataxanaripi.

—22—

⁷ Cá'maq sqaica ca ỹa'den qaica ca ỹa'xat quena' reloqota'guit ca imitac na nasauaxaset, ma' saqa' ỹovita yí'maq ỹaatqajam na'deenaxanaxa.

—23—

⁸ Cá'maq qaicaatam qam ỹa'deentaque ỹo'uet ca se ỹa'maxañi, ca' 'ue da lichoxoric quiyim la'axaic lqahic.

⁹ Dá'maq na'deenaxac cá'maq qaica ca ỹa'den, ca chaqaida da nasauaxaset; qaica ca ishit na'ñaxachiguit cá'maq i'neetac ca liỹa.

—24—

¹⁰ No'm rolaaviriñi ma' reuocqoisac, ca' sqai 'xoic ca rquesaxanaxa'e'.

—25—

¹¹ Nca'laxachirec cá'maq qailliitalec ca lelauaxa; naqachira'a queca lichic cá'maq sham ileu.

¹² Ca 'eno'm 'taxachisegueñi quiyim sqa 'yiiñi', qam ñí'maq imitac na nasauaxaset qaiyijim retan qami'; qam ỹaatqajam ỹa'deenta ñí'maq ra'ajñisac qota'olec, ñí'maq ipaquichigui nqai'en ca re'xoriqui' cá'maq ro'ueenataxanaxaqui'.

—26—

¹³ Qami' ỹaalcolec, a'qui' na rapic li'i ñaqai hueetagui ana lapa; 'guiñi' dá'maq 'neetari' da lo'daxa.

¹⁴ Ca' chaqaida 'neetari' nqai'ñi' da lo'daxa da na'deenaxanaxa quiyim 'ue ca 'yiiñi'; no'm nachita, ca no'uen lqodoc aca rqauaxagui'i' ma'le chaqai se ỹauana ishit ỹapalaxat da naquitaxaqui'.

—27—

¹⁵ 'Neeto' vi'saque 'viichi' ca se no'uen queca huagaxaraic ỹale, chaqai 'neeto' 'ue ca na'axachi' queca la'a' neeta'ñi,

¹⁶ ma' 'eno'm siete huaañi, qam qaiyiita canchaqai ỹote' ne'laxashiguim; qam na hualoxonyipi iyinñigui ma'le da le'xoric.

—28—

¹⁷ Mesqai netooñitegue chaqai 'xoic lemaqachic nqai'ñi' quiyim repoxolaxan chaqai quiyim huaañi ca npa'guenaxaua'e',

¹⁸ ma' no'm iuana dajo ñi qara'gaxala', ca' se nqo'ta, ca' se noquii'a ma'le ca'maxare.

—29—

¹⁹ 'Neeto' 'ohirelec ca nocqaic, chaqai 'neeto' pa'guiñisa'a na hualoxonyipi,

²⁰ ma' ca hualoxonaq se no'uen ca lqodoc ca nachaalataxac: ¡ca hualoxonaq ma' ime, ca 'ec aca ncoỹeraxanaxaqui 'om!

—30—

²¹ Maqachiñi' ñi qota'olec chaqai ñi nashi, qami' ỹaalcolec; totaxan lapoisa'piguit na npa'guenaxauaripi,

²² ma' da le'xoric ne'laqataxanto ma'le, chaqai qaican ỹa'den ma' qaỹouaxan quiñi qota'olec chaqai quiñi nashi.