Miqueas 6 - La'qaatqa ñi qota'olec Qota'olec & Qota'olec Novita Na Qomyipi

Ñi qota'olec relocỹe'e' yi Israel

¹ Ñaq na'xaỹaxañiỹa dá'maq 'naac nagui ñi qara'gaxala': “¡Ne'laxachirishiguim, ca' lli're'oguiyi dá'maq 'ñi'sari' quena leseeque'ta ana qa' ladocai, chaqai qaiyi 'qaasapega qami' naua quemaralgoto!”

² Ñaqai na'xaỹaxañii qamiri qa' ladocaipi chaqai ná'maq nolliitañi na 'laua. Ñi qara'gaxala' ỹo'uet ca limiitaxanaxac caqamiri quená'ogue na lalamaxareteripi, ỹo'uet quiyim relocỹe'e' na Israel.

³ 'Neetasa' da la'qaatec ñi qara'gaxala': Vii ca 'ñiỹac, qamiri ỹalamaxarete', ¿negue' cá'maq se no'uen so'uet caqamiri, loqo'm negue' ca hua'co' na' sqai saxañiỹac?

⁴ Ỹim ñaqata'a na'le qami' quiyi Egipto, ñaqata'a na'le qami' quiyim qami' na'ac, ỹim sela' na'le so Moisés, Aarón chaqai aso María, sahotaque quiyim ra'gaxalachiri.

⁵ Qamiri ỹalamaxarete', ñaq no'viñigue nagui dá'maq na'deenaxac na'le so nashi quiyi Moab leenaxat Balac quecá'maq sham 'neeta'guelo qamiri, chaqai dá'maq la'qaatec na'le só'maq llaalec so Beor leenaxat Balaam. No'viñigue na' chigoxoichi'ñi yi Sitim, ca 'iỹa'gue da Gilgal, chaqai 'yiiñira'a quiyim so'ootaxanteguelgoto qamiri na'le.

Dá'maq nauaantaque ñi qara'gaxala' quena qom

⁶ ¿Nega'ỹo' cá'maq llo'qoota'a ma' shicpegue' quiyim ñqouagaxainot ñi qara'gaxala' ñí'maq qota'olec queda piguim? ¿Peeta'a ma' sovira'a, ca' sauequetau'a ca huaqui llaalec 'óna niñaaxa, sahotaque ỹachitaxanataxanaxat quiyim qaỹavigaxat?

⁷ ¿Peeta'a netoon ñi qara'gaxala' no'm saanto'ot ca mil qagreta loua', loqo'm ca diez mil lachiugue quena aceite? ¿Loqo'm quiyim saanot cá'maq ỹi ỹaalec, laseue' na ỹasauaxaset chaqai quiyim se ña'xaỹaxan?

⁸ ¡'E'! Ñi qara'gaxala' shi'gue 'naac caqami', negue' cá'maq hueetaugui cá'maq no'uen, chaqai negue' cá'maq nauaantaque ñi'maxare caqami' ỹalloolec: quiyim 'viichi' cá'maq no'uen, na'maxachite' chaqai raqamqaite' chaqai quiyim ne'xorishiñite', na'xaỹaxañiteta ñí'maq qota'olec caqami'. (6.9—7.20 Ñi qara'gaxala' ỹa'xat da lcoñiitaxanaxac, qam nqouaguegue so lalamaxareteripi.)