Miqueas 2 - La'qaatqa ñi qota'olec Qota'olec & Qota'olec Novita Na Qomyipi

Da lquesaxanaxa ná'maq pataxasoxonaxairipi

¹ ¡'Xoraicolec ná'maq 'ue da la'deenataxanaxac quiyi pe quiyim ỹo'uet ca se ỹa'maxañi, ca quena' ỹovita yi na'xa'a, ca ỹo'uet, ma' hueeto'ot dá'maq nquesaxanaxa!

² Quena' 'ue yi nqo'teu'a 'laua, ca rouootaxana'gue; chaqai quena' 'ue na nqo'teu'a 'imec, ca' rocacha. Pataxañi na qomyipi, chaqai na llaalqaipi chaqai na lalamaxaret louenqaipi.

³ Vichiguiño' 'naac ñi qara'gaxala': Ỹim liỹa 'ue dá'maq sham shine'teguelo qamiri. Selatalo qamiri ma'le ca ne'xoric lodegaxat cá'maq sqai ỹite' ma'le naua rqosoochiri, ca' tot qaica ma'le da nemaqajnaxaguii quiyi huoitegueri', ma' chalego la'aaqa' ma'le naua na'xata'.

⁴ Ca' quecajo na'xa'a, ca qaro'ueenaxantalgoto qamiri, qam cajo no'ueenaxanaxac 'ec ỹenaxac. Qohinac caqamiri: Ỹaatqajam qanomachichiriñom qomi': na qouo' ná'maq lalamaxaret ñi qara'gaxala' ỹoỹoota'a ca la'gaxala' qaica ca ishit quepaxata'guit; naua qana'lauari shi'gue qaneuagaxachiguilo quená'maq mashic qomi' loxonqa.

⁵ Vichiguiño' qamiri mesqai 'iỹapegueu'a na lalamaxareteripi ñi qara'gaxala'.

Ná'maq 'maatqaic netaxaỹaxanqajanqaipi

⁶ Ca na'maxare 'naac: ¡Se sahoqotaque quiyim naiquena ca letaxaỹaxaqui ñi qota'olec, ma' cá'maq ne'xoric se noviroxoua'!

⁷ ¿Peeta'a 'ue ca qainaxalec se no'uen na llaalqaipi so Jacob? ¿Peeta'a ñi qota'olec tot qaico' ca lepagaxallic? ¿Chaqaido' dá'maq 'neetari' ñi qota'olec? ¿Loqo'm tot qoshiilec da la'qaatec quecá'maq qom na'maxateta?

⁸ Ca' ñi qara'gaxala' 'naac: Qamiri napaguiiteguelec na ỹalamaxareteripi. Coñiỹalo naua loho lo'yaxanqa ná'maq rapil queca lauataq 'neetapega mashic nca'leuec.

⁹ O'yiỹauec na 'aallipi quenauá'maq lauochaqate' lomaate' chaqai tot qaica ma' liỹa quiyim 'viichii dá'maq lemaqachic saanem na llaalqaipioqui'.

¹⁰ Ne'laxachishiguim, ca' quii, ma' najo mesqaina ná'maq co'matqa'; ma' mashic chalego ná'maq se no'uen hueetalec na'maxare, ỹaatqajam ná'ogue na'lliichiguiñi.

¹¹ No'm 'ue ca ỹo'uet ca la'maachic, ca' 'naac: “Ỹim sa'xateta'guit ca lataxa chaqai ca 'taxat,” ca' chaqaica cá'maq ỹaatqajam na'qaataxanqajnec qaimaqachin quenajo qomyipi. (2.12-13 Ñi qota'olec 'naac ro'ootaxanlec ma'le so lalamaxareteripi.)