Marcos 5 - La'qaatqa ñi qota'olec Qota'olec & Qota'olec Novita Na Qomyipi

So ỹale 'ue so le'ec lecmaxaic na'ñi yi Gadara

¹ Ca co'na' mashic ỹovirereta quiyi 'laua Gadara.

² Ca co'na' mashic renotec so Jesús caso qom lahi' huaxaỹaqse, ca qoyica'guit queso ỹale chicqaugui yi napalyipi 'ue so le'ec lecmaxaic.

³ Sojo ỹale chaqai'eno' quen neeta'oga yi napalyipi, chaqai qaica ca ishit coñi', 'eno'm ra'ñi nqohin ca lequet.

⁴ So'maxare mashic 'xoico' quen qaicoñirari', qaicoñijta' na lichil chaqai naua laua', qaỹahote'e na lequet ra'ñi, qam qaiyiita ỹachipiaxat. Ca' qaica cá'maq ishit coñirari' so'maxare.

⁵ So'maxare chaqai queetegueri' quiyi na'xa'a chaqai quiyi pe, ỹaualqata'pegue', queeteguelgoto naua quemaralgoto chaqai na napalyipi, chaqai coñirqachitetac na chi loshicmaxa quena qa'.

⁶ Qam co'na' iuañi'chiguit so Jesús ñaq qoỹoqo'chiguit, ca ca'guit ne'guenta, ca ỹa'chi'iñi naua le'cootal quiyí'maq reloqota'ñi so'maxare.

⁷ Ca' ỹaatqajam nelamaxaren, ca 'naaco': —Qami' Jesús, qami' llaalec ñi qota'olec ỹapacauec quená'ogue, ¿chi'neco' ma' 'iisapegueu'a aỹim? Nagui ñi'xoresene'tot qami' quiñí'maq qota'olec quiyim se qa'vi'rahic.

⁸ 'Naaco' dajo, ma' so Jesús shi'co' 'neetapega so'maxare: —¡Qami' ne'ec lecmaxaic, oquire'e najo ỹale!

⁹ Ca' so Jesús inato': —¿Negue' ca qadeenaxachi'? Ca so'maxare 'naaco': —Ỹim ỹeenaxat 'xoic, ma' qomi' 'xoic.

¹⁰ Ca ne'xoresentacot so Jesús quiyim se qoỹoqo'tegue ca qailategue quiyijo 'laua.

¹¹ Qam ma' 'uo' so 'xoic cooshipi sqoỹoxe'oga, que'eetac, neetalec aso quemaralec late'ogue',

¹² ca' so ne'ec lecmaxaiquipi ne'xoresene'tot so Jesús, 'naaco': —Qarelachire'oga yi cooshipi, qaiyi saxougui ma'le.

¹³ Ca' so Jesús ỹaanem da ỹahotaque. Ca' so ne'ec lecmaxaiquipi inoxonec queso qom, ca' taugui so 'uo' ca dos mil cooshipi. Ca so'maxare 'eet, ca ilamqañi caso latogot late'ogue', ca sá'ogue homac.

¹⁴ Ca sauá'maq neloxoỹa' queso cooshipi 'eet, no'chi. Ca' que', ra'qaataxane' quiyi na'a' chaqai quena neeta'oga na no'ueenaxa. Ca anac so qomyipi ra'ajnaxana negue' cá'maq 'neeto' dajo.

¹⁵ Qam co'na' ỹovita yi hueete'e so Jesús, ca iuane'ta so ỹale só'maq 'uo' na'le so le'ec lecmaxaic, nqa'xantañi, ỹansañi saua loho, naỹajanchiguiñi. Ca' so qomyipi no'chi.

¹⁶ Ca só'maq ỹauantalec ra'qaataxan quedá'maq 'neeto' na'le so ỹale 'ue so le'ec lecmaxaic, chaqai dá'maq 'neeto' na'le queso cooshipi.

¹⁷ Co'na'le, ca qane'xoresene'tot so Jesús quiyim ca'e yi 'laua neetalec so qomyipi.

¹⁸ Ca co'na' so Jesús renojñigui aso qom lahi' huaxaỹaqse, ca só'maq ỹale 'uo' na'le so le'ec lecmaxaic ne'xoresenta huateta'pegue so'maxare.

¹⁹ Qam so Jesús se icoñiguit. Ta'ta'a quiyim 'naapega: —Quirepegue' ca ra'aachi', chaqai ca qauochi' laseripi, ca 'qaataxañita dá'maq ỹo'uet ñi qara'gaxala' caqami', chaqai dá'maq 'neeta da lqouagaxa caqami'.

²⁰ Ca só'maq ỹale eec ra'qaataxantapougui yi na'aateripi quiyá'ogue yi Decápolis dá'ogue dá'maq 'ne'teco' na'le so Jesús queso'maxare. Ca sá'ogue 'xoic da le'laxa.

Aso llaale so Jairo chaqai aso 'aalo ipootau'a so napoxoqui so Jesús

²¹ Co'na' liỹa pilta so Jesús, neetañigui aso qom lahi' huaxaỹaqse, chicqa'ta'gue da laseego añi latogot late'ogue', ca 'xoic na qomyipi novita yí'maq hueeta'ñi so'maxare. Ca so'maxare hua'e yi lqodoc yi huaxaỹaq.

²² Ca novi'o' so 'óna queso lashillipi añi lapoxoqui na judioipi leenaxat Jairo. Ca so'maxare co'na' iuane'ta so Jesús, ca quepegue' ỹa'yi'iñi naua le'cootal.

²³ Ca ỹaatqajam ne'xoresene'tot, 'naaco': —Ayi ỹaale mashic ileuetac. Anaqui' quet, ca' shillirelec, qaiyi imeuec chaqai nca'leuec.

²⁴ Ca' so Jesús quegue na'le so'maxare. Qam 'xoic so qomyipi eec qai'neeta, mashic npataxata'.

²⁵ Qam queso qomyipi 'uo' aso 'aalo ỹalequetaho ralolaxai, ca mashic ỹovite' doce ñaxari naqueta'pe naua leuo'.

²⁶ Ca ỹaatqajam 'xoico' da le'xoric, queetagui na natarenataxanaripi, chi ỹomatetaho sá'ogue so louenqaipi. Qam qaica quet cá'maq naquitetaque, chaqaidaata quiyim lama'xa noquiiquetañi.

²⁷ Qam co'na' 'xaiguelec so Jesús, ca' aso 'aalo nqo'neu'a quena lelaq, queetou'gue so qomyipi, ca' ipootau'a so napoxoqui.

²⁸ Ma' 'ñiichiguio' lauel: “Quiyim 'eno'm chi sepootau'a da napoxoqui, ca chaqa'ma' yimeuec.”

²⁹ Ca chaqa'ma' qaguiguita saua leuo', ca nauata'guit quiyim na loshicmaxa imeuec queso le'ne'.

³⁰ Ca' so Jesús retan quiyim da lquesaxanaxa 'uo' so ỹomatec, ca nqovilcaugui so qomyipi. Ca' renataxano': —¿Negue' cá'maq ipootau'a na ñapoxoqui?

³¹ Ca' saua lapaxaguinatqa 'neraco': —'Yiiñi' quiyim npataxagui qami' na qomyipi, qam nataxañisac: “¿Negue' cá'maq ipootau'a aỹim?”

³² Qam so Jesús ra'iitegueñi, ỹahotaque iuana cá'maq ipootau'a so'maxare.

³³ Ca' aso 'aalo i'loxolqachit da lqolonaxa, ma' ỹa'deenta dá'maq 'neeta. Ca' quepegue', ca ỹa'dooto naua le'cootal so'maxare, ca ỹa'xatem dá'ogue dá'maq 'neeto' na'le.

³⁴ Ca so Jesús 'naaco' caso'maxare: —Qami' ỹaalole, qami' qaromachirec, ma' vi'relec. Ca' nagui, ca' qui', qaica ca huapigui qavilli', mashic remi'rec queso ralolaxa'e'.

³⁵ Ca co'na' ñaq retaqatac so Jesús, ca novite'o' saua chicqora'a yi la'a' so lashi aca lapoxoqui na judioipi. Ca qara'qaataxanem so leta'a, qohinac: —Ayí'maq qachaalli'i' tot qaca, ca' ¿chi'negue ma' vi'saque ledaxac ná'maq rapaxaguinataxantac?

³⁶ Qam so Jesús se quelola dá'maq na'qaataxanaxac. Ca 'naapego' só'maq lashi aca lapoxoqui na judioipi: —Se ro'chi'i', ta'ta'a quiyim vi'relec.

³⁷ Ca so'maxare qaica ca liỹa naueca'pegue', qaisauate' saua Pedro, chaqai Jacobo, chaqai so lqaỹa Juan.

³⁸ Ca co'na' ỹoviro quiyi la'a' so la'gaxala' aca lapoxoqui na judioipi, ca iuane'ta quiyim so qomyipi ỹaualqatagui chaqai noỹentagui.

³⁹ Ca co'na' inoxono so Jesús, ca 'naaco': —¿Chi'negue ma' raualaxaitagui chaqai noỹeñitagui? Ma' yí'maq nocto'lli' se ileu, ta'ta'a quiyim chaqai laqata.

⁴⁰ Qam chi qai'neetac so'maxare. Ca' so Jesús inoxonec nqai'en sá'ogue so qomyipi, ca' ỹauego so leta'a chaqai aso late'e chaqai sauá'maq chi nauegaxaua', ca inoxona'a yí'maq hueeta'ñi aso nocto'lli'.

⁴¹ Ca' ỹacona na lqai'laxat, ca 'naaco': —Talita, cumi —ca' da leloxoỹaxac dajo na'qaatec 'neetasa': Nocto'lli', shinapega qami', ne'laxachirishiguim.

⁴² Ca só'maq nocto'lli' mashic ỹovite' doce ñaxari chaqa'ma' ne'laxashiguim, ca ỹouoiguiri'. Ca' so qomyipi ỹaatqajam 'xoic da le'laxa.

⁴³ Qam so Jesús ỹaatqajam 'xoic da laqataxac quiyim qaica ca qara'qaataxanem. Ca relaataxan quiyim qaỹa'ue ca loq aso nocto'lli'.