Oseas 5 - La'qaatqa ñi qota'olec Qota'olec & Qota'olec Novita Na Qomyipi

Da nouaxanaxaset yi Israel chaqai yi Judá

⁸ ¡Pi'chiigui ana npe'te lasote lauataxaqui quiyi na'a' Gabaa chaqai ana npe'te quiyi na'a' Ramá! ¡Raualaxailec yi na'a' Bet-avén! ¡Ñiiñi quiyim qaica ca ỹajnaxa quiyi 'laua Benjamín!

⁹ Ỹim sa'xat dajo taỹaugui nqaishin na ni'iquipi quena Israel dá'maq sqaica ma' se ipaguigui quet ma'le: yi Efraín qanomajñi ma'le quecajo na'xa'a, ma' novi' ca nouaxanaxaset.

¹⁰ Dajo 'naac ñi qara'gaxala': Yi lashillipi yi Judá 'nejem ma'le so qomyipi, ná'maq mashic napacalgoto naua lqodoco naua na'lauari. ¡Qam i'paxanlec nqaishin queda iuel!

¹¹ Yi Efraín qaipataxañi ma'le chaqai qarouootaxana'gue na lalamaxaret, ma' se neme queetalec na nashiilqaipi.

¹² Ma' ỹim shintari' ca pit ma'le quiyi Efraín, 'ec aỹim ca nichigaxanaq quena lalamaxareteripi so Judá.

¹³ Ma' yi Efraín iuana dá'maq chalego ralolaxa, chaqai yi Judá ma' iuanalo naua lcoñiraxa', ca' yi Efraín taigue ma'le ca Asiria, ca' ỹashiila ñi nashi lodegaxat quiyim qaỹotauan, qam ñi'maxare se ishit quiyim ỹomatec ma'le chaqai se nataren na lcoñiraxa.

¹⁴ 'Ec na sauaxaic leta'a quena' 'ue ñi i'guentalec, ca' chaqaida shine'tegue ma' se'guentalec yi Efraín chaqai yi Judá; chaqaỹim ná'maq sichaqatajlec ma'le, ca ma' ime, ca' shic; ca' ỹim secona'a ma'le, ca' qaica ca ishit ro'ootaxanlec.

¹⁵ Ca ma'le, ca' yapila na ỹoma', chi ỹovireto'o' ma' yi'maxare no'uenegue da lasauaxaset, ca' nanac idaanaque aỹim. ¡Ma' ỹovira'a da le'xoric, ca' idaanaque aỹim!