Números 21 - La'qaatqa ñi qota'olec Qota'olec & Qota'olec Novita Na Qomyipi

So nadenqatec nanaic lecat lahi

⁴ Ca co'na' so Israel llaalqaipi ca'e ada quemaralec ladocai leenaxat Hor, reloqo'tegue da pa'ỹa'gue aso huaaxai toc, ỹahotaque lepajlec, qaiyi sqai quiichigui yi 'laua Edom. Ca co'na' queeta'gue so nayic, ca' so qomyipi tot qaica da leualaxavic.

⁵ Ca' 'ue da ỹa'xat se no'uen quiñi qota'olec chaqai queso Moisés. 'Naaco' quen: —¿Negue' cá'maq 'neco' quiyim naqachiu'alo qomi' quiyi Egipto? Chaqai ¿viitaco' qareleualec na 'laua qaica qom? Qaica ca qaraquip chaqai ca qonoq. Ca ¡mashic qaramaqa'gue ná'maq sa'guinqatac qaica ca loyac!

⁶ Ca' ñi qara'gaxala' nela' so 'xoic nanaic 'ue na ledoonaxa. Ca' qara'gaxañigui so qomyipi, ca 'xoic na ileu queso Israel llaalqaipi.

⁷ Ca quepegue'o' ca neeta'ñi so Moisés. Ca 'naaco': —¡'Uo' da qarasauaxaset, ma' qomi' se no'uen da sa'xatqatac quiñi qara'gaxala' chaqai caqami'! Ca ¡'maxaraic quiyim shiila'e' ñi qara'gaxala' quiyim naqata'a coqomi' na nanaiquipi! Ca' so Moisés ỹashiila ñi qara'gaxala' quiyim sqai caapeguem so Israel llaalqaipi.

⁸ Ca' ñi qara'gaxala' 'naaco' queso Moisés: —'Viichi' ca nanaic, 'nejem nqai'ñi' yijo. Ime, ca 'viichi' aca lashi, ca ñi'rashiguim. Ca no'm 'ue ca qaỹa'ac queca nanaic, ca' ra'ỹo'ot ca nanaic ñi'sashiguim, ca ca'maxare qaica nqai'negue, imeuec.

⁹ Ca' so Moisés ỹo'uet so ladenqatec nanaic, ỹachigoxotaugui na lecat leenaxat bronce. Ca' ỹa'ue aso lashi, ca' ỹanashiguim. Ca' quiyim 'ue ca qaỹa'ac quena nanaic, ca' ra'ỹo'ot so nadenqatec, ca chaqa'ma' nca'leuec. (21.10-20 So llaalqaipi so Israel liỹa eec quedá'maq taỹa'gue.)

So Israel llaalqaipi loxonec so nashi leenaxat Sehón

²¹ Ca' so Israel llaalqaipi ỹa'vii saua lelaatqa, ilajta so Sehón só'maq lashi so amorreo laseripi quiyim 'naapega:

²² —Sahoqotaque chaqai qolqajlec na na'laua'e'. Sqai qolaxalec na nanaxanqateripi chaqai na nananqa' ana 'uva, chaqai se ñi'taxagui na huaxaỹaq quenaua ri'ỹalli', chi sapacqauec na na'laua'e', qam qolqachi'ñigui na ỹaatqajam nayic.

²³ Qam so Sehón se ỹa'maxaren quiyim so Israel llaalqaipi ỹapaca'ta so na'laua, ta'ta'a quiyim lapoonta' so lauo'. Ca naqta'guit quiyi 'laua qaica qom, ca na' ỹovita yi Jahaza, ca' i'guentaugui ỹahotaque nalauate'e'.

²⁴ Qam so Israel llaalqaipi se nañaañiguit. Ca na' nalauate'e', ca loxonec so lauo' so Sehón. Ca' rouootaxana'gue yá'ogue yi na'laua, chicqochi'ñi aso lachiugue Arnón, ca' ỹovira'a aso lachiugue Jaboc. Ca' ỹaatqajam ỹovira'oga yi lqodoc yi na'laua so llaalqaipi so Amón yí'maq 'ue na lquepaqataxanaxat.

²⁵ Ca' chaqaida 'neeto' na' so Israel llaalqaipi naugui ná'ogue na la'aateripi so amorreo laseripi, yi Hesbón chaqai na liỹa na'aateripi. Ca na'ñi yi'maxare. (21.26-32 So llaalqaipi so Israel louootaxanaxat yi na'laua so amorreoipi.)

So Israel llaalqaipi loxonec so nashi leenaxat Og

³³ Ime, ca' pil so Israel llaalqaipi, ta'tegue da pa'ỹa'gue yi Bazán, qam so Og só'maq nashi neeta'ñi yi'maxare naqta'guit, liỹaatac sá'ogue so nalliripi, ỹahotaque nalauate'e' so'maxare quiyi Edrei.

³⁴ Co'na'le, ca' ñi qara'gaxala' 'naaco' queso Moisés: —Totaxan ro'chita, ma' ỹim saanem qami' ma'le quiyim 'viiquiñi'sac, chaqai ná'ogue na nalliripi, chaqai na na'laua. Ca 'ñitetegue ma'le dá'maq 'ñitetegue na'le so Sehón só'maq lashi na amorreo laseripi na'ñi yi Hesbón.

³⁵ Ca' chaqaida 'neeta, ca' so Israel llaalqaipi ỹalauat so Og chaqai so llaalqaipi chaqai sá'ogue so nalliripi. Qaica ca qanca'laxatetauec, chaqai qarouootaxana'gue yi na'laua.