Mateo 25 - La'qaatqa ñi qota'olec Qota'olec & Qota'olec Novita Na Qomyipi

Qaraloqojnaxañiguilo saua diez nequetegaxahi

¹ Ca' dajo lo'ueenataxanaxac ñi qota'a neeta'gue da piguim 'nejme' ma'le caua diez nequetegaxahi ỹaconalo caua lcoỹeraxanaxaqui' ỹavigaxate' na aceite. Ca' querepegue' so shilaq, qaiyi qatesa'guit só'maq shilo.

² Cinco' saua qaica ca ỹa'deenda'a, chaqai cinco' saua 'deenaxanqachaqai.

³ Ca sauá'maq cinco qaica ca ỹa'deenda'a co'na' i'xate' saua lcoỹeraxanaxaqui', qam se ỹahote ca louetaxanategue' aceite quiyim liỹa iỹoxoguilo.

⁴ Qam saua 'deenaxanqachaqai co'na' i'xate' saua lcoỹeraxanaxaqui', qam lotqai ỹahote so louetaxanategue' aceite.

⁵ Qam co'na' só'maq sham shilo qaua' novi', ca sá'ogue natacot da lelaxac, vire'ta ca' sá'ogue laq.

⁶ Ca co'na' 'uo' ca pe lauel, ca qara'xaỹaco' so naualaxac: “¡Mashic novi' ná'maq ỹale shilo; quiỹa'guit!”

⁷ Ca sá'ogue so nequetegaxaipi ne'laxashiguim ỹa'maxajñi ana lcoỹeraxanaxaqui.

⁸ Ime, ca' sauá'maq cinco sqaica ca ỹa'deenda'a 'neraco' quesaua cinco 'deenaxanqachaqai: “Vii ca 'ỹaañima qomi' cocho'qui' aceite, ma' naua qarcoỹeraxanaxaqui' 'meeta'pe.”

⁹ Qam saua nequetegaxahi 'deenaxanqachaqai 'neraco': “'E', ma' no'me' vire'ta se nalogoñi coqomi' chaqai caqamiri. Ca 'maxaraic quiyim quiipegue' ná'maq imeenac, ca shiujnaxañiỹaque cá'maq viñitaque.”

¹⁰ Qam co'na' saua cinco nequetegaxahi sqaica ca ỹa'deendaque que' rishiujnaxandaque ca aceite. Ca' noviro só'maq shiltapego. Ca sauá'maq nequetegaxahi 'deenaxanqachaqai inoxondo liỹaresaho so'maxare queca shilaq. Ca' qaỹapogui ca lasom.

¹¹ Co'na' ime, ca novirero saua liỹa' nequetegaxahi. Ca 'neraco': “¡Qami' qara'gaxala', huachire'ogalo qomi'!”

¹² Qam so'maxare 'naaco': “Ỹaatqajam se seuanapegalo qamiri.”

¹³ Co'na'le, ca' so Jesús 'naapegalo' saua'maxare: —Ỹaatqajam nelohitauec, ma' sqa 'yiiñii ca na'xa'a chaqai ca laloqo' quiyim novi' najo ỹale llaalec.

Qaraloqojnaxañigui aso nam 'vii saua qoỹaanema quiyim ro'ueenataxañiguilo

¹⁴ Dajo lo'ueenataxanaxac ñi qota'a neeta'gue da piguim 'nejem ca ỹale quiyim ma' sham eec quepegue' ca liỹa 'laua. Ca roỹaxanouguilo saua lelaatqa, ca ỹaanema aso lam quiyim ro'ueenataxanyigui.

¹⁵ Ca' so 'óna quesaua'maxare ỹaanem aso cinco mil, ca' so liỹa ỹaanem aso dos mil, chaqai so liỹa ỹaanem aso mil. So'maxare ỹaanem acá'maq naloote'e' quiñi 'óna. Ime, ca' eec.

¹⁶ Só'maq nelaatec icoñiguit aso cinco mil, ca so'maxare ro'ueenataxañigui. Ca' sojo nam ỹovi' cinco mil aso liỹa lauegue.

¹⁷ Ca' chaqai 'nejem só'maq icoñiguit aso dos mil, ca lotqai lauegue aso liỹa dos mil.

¹⁸ Qam só'maq icoñiguit aso mil, ca' eec ỹoxojñi aso lam so na'co', ỹa'ue aso lahi' ni'ỹaguiñi quena 'laua.

¹⁹ Ca co'na' shi'gom, ca' novi' so na'coote' saua nelaatqa. Ca so'maxare naloqochin ca lo'ueenataxanaxague' saua'maxare.

²⁰ 'Au ỹoviro' só'maq icoñiguit aso cinco mil, ca ỹaanemo' so na'co' so liỹa cinco mil. Ca 'naaco': “Qami' ña'co', nañaañi' aca cinco mil, ca nagui 'ana ana liỹa cinco mil ỹauegue.”

²¹ Ca só'maq a'co' 'naaco': “Ajá'a, ỹa'maqachiguiñi, ỹaatqajam qami' no'uen chaqai qamaxaraic nelaatec. Ma' qami' qamaxaraic quecá'maq sqa looqui', ca' paguec lecaic cá'maq spataqairaxalec. Nagui nenoxoñiro, ca' qami' ñitoonaxaua.”

²² Ime, ca lotqai noviro só'maq qoỹaanemo' na'le aca dos mil. Ca 'naaco': “Qami' ña'co', nañaañi' na'le aso dos mil, ca nagui 'ana ana liỹa dos mil ỹauegue.”

²³ Ca so na'co' 'naaco': “Ajá'a, ỹa'maqachiguiñi, ỹaatqajam qami' no'uen chaqai qamaxaraic nelaatec. Ma' qami' qamaxaraic quecá'maq sqa looqui', ca' paguec lecaic cá'maq spataqairaxalec. Nagui nenoxoñiro, ca' qami' ñitoonaxaua.”

²⁴ Qam na' noviro só'maq nelaatec icoñiguito' na'le aso mil. Ca 'naaco' queso na'co': “Qami' ña'co', ỹim sa'den quiyim qami' ỹale se ileuapigui qavilli' quiyim naqachi' ana la ca sqa dañicshiqui', chaqai quiyim lapooñi' cá'maq sqaica ca miichirelec.

²⁵ Ca' vichiguiño' yo'chi. Ca na'le, ca' soxojñi ana qadami' quena 'laua. Qam 'ana aná'maq ralamaxarichi'i'.”

²⁶ Ca só'maq na'co' 'naaco' queso'maxare: “Ỹaatqajam qami' se no'uen nelaatec chaqai qami' hualaic. Ma' mashic shi'gue 'yiiñi' ñaqat aca la cá'maq sqai sanñi, chaqai quiyim llapoon quecá'maq sqaica ca semejlec.

²⁷ Ca vichiguiño' lli'raugui queto' na'le ana ỹam ñi plata lahi', qaiyi queta' ñovi', ca secoñiguit aca lauegue ana'maxare.”

²⁸ Ca 'naaco' quesauá'maq hueese'eyi: “Huootaxañiỹa'gue adá'maq mil no'qoota'a. Ca' 'ỹaañim dá'maq hueeto'ot ada diez mil.

²⁹ Ma' cá'maq 'ue aca hueeto'ot, ca' paguec aca qoỹaanem, ca' paguec ma'le acá'maq hueeto'ot. Qam cá'maq qaca aca hueeto'ot, ca 'eno'm cocho'lli' aca hueeto'ot, qam qaiyiita qarouootaxana'gue.

³⁰ Ca dá'maq dajo nelaatec qaica ca 'negue, o'yiỹa'oga yi pa'aauec napalaxa. Ca' yí hua'ñi ma'le, ca' noỹen chaqai iquishquinta' naua louee quena nqui'ic.”

Ma' qaimit ná'ogue na ỹoreta'oguit qomyipi

³¹ Ca ma' novi' najo ỹale llaalec quiyim nashi, qalapoỹau'a quena lelaatqaipi piguim laseripi, ca nqa'xañigui aca 'ue lauaq nashi nqa'xanaxaqui.

³² Ca ná'ogue na ỹoreta'oguit qomyipi lapoỹata' ma'le quiyi reloqota'ñi ca'maxare. Ca ca'maxare, ca' ỹoỹootecchi, 'nejem ca neloxoỹaq quena' ỹoỹoote'oga ana qagreta cana quetaq.

³³ Ca' ana qagreta pa'xana'gue da loic, chaqai ana quetaq pa'xana'gue da nemaq.

³⁴ Ca' ca nashi 'naac ma'le casó'maq pa'aata'gue da loic: “Qamiri ỹalahi quenajo, qamiri nauá'maq qanqouagueque quiñi ita'a. Coñiguit dá'maq ralamaxarichii no'ueenataxanaxac mashic ỹa'maqatañi nouetaxanatec qaỹaqatqajantari' caqamiri shi'gue na' ñaqai chita'gue qaỹo'uet na 'laua quiñi qota'olec.

³⁵ Ma' na' yqopat, ca' qamiri vii ca noq; yalauat ca ỹaquip, ca' yi'taxañii; so'meetegueri', qam vii ca ilaqsoqo'.

³⁶ Qaica ca ỹooỹac, ca' qamiri 'viichii ca ỹooỹac; na' yalola, ca quiipegue' aỹim; sentaugui añi ncoñiitaxanaxaqui, ca 'piichiu'a ỹim.”

³⁷ Ca só'maq ỹaatqajam 'naxanaxaraiquipi 'naaco': “Qami' qara'gaxala', ¿laquio' rqopachi', ca' sahoqai ca qanoqe'? chaqai ¿laquio' 'xoic ca raquipi', ca ñi'taxanqai'?

³⁸ Chaqai ¿laquio' quiyim 'mi'segueri', ca' sahoqai ca relaqsoqochi', loqo'm sqaica ca qatooỹaqui', ca' sahoqai?

³⁹ Chaqai ¿laquio' qami' ralolaxaic, loqo'm qami' ncoñiiteguesec, ca ya'ỹaqau'a qami'?”

⁴⁰ Ca cá'maq nashi 'naac ma'le quesaua'maxare: “Ỹaatqajam llic da shinac caqamiri, quená'ogue ná'maq 'ñii'tegue quena ỹaqaỹaripioqui' 'ec qaica ca 'negue, ca' dajo 'ñii'tegue caỹim.”

⁴¹ Ca ma'le ca nashi 'naaco' quecá'maq pa'aata'gue da nemaq: “Noỹoochiuec caỹim, qamiri mashic qaỹa'ue da nouaxanaxashichii. Quiipegue' yi norec sqaica lqodoc, shi'gue qaỹa'maxatetañi qaỹauaaque loma' so na'ỹaapec chaqai na lelaatqaipi.

⁴² Ma' na' yqopat, ca' qamiri sqa vii na'le ca noq; chaqai na' yalauat ca ỹaquip, qam se yi'taxañii;

⁴³ so'meetegueri', qam sqa vii ca ilaqsoqo'; qaica ca ỹooỹac, qam sqo 'viichii; chaqai na' yalola chaqai na' qaycoñi', qam sqai 'piichiu'a aỹim.”

⁴⁴ Ca saua'maxare 'nerac ma'le: “Qami' qara'gaxala', ¿negue' quet cá'maq 'neeta? Ma' quena' seuanqa'ta qami' rqopachi', loqo'm 'xoic raquipi', loqo'm 'mi'segueri', loqo'm qaica qatooỹaqui', loqo'm qami' ralolaxaic, loqo'm qami' ncoñiiteguesec, ca' sotauanqai'.”

⁴⁵ Ca' ca nashi 'naac ma'le: “Ỹaatqajam llic da shinac caqamiri, quená'ogue ná'maq sqo 'viichii quena qomyipi quená'maq 'ec sqaica ca 'negue, qai'neeta caỹim sqo 'viichii.”

⁴⁶ Ime, ca' nauajo querepegue' ca nouaxanaxac sqaica lqodoc, ca ná'maq no'uen da ỹo'ueetetac, ca' quepegue' ca nca'laxa sqaica lqodoc.