Miqueas 4 - La'qaatqa ñi qota'olec Qota'olec & Qota'olec Novita Na Qomyipi

Da no'daxa novi' quiyim nashi ñi qara'gaxala'

¹ Naua co'uaataxante' na'xata', ca qai'taxajñi ma'le ada qa' dá'maq nejlec ñi no'ueenaxanaxaqui quiñi qara'gaxala'. Ada'maxare paguec lishicshi'megue ma'le, paguec ladogaxa caná'ogue ana liỹa qa'. Ca ná'ogue na ỹoreta'oguit qomyipi nacpegue' ma'le;

² ca 'naac: “Ỹalahi, qolaxashi'megue ada naqa' ladocai ñi qara'gaxala', ñí'maq no'ueenaxanaxaqui quiñi nqota'olec so Jacob, qaiyi ñi'maxare qarapaxaguineguelo caua nayicyaxaco, qaiyi seshitaq qolqata'guelo naua llico.” Ma' chicqochi'ñi ma'le yi Sión ca lapaxaguinataxanaxac ñi qara'gaxala', chaqai quiyi Jerusalén chicqochi'ñi ca la'qaatec.

³ Ñi qota'olec imit ma'le ná'ogue na ỹoreta'oguit qomyipi, ca ñi'maxare ỹa'maxajñi na reloquitapigui na 'xoic qomyipi, vire'ta ná'maq paguec qoỹoqo'ta. Na'maxare ỹosogui na lecaachiripi, ca ỹo'uet na nasaugaxanaxat lap llaaxa, chaqai cana laqui, ca ỹo'uet na lichaxasoxonaxat. Tot qaica ma'le ca qomyipi quiyim icona ca lo'goxonaxat, ca' nco'ỹa'e' ca liỹa, chaqai tot qaỹapaxaguinegue cá'maq 'neeta'gue quiyim eec queca lauataq.

⁴ Ca ma'le, ca' tot qaica ca ỹouetetac, ná'ogue nco'matec, neeto'ot ca la'al aca lanecse 'uva, chaqai aca lanecse higo lashi. ¡Ca' dauajo dauá'maq lalamaxarete' la'qaatqa ñi qara'gaxala' sqaica lqalanec! (4.5-13 Ñi qara'gaxala' nca'laxatec ma'le so lalamaxareteripi.)