Nehemías 4 - La'qaatqa ñi qota'olec Qota'olec & Qota'olec Novita Na Qomyipi

Da le'naxanaxac so pa'guenaxauaripi

¹ Ca' so Sanbalat co'na' 'ue da la'xaỹaxac quiyim liỹa ño'xonqatecshiguim so nquepaqataxanaxat, ca' ro'o, paguec na lauel, ca' i'neetac so judioipi.

² Ca 'naac queso liỹaripi chaqai so nalliripi na'ñi yi Samaria: —¿Negue' cá'maq 'neetapiguio' lauel ná'taq judioipi lalauatec lqopaaxa? ¿Loqo'm 'neetapigui lauel quiyim qaỹasene'tem quiyim liỹa ỹavigaxat ca lachitaxanataxanaxat? ¿Loqo'm 'neetapigui lauel quiyim ỹomat queca 'oonoqui' na'xa'a? ¿Loqo'm quiyim quená'maq lapootañi lahillipi ỹachigoxotaugui ca qa' dalaxaic quená'maq shi'gue ỹavic?

³ Ca' so Sanbalat huaqate'e' so Tobías na'ñi yi Amón, ma' qai'neeta 'naaco': —Ñaqai 'ajñii só'maq qano'xontecshiguim nquepaqataxanaxat, ¡vire'ta aca nouaxaỹaxa 'guiñi nqai'en quiyim quishi'megue so'maxare!

Nqouagaxainaxac so Nehemías

⁴ Ca na'le, ca' ñqouagaxain, shinacsa': —Qami' qota'olec, 'ajñi' dá'maq le'naxanaxac na qomyipi coqomi', ca' pilot nqai'ñi' da le'naxanaxac, ca' noxonec queca npa'guenaxauaripi chaqai quiyim qai'xat qaỹauega ca liỹa 'laua quiyim na'aqaipi.

⁵ Ca sqai 'xoriñi' queda leualoxonqaishic chaqai sqai palaxachi' ca lasauaxaset, ma' na'maxare ỹaatqajam i'neetac ná'maq no'xontecshiguim na nquepaqataxanaxat.

Da la'xalenataxanaxac so pa'guenaxauaripi

⁶ Ca' qomi' qolqatalec quiyim ño'xonqatecshiguim na lapooque' na na'a' lodegaxat, ma' na'maxare mashic noỹoqshi'megue. Ca' so ỹalliripi ỹaatqajam 'ue da lasapichi quiyim ro'ueenataxan.

⁷ Qam co'na' so Sanbalat, Tobías, chaqai so na'ñi yi Arabia chaqai na na'ñi yi Amón chaqai yi Asdod, co'na' 'ue da la'xaỹaxac quiyim qoyiquetalec qano'xontecshiguim so lapoxonaxat yi Jerusalén chaqai mashic qaỹapoguilo naua lauaco, ca' ỹaatqajam ro'o.

⁸ Ca sá'ogue na'deenta' quiyim queu'a yi Jerusalén, qaiyi liỹa qanopoxoỹaxajñi.

⁹ Ca na'le, ca' ñqouagaxainqot ñi qota'olec, ca sahoqe neloxoỹaq quiyi pe chaqai yi na'xa'a quiyim nauaantalgoto qomi'.

¹⁰ Ca ná'maq na'ñi yi Judá 'naacsa': —Da lquesaxanaxa na niỹoxosoxonaripi ra'lliiñi sauaxat paguelec na qa' lahillipi, ca' qomi' qaica ca shinaxague quiyim ño'xonaxashiguim najo nquepaqataxanaxat.

¹¹ Na qanpa'guenaxauaripi 'neetapega quiyim se yitanaq chaqai se seuanaxa, chi ỹovireta'a queta' ỹoviriñiguilo naua lavilliñi' qomi', ca' qaralauajñi, ca' quepaxat da qaro'ueenataxanaxac.

¹² Qam ná'maq judioipi quená'maq lauoraripi, na'maxare nanac quiyim ra'qaataxanalo qomi' quiyim sojo qomyipi sqa ỹaataq ca chicqo'tegue ma'le quiyim queu'alo qomi'.

¹³ Ca' ỹim shinapega so iỹaripi quiyim quiñi 'óna chi nauaantalec, reloqota'a cá'maq chi lauo' le'ec hueeto'ot na lahi so napoxonaxat pa'aataho, chaqai na pa'a'nquira quenaua lauaco, ỹahote'e na lecachipi, laquillipi chaqai na lo'xoshiquipi.

¹⁴ Ca na' ỹim yitan quiyim so qomyipi no'chi, ca' ỹim ñachajñi, ca' shinac quená'maq nemaqajnatqaipi, chaqai na nashillipi, chaqai ná'ogue na qomyipi: Totaxan ro'chii, o'lliinchiỹa'a ñi qara'gaxala' ỹaatqajam lodegaxat chaqai chaqaic. Ca' qamiri ỹaatqajam loquilgoto naua qauori lase' chaqai ca qachaalliguii ỹale chaqai aca 'aalo, ca rouahi chaqai naua ra'aachiri.

¹⁵ Ca' so qanpa'guenaxauaripi na' ỹa'den quiyim ña'maxatqatañi chaqai ñi qota'olec ichoxot ná'maq na'deenaxaquipi, ca' qomá'ogue sopilaxa so napoxonaxat, ca' quiñi 'óna quelec cá'maq chi lo'ueenatec.

¹⁶ Ca' quiyi na'le, ca' so iỹaripi neuagaxata'chi, 'ue na ro'ueenataxantac, ca' na liỹaripi, ca huote'e na lo'goxonaxat laqui, chaqai na lquepaqataxanaxat, lo'xoshic, chaqai na lquepaxaset ana lotogue. So na'gaxalateripi ỹaatqajam ỹotauan so qomyipi quiyi Judá,

¹⁷ só'maq no'xontecshiguim so lapooque' yi Jerusalén. Qam na niỹoxosoxonaripi ñaqai queetalec riỹoxosoxontac, qam 'oonoqui' da ro'ueenataxantapega lqai'laxat, ca' queda liỹa lqai'laxat, ca' lo'qoota'a na lo'goxonaxat.

¹⁸ Ca ná'ogue na no'xonaxanaripi ro'ueenataxantac, qam nishitetañi na lecat, chaqai na ỹahi hueetau'e so npe'te lo'o, no'm 'ue canchaqaica.

¹⁹ Ma' shi'gue shinapega so nemaqajnatqaipi, chaqai so nashillipi, chaqai sá'ogue so qomyipi: Da no'ueenataxanaxac 'xoic lecaic, chaqai 'xoic lecaguiñi, chaqai qomi' ñiuagaxatqatac quena napoxonaxat, ỹoreta'chi qomi'.

²⁰ Ca ma' 'xaiỹaque aca npe'te, ca nqo'ñiỹalo qomi', ca' ñi qota'olec qarotauan ma'le ma' ñalauataq.

²¹ Ca' chaqaida shinqa'tegue, ca' qomi' so'ueenataxanqatac quiyá'ogue yi na'xa'a, ca' na liỹaripi lo'qoota'a na laquillipi.

²² Chaqai qai'neeta shinac queso qomyipi quiyim sá'ogue chaqai vire'ta so notaanaxanyipi chaqai 'neetari' pa'aataho queso pe quiyi Jerusalén, qaiyi reloqota'alo qomi' queso pe, ca' quiyi na'xa'a, ca' ro'ueenataxan.

²³ Ca' ỹim chaqai na iuo' laseripi chaqai na notaanaxanyipi chaqai sá'ogue so ỹalliripi neloxoỹaripi caỹim, ỹaatqajam se ñaqataxe' naua qotoho, chaqai quiñi 'óna lo'qoota'a ca lo'goxonaxat.