Mateo 4 - La'qaatqa ñi qota'olec Qota'olec & Qota'olec Novita Na Qomyipi

Da ne'guenaxac so Jesús

¹ Ca co'na' ime, ca so Espíritu Santo ỹauega so Jesús yi 'laua qaica qom, qaiyi qai'guen queso na'ỹaapec.

² Ca' so'maxare se que'e ỹoviraqterauec saua cuarenta na'xata' chaqai saua cuarenta piri. Ca co'na' ime'ueque sauajo na'xata', ca' nauata'guit so lqopaaxa.

³ Ca' so na'ỹaapec quepegue' so Jesús, ma' ỹahotaque i'guen. Ca 'naaco': —No'm ỹaatqajam qami' llaalec ñi qota'a, ca' ñiguilo nqai'ñi' paañi' nauajo qari.

⁴ Qam so Jesús 'naaco': —Yi 'auaxaic naneretañi na'qaatec 'naacsa': “Mesqaicaata ca pan ỹouen da nachaalataxac ca qom, ma' qai'neeta ỹouen ná'ogue ná'maq la'qaatec ñi qota'olec.”

⁵ Co'na'le, ca' so na'ỹaapec ỹauega yi lalamaxaret ñi qota'a na'a' lodegaxat Jerusalén. Ca' ỹavicshi'megue da lelaq añi no'ueenaxanaxaqui late'ogue'.

⁶ Ca 'naapego': —No'm ỹaatqajam qami' llaalec ñi qota'a, ca' quenajo, ca' renochirauec. Ma' yi naneretañi na'qaatec 'naacsa': Ñi qota'a nela' ma'le na lelaatqaipi piguim laseripi, quiyim netela'a qami'. Illiitalgoto qami' naua laua' caua'maxare, qaiyi qaica ca roqopia'guita naua richilli' quena qa'.

⁷ Ca' so Jesús 'naaco': —Qai'neeta yi naneretañi na'qaatec 'neetasa': “'Neeto' lotqai 'guiñi' ñi ra'gaxalachi' qota'a.”

⁸ Ca' so na'ỹaapec lotqai liỹa ỹauega so Jesús ada quemaralec qa' ladocai. Ca' ỹachaxanalo naua'que naua na'aate' hueesalec ana 'laua chaqai ná'ogue na lemaqachic na'maxare.

⁹ Ca 'naaco': —Saanem qami' ma'le ná'ogue najo, no'm shichi' 'yiriñi' naua re'cootalli', ca yimaqachiñi'.

¹⁰ Co'na'le, ca' so Jesús 'naaco': —Mo'e', oquire'e aỹim, qami' Satanás, ma' naua 'auaxaqa naneresañi na'qaatqa 'neracsa': “Maqachiñi' ñi ra'gaxalachi' qota'a, ca' qaiñiita 'ueenataxañitot.”

¹¹ Co'na'le, ca' so na'ỹaapec ca'e so Jesús, ca 'vio' saua nelaatqa piguim lase' ỹotauansac so'maxare.

Hua'ño' yi Galilea co'na' chita'gue ro'ueenataxan so Jesús

¹² Co'na' so Jesús 'ue da la'xaỹaxac quiyim so Juan qaiconlec, ca' qoỹanaugui añi ncoñiitaxanaxaqui, ca' so Jesús quepegue' yi 'laua Galilea.

¹³ Qam sqai na'ñi yi Nazaret. Ta'ta'a quiyim quepegue' yi Capernaum, ca' na'ñi yijo na'a' na'ñi na lahi aso latogot late'ogue', neeto'ot na lahi yi 'laua Zabulón chaqai yi Neftalí.

¹⁴ Dajo 'neeto' na'le, qaiyi ipaquichigui dá'maq ỹiriño' na'le so qota'a letaxaỹaxanqajnec leenaxat Isaías, 'neetasa':

¹⁵ Ỹaatqajam qami' lalamaxaret na'laua na llaalqaipi so Zabulón chaqai na llaalqaipi so Neftalí, chaqai so nayic que'tot aso huaaxai pa'a'gue da lqodoigue caso lachiugue Jordán, Galilea, yí'maq na'ñi na mesqai judioipi.

¹⁶ Ná'maq qomyipi hueetapougui na napalaxa, iuana aso chalego lecaic 'eco' ncoỹeraxanaxaqui. Chaqai ná'maq hueeto'ot na la'al da nelauaxa, ca' qaicoỹarelec caso 'ec ncoỹeraxanaxaqui.

¹⁷ Co'na'le, ca' taañi da la'qaataxanaxac so Jesús, 'naaco' quen: —Netogochiguilo nqai'ñii' naua qavilyii, ma' nepalata da lo'ueenataxanaxac ñi qota'a neeta'gue da piguim quiyim ỹoiquentac ná'ogue najo.

So Jesús roỹaxanalo saua cuatro qoinaxanaxaqa quena nallin

¹⁸ Ca' so Jesús ỹouootegueri', queeto'ot na lahi aso latogot late'ogue' quiyi Galilea. Ca co'na' iuane'talo saua dos nqaỹa', so 'óna dos leenqate' Simón Pedro, ca' so liỹa leenaxat Andrés. Saua'maxare inaqasegueñi so laleguegue', ma' qoinaxanaxaqa saua'maxare quena nallin.

¹⁹ Ca' so Jesús 'naaco' quesaua'maxare: —Naguigue aỹim, ca' ỹim so'uet quiyim qamiri noqoinaxana' ma'le quena qom.

²⁰ Ca chaqa'ma' ỹaxanerec so laleguegue', ca' quetegue so'maxare.

²¹ Ca' so Jesús cocho'qui' liỹa eec, ca lotqai liỹa iuane'talo saua dos nqaỹa' Jacobo chaqai so Juan, llaalqa so Zebedeo, neesañigui aso qom lahi' huaxaỹaqse huaqase'e' so leta'a', ỹa'maxatesegueñi so laleguegue'. Ca' so Jesús roỹaxanalo.

²² Ca chaqa'ma' ỹalate' aso neesañigui chaqai so leta'a', ca' quetegue so Jesús.

So Jesús ỹapaxaguintac so 'xoic qomyipi

²³ Ca' so Jesús ỹouoxontac yá'ogue yi 'laua Galilea quecanchi ỹoviri'ñi, ca lotqai rapaxaguinataxantapougui ana lapoxoqui na judioipi, ỹa'xatetac dá'maq no'uen na'xaỹaxac queda lo'ueenataxanaxac ñi qota'olec ma' ỹoiquentac ná'ogue najo, chaqai ỹomatec ná'maq ỹoreta'oguit ne'ne' hueetaugui na qom.

²⁴ Ca ỹovira'gue da na'qaataxac so Jesús yá'ogue yi 'laua Siria. Ca qanoda'a so'maxare ná'maq 'ue na iuetetac ỹoreta'oguit na ralolaxa, ná'maq 'ue na le'ec lecmaxaic, chaqai ná'maq chita'gue lotqai ileueta, chaqai na se ra'ñiigue. Ca' so Jesús ná'ogue ỹomatec.

²⁵ Ca ỹaatqajam 'xoic na qom quegue so Jesús, chicqa'ñi yi Galilea, chaqai yaua diez na'aate' qaỹamata'que Decápolis, chaqai yi Jerusalén, chaqai quiyi 'laua Judea, chaqai yi pa'a'gue da lqodoigue caso lachiugue Jordán.