Proverbios 23 - La'qaatqa ñi qota'olec Qota'olec & Qota'olec Novita Na Qomyipi

—6—

¹ Ca no'm ca chalego lecaic na'gaxala' ỹal qami' quiyim rqui'ỹaxaua'e', ca na'maxachite' ma' 'yiiñite' cá'maq loqoisa'guit.

² Ca 'eno'm 'xoic ca rqopaaxa'e', qam naloqojñisañi ca 'qui';

³ mesqai ripichira'a na loyac na loq, ma' sqoue quiyim chi rayiñi'sac.

—7—

⁴ 'Neeto' 'xoic ca reuogoxo'e' quiyim qami' nesallaxanec; totaxan 'yiiñisapega dajo.

⁵ No'm ỹaatqajam 'ajñite', ca' huañita quiyim qaica ca nesallaxa; ca' chita'gue, ca eec ỹoota 'ec na chirálo, 'ec ñaxaterec caua laua'.

—8—

⁶ Mese rqui'ỹaxaua'e' ca pasaq, chaqai se ripichira'a na loyac na loq,

⁷ ma' 'ec ca qoue cañi noqosote: ca'maxare roỹaxañiraxaua' quiyim qui'i' chaqai ni'chi', qam chi ri'guiñi'sac;

⁸ resallitegue ma'le cá'maq 'qui', ca' caua lo'yaxanqa ra'qaataxahi' queca'maxare qaica ca 'neteguelo caqami'.

—9—

⁹ Mesqai 'xaiqachichi' ca se nouoogoñi, ma' chi i'neeta'pe ma'le caua lo'yaxanqa ra'qaataxahi'.

—10—

¹⁰ Totaxan nqo'naxachi' ca lqodoc ca na'laua ca 'auaxaiquipi, chaqai sqai huootaxañira'gue ca na'laua ca na'peloq,

¹¹ ma' chalego lquesaxanaxa ñí'maq ro'ootaxanlec na'maxare, ca ma' qoshiilec na'maxare, ca' ỹanaxat qami'.

—11—

¹² Lli'rigui na rqahiqui' chaqai quiyim na'xaỹaxañita ca napaxaguinataxaqui' chaqai na na'deenqaipi.

—12—

¹³ Sqai 'xañi'sac quiyim sqai paxaguiñi' ca ne'nec, ma' 'eno'm huaxañi'sac, qam sqai lauachi';

¹⁴ ma' no'm taqaita chaqai huaxañi', ca ỹochiỹau'a nqai'ñi' ca lelauaxa.

—13—

¹⁵ Qami' ỹaalcolec, ma' vichita yí'maq ỹaatqajam na'deenec, ca' qaica 'nejem ma'le ca ỹa'maxa;

¹⁶ ca' ỹaatqajam chalego ma'le ca ñitoonaxac ma' sa'xaỹa ca la'maqa' caua ra'qaataxahi'.

—14—

¹⁷ Totaxan pa'guiñisa'a na sauaqhuaiquipi; qaidaata quiyim maqachiñi'sac ñi qara'gaxala';

¹⁸ qaiyi ma'le, ca' no'uen ca lqodoc aca rqauaxagui'i', chaqai qaica ỹapalaxatac da naquitaxaqui'.

—15—

¹⁹ Ỹaatqajam na'xaỹaxañite', qami' ỹaalcolec, qaiyi 'yiiñi'; nquipichira'pegue' quiyim no'uen nqai'ñi' ca qayicyaxaqui'.

²⁰ Totaxan naviquira'pegue' na ne'taaxaiquipi chaqai na quemaraxauaiquipi,

²¹ ma' na ne'taaxaiquipi chaqai na quemaraxauaiquipi taỹa'a da le'xoric, chaqai na hualaiquipi ỹantañi na leteraxaic.

—16—

²² Na'xaỹaxañita ca qataa'i' ma' qami' lo'ueenatec; 'neeto' se rqo'chita aca qachii'i' ma' qo'xoỹom.

²³ Shiujnaxañita da lliqueta chaqai da na'deenaxanaxa, da paxaguinataxac, da na'deenec, ca' ¡sqai miiñi'!

²⁴ Ca leta'a cá'maq ñaalec huagaxaraic chaqai 'deenaxanqachaqaic ỹa'maqachiguiñi quiyim netoonta'gue chaqai imaqachintac;

²⁵ ¡'viichi' quiyim caua qata'alli' netoonta'pe chaqai remaqachiñi'sac!

—17—

²⁶ Qami' ỹaalcolec, ỹaatqajam na'xaỹaxanchiriua', chaqai 'ajñite' quiyim ña'maxateta, ca' yadenaxachi';

²⁷ ma' aca ỹoqa'a 'aalo, nanatqa lo'o', 'ec aca ni'ỹa sqa logui chaqai qoỹoqochi'ñigui;

²⁸ rauaanaxantac, 'ec ca cuataxai, ca' vichiguiño' 'xoic na ỹale na'laañi nqai'en.

—18—

²⁹ ¿Negue' cá'maq 'ue ca le'xoric? ¿Negue' ca chootetac? ¿Negue' cá'maq reloquitac chaqai noỹentac? ¿Negue' cá'maq qaica ca 'negue, qam qaicoñirqachit? ¿Negue' cá'maq se ỹa'maxañi da lquenoxonaxac?

³⁰ Chaqaica cá'maq sqai ỹaxanñi na lataxa, chaqai ỹo'ueetetac na dalaxaic ne'taxat lataxa.

³¹ Totaxan ra'ita na lataxa, quena' re'oq na letogaxa chaqai quena' qashilqueta'a cañi 'taxaqui chaqai quena' lo'daxa quichi'ñigui quena' qaỹaqan.

³² Qam quena' ncopa, ca 'ec ca nanaic, quena' ra'gaxan, ca' 'xoic ca lqui'ic.

³³ Reuanaxanaxañitegue na sqai huañirapega, 'yiiñisaque chaqai 'xachi'sac na se no'uen;

³⁴ chaqai 'ec viisañigui na lavinñi aca huaaxai huaqaisau'a ca qo'paq lavinñisec aca huaxaỹaqse.

³⁵ Chaqai 'ñirac: Qayouaxantaco', qam se ñauate; qayalashintaco', qam se ño'uenegue; qam co'na' ñilouec, ca' liỹa shic sedaanaque lataxa.