Números 6 - La'qaatqa ñi qota'olec Qota'olec & Qota'olec Novita Na Qomyipi

Dá'maq leloxoỹaxac cá'maq qaỹoỹoota'oga nca'acsec quiñi qota'a

¹ Ca' ñi qara'gaxala' ỹaatqajam ỹalamaxachichigui so Moisés, ca 'naaco':

² —'Ñirapego' na Israel llaalqaipi queda shinac, 'neetasa': Ca ỹale loqo'm aca 'aalo quiyim mashic ỹaanec da la'qaatec quiyim nañaanot ñi qara'gaxala' quiyim nazareo,

³ ca' se ni'chigui na lataxa, chaqai sqaica ni'chigui quena quiñiuguetqataxan, chaqai na lochiviaxaic lataxa, chaqai canchaqaica liỹa quena qani'chigui, loqo'm ca nelamecsec li'i ana 'uva. Chaqai se ỹa'ic ana 'uva la chaqai ana nelamecse 'uva nashiviaqata.

⁴ Quiyim saqa' ỹomat cá'maq laloqojnec quecá'maq la'qaatec quiyim nco'taxateta, ca ca'maxare se ỹa'ic canchaqaica chicqaugui ana 'uva.

⁵ Chaqai se nepetec na laue qai'neeta, ta'ta'a quiyim ỹaxanegue ca llaqtaxac na laue, toco' ma' ỹovire'oga cá'maq laloqojnec quecá'maq ỹaanec la'qaatec. Ma' ca'maxare ỹouen quiyim nañaanto'ot ñi qara'gaxala'.

⁶ Chaqai quecaua'que cauajo na'xata' se nqo'neu'a canchaqaica leuaxaic,

⁷ 'eno'm quiyim ileu ca leta'a, loqo'm aca late'e, loqo'm aca lqaỹa 'aalo loqo'm ca lqaỹa ỹale, qaiyi se napio'o. Ma' ca'maxare ỹouen quiyim nco'taxateta quiyim nañaanot ñi qara'gaxala'.

⁸ Ca' caua'que caua na'xata' laloqojonqa quiyim saqa' ỹovirerec, ỹouen quiyim nañaanto'ot ñi qara'gaxala'. (6.9-21 Dá'maq 'neeta quiyim ỹa'maxate'tegue da nachaalataxac so nazareo.)

Da lqouagaxa cá'maq mashic netaxaỹaxanqajnec

²² Ca ñi qara'gaxala' ỹalamaxachichigui so Moisés, ca 'naaco':

²³ —'Ñirapega ñi Aarón chaqai na llaalqaipi quiyim ma' ỹaanem da no'uen llicyaxac na Israel llaalqaipi, ca 'ne'teco'yi ca la'qaatec:

²⁴ Ñi qara'gaxala' ỹaanem qami' ca no'uen qayicyaxaqui' chaqai quepaqataxanlec qami';

²⁵ ñi qara'gaxala' ỹaatqajam ỹa'maxarenta qami' chaqai ỹaanem qami' da lqouagaxa;

²⁶ ñi qara'gaxala' ỹaatqajam i'xoren qami' chaqai ỹaanem qami' ca ra'maxa'e'.

²⁷ Qaiyi na'maxare ỹa'xatetac da ỹeenaxat quiyim ỹaanlec na Israel llaalqaipi, ca ỹim saanem ma'le ca iqouagaxa na'maxare. (7.1—10.32 Najo ỹa'xat ana nachitaxanataxanqate quiyi lanatqa' ñi qota'olec chaqai quena' qoỹaanshiguim quena llaalqaipi so Leví chaqai quena' qaỹo'leente na' qoyique'e yi Egipto. So llaalqaipi so Israel na'maxajñi quiyim ca'e yi Sinaí.)