Mateo 24 - La'qaatqa ñi qota'olec Qota'olec & Qota'olec Novita Na Qomyipi

So Jesús 'naac qaỹopoxoỹaxachigui ma'le aso no'ueenaxanaxaqui late'ogue'

¹ Ca co'na' inoxonec so Jesús, ca'e añi no'ueenaxanaxaqui late'ogue' na'ñi yi Jerusalén, ca' so lapaxaguinatqaipi ỹachaxanta'gue na qa' no'ueenataxat aso no'ueenaxanaxaqui.

² Qam so Jesús 'naaco' quesaua'maxare: —¿'Ajñitac ná'ogue najo? Ỹaatqajam llic da shinac caqamiri quiyim quenajo qaica ca qa' no'ueenalec ca liỹa quenajo 'imec ma'le, ma' ná'ogue qaỹopoxoỹaxachigui ma'le.

Ná'maq netanqaipi ma' nepalata ca nqodoc

³ Co'na'le, ca taarishi'megue ada quemaralec ladocai nananqa' ana qo'paq olivos. Ca co'na' so Jesús nqa'xantañi quiyi'maxare, ca' saua lapaxaguinatqa retaxahi', nemootetetot, 'neraco': —Sahoqotaque sa'deenaq lagui ỹovita ca laloqo' dajo. ¿Nega'ỹo' cá'maq netanec quecá'maq roviraxagui'i' chaqai quecá'maq nqodoc?

⁴ Co'na'le, ca' so Jesús 'naaco' quesaua'maxare: —Rovichiỹari'o', qaiyi qaica ca rayiñii.

⁵ Ma' 'xoic ma'le ca naquetaugui da ỹeenaxat 'naac ma'le: “Ỹim ná'maq ỹim rashii rca'laxaguii”, ca 'xoic ca ỹayin ma'le.

⁶ Qamiri 'ue ma'le na ra'xaỹaxaguii quiyim 'maqachi'ñalo na lauataq. Qam mese ro'chiỹo', ma' chaqaida 'neeta ma'le, qam saqa' novi' ca nqodoc.

⁷ Ma' na qomyipi nalauate'e' ma'le ca se lauo' laseripi, chaqai ca nashi nalauate'e' ca liỹa nashi. Ca' 'ue ma'le ca nqopaaxa chaqai na ne'ne', chaqai 'xoic na hua'ñi i'loxol na 'laua.

⁸ Ca ná'ogue najo chi la'auaxanec quecá'maq ỹaatqajam ne'xoric ma'le.

⁹ Ca ma' ime, ca' qoỹaando qamiri ma'le quiyim qarouaxañitac, chaqai ná'ogue na qomyipi noquii'alo qamiri sovitapigui ma' viilec aỹim.

¹⁰ Ca' quecauajo na'xata' 'xoic ca na'laxatañi ma'le da lpi'ỹaxac, chaqai quiñi 'óna noquii'a ca liỹa, chaqai ỹaañiguit ca liỹa ca se no'uen.

¹¹ Ca 'xoic ca re'oq ma'le 'maatqaic 'naac quiyim letaxaỹaxanqajnec ñi qota'a. Ca 'xoic ma'le ca ỹayin quena qomyipi.

¹² Ca' ỹaatqajam a'ue ma'le na se no'uen, ca vire'ta quiyim tot ne'xorenta' na qom.

¹³ Qam cá'maq se nañaxanñi, chi ỹovireta'a ca lqodoc aca lqauaxaqui, ca chaqaica cá'maq qanca'laxatec.

¹⁴ Qam dajo no'uen na'xaỹaxac ỹa'xat dá'maq lo'ueenataxanaxac ñi ỹoiquentac ná'ogue najo, da'maxare qaỹa'xat ma'le quená'ogue na 'laua, qaiyi qaỹa'den quená'ogue na ỹoreta'oguit qomyipi. Ca ma'le, ca' novi' ca nqodoc.

¹⁵ So letaxaỹaxanqajnec ñi qota'a leenaxat Daniel 'uo' so lerec taỹaugui ná'maq chicqochigui ca se no'uen chaqai ra'aaqataxan. Ca ma' qamiri huañiỹa ca'maxare hueeta'ñi ca se loma' —ca cá'maq retaqalec anajo, ca no'uen quiyim ỹa'yiinchigui dá'maq leloxoỹaxac—

¹⁶ ca ná'maq na'ñi yi Judea no'uen quiyim 'eet, i'guenlec ana quemaralec ladocai.

¹⁷ Chaqai cá'maq hueetalec ca lauo' lelaq, se renotec quiyim 'ue ca queu'a pa'aataho.

¹⁸ Chaqai cá'maq hueetauec quena no'ueenaxa, sqai pilo quiyim lapoon ca looỹac.

¹⁹ ¡Ỹaatqajam chalego le'xoric ma'le na 'aallipi 'manaxaipi chaqai aná'maq 'ue na llaalec ñaqai llipetac!

²⁰ Ca' shiilahi ñi qota'olec quiyim ma' 'iichii sqai hueetougui nqai'en ca no'oomaxa, loqo'm ca na'xa'a co'mataxaqui.

²¹ Ma' ỹaatqajam 'xoic ca ne'xoric ma'le, qaica 'nejem shi'gue na' ñaqai taachiguiñi qaỹo'uet na 'laua, chaqai qaica ma' 'ue quet ca liỹa 'nejem.

²² Ca' ñi qota'olec quetqai se nqo'naxajta' cauajo na'xata', ca' qaica quet cá'maq ishit nca'leuec. Qam nqo'naxajta' ma'le, ma' i'xoren ná'maq lca'acseripi.

²³ Ca ma'le no'm 'ue ca 'naac caqamiri: “'Ajñii, hueete'e najo da nashi nca'laxaqui”, loqo'm “'Ajñii, 'iyi hueete'e”, totaxan viilec.

²⁴ Ma' 'xoic ca 'maatqaiquipi novi' ma'le, ca 'naac quiyim chaqaica cá'maq nashi nca'laxaqui, loqo'm 'naac quiyim letaxaỹaxanqajnec ñi qota'a. Ca ma'le, ca ỹo'uet ca chalego lecaic netanec chaqai na se qaiuanapega, ma' ỹahotaque quiyim sha'apiguito' ỹayin ná'maq lca'acseripi ñi qota'olec.

²⁵ Saqa' novi' dajo, qam ỹim shi'gue sa'xatema qamiri.

²⁶ Vichiguiño' no'm 'ue ca 'naac caqamiri: “'Ajñii, 'eda da nashi nca'laxaqui hueetalec yi 'laua qaica qom”, sqai quiipegue'. Loqo'm 'ue ca 'naac caqamiri: “'Iñi neetaugui ñi 'imec”, totaxan viilec.

²⁷ Ma' 'ec ma'le ca nqai'legaxa re'qoota queda lqodoigue chaqai queda lauashiguim, ca chaqaida 'neeta ma'le ca loviraxac najo ỹale llaalec.

²⁸ Ca cá'maq hueeta'ñi ca leuaxaic, ca' chaqaica ca lapooqo' na ratecsanyipi.

Dá'maq 'neeta ma'le ca loviraxac najo ỹale llaalec

²⁹ Ca co'na' ỹovirerec saua na'xata' ne'xoyaxaqui', ca' añi ra'aasa 'om, chaqai ñi shiraigo qaica ca lauaq, chaqai ana huaqajñi najñi quena piguim, vire'ta i'loxol na nquesaxanaxa hueeto'ot na piguim.

³⁰ Ca ma'le, ca' qaiuana quena piguim ca letanec najo ỹale llaalec. Ca ná'ogue na ỹoreta'oguit qomyipi noỹentagui, ma' qaidaana'guit najo ỹale llaalec naquetaugui na naueguelec, ỹaatqajam chalego lquesaxanaxa chaqai na lauaq.

³¹ Ca ila' na lelaatqaipi piguim laseripi quiyim netenegue da lelamaxa ana lpe'te pe'taxan, ca' qaiyi lapoonta' ná'ogue na lca'acseripi neeta'guelo naua cuatro llico na nonot, qaỹachigoxota'ogalo naua'que naua lahil na 'laua.

³² Napaxaguiñiỹa dajo quiyim saloqojnaxana ana higo lashi: Quena' no'ualauec chaqai ñaxatec ana laue, ca' qamiri 'yiiñii quiyim nepalata ca nosaxa.

³³ Ca' chaqaida 'neeta ma'le ma' huañiỹa ná'ogue najo, ca 'yiiñii quiyim ca nqodoc nepalata.

³⁴ Ỹaatqajam llic da shinac caqamiri, quiyim ná'ogue najo 'au re'oq ma'le, ma' saqa' ileu na qomyipi hueetauguilo nauajo na'xata'.

³⁵ Na piguim chaqai na 'laua imero ma'le, qam naua ỹa'qaatqa sqaica ma' se ipaguiguilo quet.

³⁶ Qam quecajo na'xa'a chaqai ca laloqo' qaica ỹa'den, vire'ta na nelaatqaipi piguim laseripi, chaqai najo qota'olec llaalec. Qaiñiita ñi qota'olec ita'a ỹa'den.

³⁷ 'Neete'm ma'le saua na'xata' hueetouguilo saua na'xata' so Noé, ca' chaqaida 'nejem ma'le ca loviraxac najo ỹale llaalec.

³⁸ Quesauajo na'xata' na' saqa' i'paxanlec ana 'laua, so qomyipi ỹo'ueetetac lqui'ỹaxac, chaqai ne'teetac, chaqai o'neetecta' chaqai ỹo'naxantac na llaallipi, chi ỹovireta'a so na'xa'a na' so Noé inoxonougui aso lo'ueenata qom lahi' huaxaỹaqse.

³⁹ Chaqai qaico' ca retanaxan na'le, chi ỹovireto'o' na' nac so ỹaxat, ca ỹaỹoxonaxat sá'ogue so qomyipi. Ca' chaqaida 'neeta ma'le ma' novi' najo ỹale llaalec.

⁴⁰ Ca' quecajo na'xa'a dos caua ỹale' hueesalec ma'le na no'ueenaxa, ca 'óna ca qai'xat ma'le, ca' ca liỹa qano'ueenaqtañi.

⁴¹ Chaqai caua dos 'aalo ra'daxanta'pe, ca 'óna aca qai'xat ma'le, chaqai aca liỹa, ca' qano'ueenaqtañi.

⁴² Ca no'uen quiyim qamiri nelohitauec, ma' sqa 'yiiñii ca laloqo' ca loviraxaqui na ra'gaxalarii.

⁴³ Qam qamiri 'yiiñii quiyim cá'maq lauo' ca 'imec, quiyim ỹa'den ca laloqo' cá'maq hua'ñi ca pe, ca novi' ca cuataxai, ca ca'maxare sqai laq, qaiyi se ỹasen quiyim qarocachigui ca lauo'.

⁴⁴ Ca vichiguiño' qamiri qai'neeta na'maxachitañi. Ma' noma' sqaica ca viitaque, ca novi' najo ỹale llaalec.

Ca nelaatec qamaxaraic chaqai ca nelaatec se ỹaqamaq

⁴⁵ ¿Nega'ỹo' cá'maq nelaatec qamaxaraic chaqai 'deenaxanqachaqaic, cá'maq reloxoỹa'a nqai'en sá'ogue so la'a' ca na'co' quiyim qui'ỹaxanac quiyim ỹovita ca laloqo'?

⁴⁶ Chalego la'maxa queca nelaatec, quiyim ma' novi' ca na'co', ca iuanejlec ñaq ỹo'ueetetac cá'maq qailarelec.

⁴⁷ Ỹaatqajam llic da shinac caqamiri, quiyim so na'co' pataxalec ma'le ná'ogue na louenqaipi.

⁴⁸ Qam cajo nelaatec, no'm se nouoogoñi, ca 'neetapigui lauel quiyim qaua' novi' ca na'co'.

⁴⁹ Ca' queetalec da lqa'viic quena lo'ueenataxanaxauaripi, chaqai ỹo'uet na nqui'ỹaxac chaqai quelec da ne'taxac ỹalequetaugui na ne'taaxairipi.

⁵⁰ Ca' novi' ma'le ca na'co' ma' ỹovita ca na'xa'a quiyim qaica ca ỹahotaque, ma' cá'maq laloqo' se ỹa'den.

⁵¹ Ca qaỹo'uet ma'le ca chalego lecaic nouaxanaxaset, 'nejem nqohin ca nouaxanaxaset ná'maq 'neetapega 'maxaraiquipi. Ca ma'le, ca' noỹen chaqai iquishquinta' naua louee quena nqui'ic.