Proverbios 22 - La'qaatqa ñi qota'olec Qota'olec & Qota'olec Novita Na Qomyipi

Na treinta la'qaatec so 'deenaxanqachaqaiquipi

¹⁷ Ỹaatqajam na'xaỹaxañitetalo naua leloxoỹaxaco naua la'qaatqa cá'maq 'ue ca ỹa'den; lo'qo'ichiriñi cá'maq sapaxaguinegue qami'.

¹⁸ Chalego la'maxa caqami' ma'le no'm sqai 'laxachite 'yiiñisapegalo, chaqai shichi' quiyim pila'gue cá'ogue 'xachi'.

¹⁹ Nagui, ca' sa'deenaxanaxanegue qami', qaiyi 'ue ca rpi'ỹaxaqui' quiñi qara'gaxala' qota'olec.

²⁰ Ca' ỹim shiriñi na treinta na'qaatec hueetagui da napaxaguinataxanaxac chaqai da na'deenaxanaxa,

²¹ ma' sahotaque sapaxaguiñitegue dá'maq lliqueta, qaiyi 'maxaraic ca ra'qaachiqui' quiyim 'ue ca renachi'.

—1—

²² Sqai hualaxaiñirari' ca 'xoraic ma' 'xoic ca le'xoric, se pataqairiñi queca nasauaxaset cá'maq qaica ca qoshiilec,

²³ ma' ñi qara'gaxala' qoshiilec ma'le ca'maxare, ca' pataxañi cá'maq pataxañi ca'maxare.

—2—

²⁴ Se naviquira'pegue' ca sqo ỹoxo'ña lauel chaqai ca nocqaic,

²⁵ 'neeto' nahi'ta da se no'uen lanatec, ca 'ec chi noqoiñiralta'.

—3—

²⁶ 'Neeto' lotqai pa'a'irelec aca la'uale ca liỹa qom,

²⁷ ma' no'm qaca aca rishiuetenaxanqachi'i', ca vire'ta ca romalachi' qarouootaxana'gue ma'le.

—4—

²⁸ 'Neeto' nqo'naxachirec ca lqodoc ca na'laua'e' quecá'maq 'auñi letanec ca 'auaxaic qata'alli'ipi.

—5—

²⁹ Cá'maq ỹa'maqachiguiñi nqai'en ca lo'ueenatec, ca'maxare nelaatec ma'le quena nashillipi, mesqai queca qom sqailligueme' ỹaqamaq.