Marcos 13 - La'qaatqa ñi qota'olec Qota'olec & Qota'olec Novita Na Qomyipi

So Jesús ỹa'xat quiyim aso no'ueenaxanaxaqui late'ogue' qanopoxoỹaxajñi ma'le

¹ Ca co'na' inoxonec so Jesús cañi no'ueenaxanaxaqui late'ogue' quiyi Jerusalén, ca 'uo' so 'óna quesaua lapaxaguinatqa 'naaco' queso'maxare: —¡Qami' napaxaguinataxanaq, ñaq 'ajñi' chalego loyac ná'maq qa' chaqai na 'imqaipi!

² Qam so Jesús 'naaco' queso'maxare: —¡'Ajñi' najo 'imqaipi leta'allipi! Quenajo qaica ca no'ueenañi ma'le quenajo qa' pa'aatashiguim queca liỹa. Ná'ogue najo qaỹopoxoỹaxachigui ma'le.

Na netanqaipi ma' nepalata ca nqodoc

³ Co'na'le, ca' querepegue' aso quemaralec ladocai loma' ana nanecse leenaxat olivo, yi'maxare naloote'oga añi no'ueenaxanaxaqui. Ca' quiyi co'na' nqa'xantañi so Jesús, ca qanemoote'toto' quiyim qainat quesaua Pedro chaqai Jacobo chaqai so Juan chaqai so Andrés, 'neraco':

⁴ —Sahoqotaque quiyim 'qaataxañitalo qomi' lagui ỹovita ca laloqo' dajo. ¿Nega'ỹo' ca netanec ma'le, ma' dá'ogue dajo ipaquichigui nqohin?

⁵ Ca' so Jesús 'naaco' quesaua'maxare: —Rovichiỹari'o', qaiyi qaica ca ỹachi'iñi qamiri.

⁶ Ma' 'xoic ca naquetaugui ma'le da ỹeenaxat, ca ma'le 'naac: “Chaqaỹim ná'maq ỹim nashi nca'laxaqui”; ca 'xoic ma'le ca layinec.

⁷ Qam noma' 'ue ca ra'xaỹaxaguii queca lauataq quenajo, chaqai quedajo totaxan ro'chii, ma' chaqaida 'neeta ma'le; qam saqa' novi' cá'maq nqodoc.

⁸ Ma' na ỹoreta'oguit qomyipi nco'ỹata' ma'le, chaqai na nashi ỹo'uet ca lauataq queca liỹa nashi, chaqai 'xoic na hua'ñi quiyim i'loxol na 'laua, chaqai 'ue ma'le ca nqopaaxa, chaqai 'xoic da ne'laxa. Qam dá'ogue dajo chaqai chicqochi'ñi cá'maq 'neeta ma'le ca ne'xoric.

⁹ Qam chi ncochiỹalta' qamiri, ma' qoỹaaneu'alo qamiri ma'le na nashillipi, chaqai huaugui ma'le ana lapoxoqui na judioipi, ca qaỹouaxanta'pe qamiri. Vire'ta qaraviguiu'a ma'le na nashillipi neloxoỹaripi quena qom chaqai ná'maq lashi na nashillipi sovitapigui aỹim. Ca' quiyi, ca' shichii 'xachii aỹim quena'maxare.

¹⁰ Ca ma' saqa' novi' ca nqodoc, ca' dajo na'qaatec chicqaugui da nca'laxa shi'gue qaỹa'xatem ma'le ná'ogue na qomyipi.

¹¹ Chaqai ma' qaỹauegueu'alo qamiri na nashillipi, mesqai 'xoic riỹalaxahi quecá'maq 'xachii chaqai mesqa 'yiiñitaque. Ta'ta'a quiyim 'xachii cá'maq ỹaanema qamiri ma'le ñi qota'olec quiyim 'xachii; ma' mesqai qamiri nauá'maq taxahi ma'le, ta'ta'a so Espíritu Santo só'maq retaqa ma'le.

¹² Na qomyipi chaqai ỹaañiguit ma'le ca lelauaxa ca lqaỹa, chaqai na neta'allipi chaqai ỹaañiguit ma'le ca lelauaxa na llaalqaipi, chaqai ca ñaalec chaqai ỹaañiguit ca lelauaqa' caua leta'al.

¹³ Ma'le, ca ná'ogue na qomyipi se nqo'talo qamiri, sovitapigui aỹim. Qam cá'maq ỹaatqajam quelec ỹovireta'a ca chi lqodoc, ca' chaqaica cá'maq ca'laaxaic ma'le.

¹⁴ So letaxaỹaxanqajnec ñi qota'a, leenaxat Daniel, na' ỹiriñi quiyim quecá'maq ỹo'uet cá'maq se qanqo'ta chaqai sogui nqai'en; ca ma' huañiỹa dajo qailla'ñi ca se loma'—ca cá'maq retaqalec najo, ca 'maxaraic quiyim ỹaatqajam ỹa'deenta—, ca ná'maq hueeta'ñi yi Judea i'guinshi'meguelo naua quemaralgoto ladocahi.

¹⁵ Chaqai quecá'maq hueetalec ca lauo' lelaq quecajo na'xa'a, se renotec quiyim 'ue ca icona'a louenec.

¹⁶ Chaqai cá'maq hueetauec quena no'ueenaxa, sqo pila'alo caua louenqa quiyim iconalo.

¹⁷ ¡Ca ỹaatqajam chalego le'xoric ma'le na 'aallipi ñaqai 'manaxaipi chaqai aná'maq ñaqai llipetac na llaalec quecajo na'xa'a!

¹⁸ Ca' qamiri shiilahi ñi qota'olec quiyim sqai hueetougui ca no'oomaxa ma' 'guiñiuec.

¹⁹ Ma' ỹaatqajam ne'xoyaxaqui' cauajo qaica nqai 'nejme' na'xata', shi'gue na' ñaqai chicqotañi na' ñaqai chita'gue qaỹo'uet na 'laua, chaqai se qaiuanapega ma'le ca 'nejem dajo ne'xoric.

²⁰ Ca no'm ñi qara'gaxala' que' nqai'ne' cauajo na'xata', ca' qaica quet cá'maq nca'leuec. Qam ñi'maxare paguec da le'xorenataxanaxa quená'maq lca'acseripi, ca' naqagaxachiñi sauajo na'xata'.

²¹ Ca no'm 'ue ca 'naac caqamiri: “'Ajñii, 'eda hueete'ena dá'maq nashi nca'laxaqui”, loqo'm 'naac: “'Ajñii, 'iyi hueete'e”, totaxan viilec.

²² Ma' 'xoic ná'maq anac ma'le 'maatqaiquipi, 'naac ma'le chaqaina ná'maq nashi nca'laxaqui loqo'm 'ec letaxaỹaxanqajnec ñi qota'a. Ma' na'maxare ishit ỹo'uet na netanqaipi chaqai ná'maq se qaiuanapega, sha'apiguito' quiyim ỹayin ná'maq shi'gue lca'acseripi ñi qota'olec.

²³ Qam ỹaatqajam ra'iichigui dá'maq shinac caqamiri, ma' ỹim shinac na' saqa'leca canchaqaica.

Dá'maq 'neeta ma' rapil so ỹale llaalec

²⁴ Qam ma' ime' cauajo ne'xoyaxaqui' na'xata', ca' ñi ra'aasa napalligui, chaqai ñi shiraigo qaica ca lauaq,

²⁵ ca' na huaqajñi najñi quena piguim chaqai na nquesaxanaxa hueeto'ot na piguim i'loxol ma'le.

²⁶ Ca ma'le, ca qaiuañi'chiguit najo ỹale llaalec naquetaugui na naueguelec, qam chalego da lquesaxanaxa chaqai da lauaq.

²⁷ Ca ila' ma'le na lelaatqaipi piguim laseripi quiyim lapoon ná'maq lca'acseripi quenaua'que naua lahil na 'laua, vire'ta ná'maq paguec lesega quena 'laua chaqai quena piguim.

²⁸ Ñaq napaxaguiñiỹa ma'le quiyim qaraloqojnaxañigui aca higo lashi: Ana'maxare quena' no'ualauec, ca' ñaxatec ana laue, ca' qamiri 'yiiñii quiyim nepalate' caua na'xata' npa'ỹaxari.

²⁹ Ca' chaqaida 'nejem ma'le ma' re'xoi' naua'que nauajo, ca' qamiri 'yiiñii nepalata ca nqodoc, sham novi'.

³⁰ Ỹaatqajam llic da shinac caqamiri, quiyim ná'ogue najo re'oq ma'le, ma' saqa' ileu na qomyipi hueetauguilo nauajo na'xata'.

³¹ Tot qaica ma'le na piguim chaqai na 'laua, qam naua ỹa'qaatqa se ishit quiyim se ipaguiguilo.

³² Qam quecá'maq na'xa'a chaqai ca laloqo' qaica ỹa'den, vire'ta na nelaatqaipi piguim laseripi, chaqai vire'ta ná'maq llaalec ñi qota'olec. Qaiñiita ñí'maq qota'olec maq ỹa'den.

³³ Vichiguiño' qamiri ỹaatqajam nelohitauec, chaqai na'maxachitañi chaqai nqouagaxaiñitac, ma' sqa 'yiiñii quiyim ỹovita ca laloqo' dajo.

³⁴ Ma' dajo 'nejem ca qom quiyim eec, qoỹoqo'tegue ca taigue. Qam ma' saqa' reloqouec, ca po'aanalec ca la'a' ca lelaatqaipi. Chaqai ỹaanem ca lo'ueenatec quiñi 'óna. Ime, ca' ila' so lasom lo'o quiyim reloqota'a.

³⁵ Ca' qamiri ỹaatqajam nelohitauec ma'le, ma' sqa 'yiiñii lagui novi' cá'maq lauo' ca 'imec, ma' sqoue novi' ma' napalchiguiñi, loqo'm ma' pe lauel, loqo'm ma' noỹen ca huaqa'e, loqo'm ma' richiitegueñi.

³⁶ 'Neeto' lotqai quiyim ne'laqataxanto novi', ca iuanalgoto qamiri laxaita.

³⁷ Dá'maq shinac caqamiri, shinapega ná'ogue: Quiyim nelohitauec.