Proverbios 1 - La'qaatqa ñi qota'olec Qota'olec & Qota'olec Novita Na Qomyipi

Dá'maq lecaic da na'deenaxanaxa

¹ Nauajo naua la'qaatqa so Salomón, llaalec so David, nashi quiyi Israel,

² 'ue da leloxoỹaxac, 'neetasa': ỹa'ue da na'deenaxanaxa chaqai da napaxaguinataxanaxac, rotaanaxan quiyim qaỹa'den ca na'qaatec chalego lecaic ca leloxoỹaxac,

³ quiyim qaicoñiguit ca naqataxac, qaiyi qaỹa'den ca lo'yaxanec chaqai ca se no'uen, ỹa'maqachiguiñi, nalamaxa, qaica ca qaỹapacqajnauec;

⁴ ỹo'uet da letanaxanaxac na ne'naqaipi se retanaxan, chaqai ỹa'ue da ỹa'deenaxanaxanegue ca lco'ỹaxaric.

⁵ Cá'maq 'ue ca la'deenec chaqai co'ỹaxaraic, ca' na'xaỹaxanalo naua na'qaatqa, ca' queda, ca nqo'neuec ca la'deenaxanaxa chaqai da letanaxanaxac,

⁶ qaiyi qaỹa'den ca la'qaatec na 'deenaxanqachaqaiquipi chaqai quiyim qanachinchigui ca laloqojnaxanaxaqui queca la'qaatec.

⁷ Da na'deenaxanaxa chicqochigui quiyim qaimaqachin ñi qara'gaxala' qota'olec; ná'maq qaica ca la'deenataxanaxac, ca' se icoñiguit da na'deenaxanaxa chaqai ca napaxaguinataxac.

Naqataxac quena ne'naqaipi

⁸ Qami' ỹaalcolec, na'xaỹaxañitalo naua lapaxaguinataxanaxaco najo qataa'i', chaqai sqa 'laxachite naua lapaxaguinataxanaxaco añi qachii'i',

⁹ ma' caqami' ma'le, ca 'ec ca no'uen no'ueetaxachi': 'ec aca rqola'e', loqo'm aca nashi nado'o ñi'sañi.

¹⁰ Ca no'm na sauaqhuaiquipi ỹahotaque rayiñi', qam qami' ỹaalcolec, ¡se na'xaỹaxañi'!

¹¹ Sqoue qohinac caqami': Ỹala'e', qami' qariỹa; ca' qarepacalec, sahoqe aca qodoxonaxanaxaqui, ca 'eno'm qaica ca 'na'pegue ca qom, qam ma' naquetoxouot, ca' salauataq.

¹² Ca chaqa'ma' qodoxonec ma'le ca 'maxataxaraic ỹale, 'nejem na nelauaxa quena' naqajñi cá'maq ta'ñigui aca napal lahi'.

¹³ Ỹaleque'ejta' ma'le ca qaresallaxa, ¡ño'xataxataxaguilo ma'le naua qouoto' quená'ogue ná'maq qarocataxat!

¹⁴ Ñaqai naquichirauguilo qomi', qomá'ogue llo'xosqota'a aca qochoxoqui.

¹⁵ ¡Qami' ỹaalcolec, totaxan riỹa'isegueñi quenaua llico na'maxare! Totaxan quire'ueguelo naua'maxare,

¹⁶ ma' da llicyaxac taỹa'a yi se no'uen; ¡'xoic da lquipitqachic quiyim ỹocoraxata'pe caua neuo'!

¹⁷ Ma' 'eno'm qaica ca 'negue aca noqoina no'm ỹa'ajantac aca qo'oole na' qaỹo'ueetetac,

¹⁸ ca' najo ỹalliripi ỹo'uet aca loqoina, qam chi noqointeguelta', chaqai 'xoic da lichic quedá'maq chi nachaalataxac.

¹⁹ Ca' chaqaida 'neeta ca lqodoc ca qo'iitaxanqachaqaic: ca qaỹalauat quedá'maq chi lqo'iitaxanqachic.

Roỹaxantac da na'deenaxanaxa

²⁰ Quenaua nayico chaqai quenaua lapooqote' na qom qara'xaỹaque da lelamaxa da na'deenaxanaxa;

²¹ da lelamqa' naua la'qaatqa quenaua lasomi' chaqai quenaua paguec nemaqajnatqa quena na'a' lodegaxat, 'naac:

²² Ne'naqaipi qaica ca retan, 'naxanaxaiquipi chaqai qaica ca la'deenataxanaxac, ¿laquio' 'xañiñi quiyim quiitalec quiyim qaica ca retanaxanaxaguii, chaqai quiyim nachiỹa ca ra'maxahi queda re'naxanaxaguii, ca' se rqo'chiỹa da na'deenaxanaxa?

²³ Na'xaỹaxañiỹalo naua ỹaqataxaco, ca' ño'xataxachiguilo qamiri ma'le queda na'deenaxanaxa; ca' sa'deenaxanaxaneguelo qamiri ma'le naua ỹa'deenataxanaxaco.

²⁴ Ỹim soỹaxanalo qamiri, sale' qamiri quiyim nahiquena, qam qamiri se na'xaỹaxañiua'.

²⁵ Qam ta'ta'a quiyim sqai coñiguita naua ỹapaxaguinataxanaxaco; chaqai se na'xaỹaxañiỹalo naua ỹalamqataxanaxaco.

²⁶ ¡Ca' saỹaleguere ma' ỹoviriỹaxauot ca re'xoriguii! ¡Ca' si'ñiitac ma' qamiri rillivita queca rqolonaxahi,

²⁷ ma' novitalo qamiri ca nqolonaxa, ca' sqa 'yiiñii ca 'ñiita'gue, ma' totqa 'yiiñii ca 'ñiita chaqai 'ue ca re'xoriguii, 'ec aca la'taxanaxa i'guenaxajñi canchaqai quejlec!

²⁸ Ca' quecajo na'xa'a, ca ỹaxañitacot aỹim ma'le, qam se ña'xaỹaxan; daañitaque aỹim ma'le, qam sqa nachiua';

²⁹ ma' se rqo'chiỹa dá'maq na'deenaxanaxa chaqai sqai maqachiñii ñi qara'gaxala'.

³⁰ Sqai coñiguita naua ỹapaxaguinataxanaxaco; sqai 'maxariñii' naua ỹalamqataxanaxaco.

³¹ ¡Ỹo'uet ma'le ca re'xoriguii dá'maq chi no'ueenataxaguii! ¡Rquemariỹa'gue ma'le dá'maq se no'uen ro'ueenataxanaxaguii!

³² Ná'maq se retanaxanac, ca' ileuapeguem ma'le quiyim qaica ca letanaxanaxac, chaqai ná'maq se ra'deenataxan, na'laxatañi dá'maq quiyim qaica ca ỹa'den;

³³ qam cá'maq na'xaỹaxañiua', ca 'xoic ca la'maxa ma'le chaqai qaica ca lqolonaxa quenaua'que naua lichico.