Oseas 3 - La'qaatqa ñi qota'olec Qota'olec & Qota'olec Novita Na Qomyipi

So Oseas chaqai aso 'aalo nanatqa lo'o'

¹ Ca ñi qara'gaxala' liỹa 'naac caỹim: Mo'e', ca rqo'chita ma'le aca 'aalo nqo'itqate queca nauochaxaua chaqai nanatqa lo'o'. Ca' chaqaida 'neeta da iqo'iichi quena Israel laseripi, 'eno'm que'uegue na ỹoqa'a qota'olqaipi chaqai ỹa'ic ana naqaulata qoỹaanot na'maxare.

² Ca na'le, ca' seshiujnaxana aso 'aalo sauaaque ỹoua, ca' yi seshiueten na'le ỹovi' quince ỹamirolli' plata chaqai aso nahirenaxanaxaqui trescientos treinta litro no'qaata nqaishin cana cebada.

³ Ca ma'le, ca' shinac: Ỹaatqajam shi'gom qami' ỹalamaxarete ma'le; totaxan niyiquiñi' chaqai se nañaañichiguit ca liỹa ỹale, chaqai ỹim qai'neeta saqamaxateta qami'.

⁴ Ma' mashic shi'gom ma'le da 'neetari' na Israel llaalqaipi qaica ca lashi chaqai ca la'gaxala', qaica ca lachitaxanataxanaxat chaqai ca imaqachin qa', qaica ca looỹac na netaxaỹaxanqajanqaipi chaqai ca lashiilec na ni'iquipi quenaua la'aate'.

⁵ Ca ma' ime dá'ogue dajo, ca' rapil na Israel llaalqaipi, ca' idaanaque ñi la'gaxala' ñí'maq qota'olec quena'maxare chaqai so David só'maq lashi. Quenaua co'uaataxante' na'xata' ỹaatqajam neuogoq quepegue' ñi qara'gaxala' chaqai ná'maq na'maxa ỹaantauec ñi'maxare. (4.1—5.7 Ñi qara'gaxala' retaxaỹa chaqai ỹadentalec yi Israel. So Oseas qata quiyim le'en na nashiilec nqolaquipi.)