Nehemías 12 - La'qaatqa ñi qota'olec Qota'olec & Qota'olec Novita Na Qomyipi

Qoỹaanot ñi qota'olec yi lapoxonaxat yi Jerusalén

²⁷ Ca co'na' ỹovire'oga so na'xa'a quiyim qaỹahotaque qoỹaano so lapoxonaxat yi Jerusalén, ca' qaimitaque ná'ogue na chigoxougui so Leví quená'maq neeta'ogalo naua na'aate', ca' qaỹauega yi Jerusalén quiyim qoỹaano so lquepaqataxanaxat. Ca' ỹaatqajam 'xoic ma'le da toonaxac, nemaqajnataxanaxac, no'ueenaxanaxac, qaỹahote'e ana nasaquinata chaqai na niviiguellipi.

²⁸ Ca' ỹaatqajam nemaa na no'ueenaxanyipi chigoxougui so Leví chicqa'ogalo naua 'lauari sqoỹoqapigui quiyi Jerusalén; 'ue na chicqa'a yi Netofa,

²⁹ chaqai quiyi na'aateripi quiyi Gilgal, chaqai quiyaua no'ueenaxari quiyi Geba chaqai yi Azmavet; ma' na no'ueenaxanyipi ỹo'ueete'o' nauá'maq chi la'aaterolqai' quiyi sqoỹoqaque quiyi Jerusalén.

³⁰ Co'na'le, ca' nco'taxat na netaxaỹaxanqajanqaipi chaqai so chigoxougui so Leví. Ime, ca co'taxat so qomyipi, chaqai so lasom yi na'a' lodegaxat, chaqai so lapoxonaxat.

³¹ Ime, ca' selarelec so nashillipi quiyi Judá quiyim quishi'megue so napoxonaxat. Ime, ca naloqojñiñi nqaishine' saua dos lomaate' so no'ueenaxanyipi, 'xoic nqaishin. So 'auaxaic queetalec so napoxonaxat taỹa'gue da loic, taachigui nqaishin ñi lasom taachigui yi lete loma'.

³² Ca' queso no'ueenaxanyipi, ca co'uaataxanta so Osaías, nauequeta'pegue' so nashillipi quiyi Judá:

³³ Azarías, Esdras, Mesulam,

³⁴ Judá, Benjamín, Semaías chaqai so Jeremías.

³⁵ Coỹaresaho queso netaxaỹaxanqajanqaipi ỹahose'e ana lpe'te so Zacarías só'maq llaalec so Jonatán chigoxougui so Semaías, Matanías, Micaías, Zacur chaqai so Asaf.

³⁶ Chaqai saua lauo' lase' Semaías, Azarael, Milalai, Gilalai, Maai, Natanael, Judá chaqai so Hanani, saua'maxare iviiquesapigui na liviiguellipi so nashi David, só'maq nale ñi qota'olec. Ca' so napaxaguinataxanaq Esdras 'auetauec quesaua'maxare.

³⁷ Ca co'na' ỹovita ñi lasom quiñi huaxaỹaq lahi', ca ñaqai queeta, ca' quishi'megue so nco'ỹaxala' taỹashi'ma yí'maq pa'aashiguim na'a' queso David. Ca' quelec ñi lauo' lodegaxat so David, chi ỹovireta'a ñi huaxaỹaq nasom pa'a'gue da lqodoigue.

³⁸ Ca só'maq liỹa no'ueenaxanyipi, só'maq taỹa'gue da nemaq. Ca' ỹim scoỹaretaho queso'maxare. Ñauequeta'pegue' so liỹa qomyipi, qolqatalec so napoxonaxat, chicqochi'ñi aso naue nqatelaxanaxaqui', chi ỹovireta'a so napoxonaxat paguec leca'gue.

³⁹ Ca qolqajlec ñi Efraín nasom, chaqai ñi Jesana nasom, chaqai ñi nallinyipi nasom, chaqai ada na'ajnaxanaxalate Henaneel, chaqai ada la'ajnaxanaxalate so Cien, chi ỹovireta'a ñi qagretaipi nasom. Ca' seuqa'e quiñi nasom na neloxoỹaripi.

⁴⁰ Ime, ca' lapoỹata' sá'ogue so no'ueenaxanyipi, ca quepegue' yi loma' quiñi lauo' ñi qota'olec. Ca' ỹim liỹa iỹaatac so lavinñi so liỹa nashillipi.

⁴¹ Ca só'maq netaxaỹaxanqajanqaipi pe'teetapigui so npe'tellipi, chaqaisaua saua Eliacim, Maaseías, Miniamín, Micaías, Elioenai, Zacarías, Hananías,

⁴² Maasías, Semaías, Eleazar, Uzi, Johanán, Malquías, Elam chaqai so Ezer. Chaqai so no'ueenaxanyipi la'gaxala' so Izrahías, ca' ro'ueenaxan.

⁴³ Ca' quesojo na'xa'a ỹaatqajam 'xoic so qaỹavigaxat nachitaxanataxanaxat, chaqai so qomyipi ỹaatqajam 'xoic da netoonaxac, ma' ñi qota'olec ñí'maq ỹaatqajam netoon nqai'en. Ca' na 'aallipi chaqai na ñaaqaipioqui' qai'neeta netoontagui, ca' da netoonaxac ná'maq neeta'ñi yi Jerusalén ỹaatqajam qoỹoqo'tegue da lelamaxa. (12.44—13.31 Sauá'maq lo'ueenatqa so Nehemías.)