Lucas 9 - La'qaatqa ñi qota'olec Qota'olec & Qota'olec Novita Na Qomyipi

So Jesús ila' so doce lapaxaguinatqaipi

¹ So Jesús lapoonta' saua doce lapaxaguinatqaipi, ca ỹaanem da la'ñaxac chaqai da lquesaxanaxa quiyim ỹo'daauec ná'ogue nanchaqaina ne'ec lecmaxaiquipi, chaqai quiyim ỹomatec na ỹoreta'oguit nalolaxaseteripi.

² Ca' ilate' quiyim ỹa'xate' quiyim ñi qota'olec ỹoiquentac ná'ogue najo, chaqai quiyim ỹomatec na ralolaxaic.

³ Ca' 'naapegalo' saua'maxare, 'naaco': —Sqaico' 'xachii quena nayic. Sqai 'xachii aca rashillichii, chaqaca qachoxoguii, chaqai ca qanoxohi, chaqaca qadamii. 'Xachii ca 'oonoqui' nelamaxaguii, mesqai dos.

⁴ Canchaqaica 'imec vireu'a, ca chaqaica ñiỹa'ñi, toco' ma' ỹovita quiyim quihe'e ca noma'.

⁵ Qam ca hua'ñi quiyim se qaicoñiỹaxaguit, ca' oquiỹa'e ca na'a'. Ca chigoxohi na lamoxoỹaxa quenaua qapiaachiri. Ca' chi netanec quiyim chi nasauaxaseteguelta' so'maxare.

⁶ Ime, ca' que' saua'maxare, querepegue' ná'ogue ná'maq hua'ñi na na'aaterolqai', ca' ỹa'xatesac da na'qaatec chicqaugui da nca'laxa chaqai ỹomaterec na ralolaxaiquipi.

Da 'neeta da lelauaxa só'maq nachilaxanataxanaq Juan

⁷ Ca' so nashi Herodes co'na' ỹa'den ná'ogue ná'maq ỹo'ueetetac so Jesús, ca' ỹaatqajam se ỹa'den ca 'neeta, ma' 'uo' na 'neetapega quiyim liỹa nca'leuec so Juan.

⁸ Chaqai 'uo' na 'neetapega chaqaiso so la'qaataxanqajnec ñi qota'a leenaxat Elías quiyim lotqai liỹa nachaxan. Chaqai 'uo' na 'neetapega quiyim sqoue cá queso 'auaxaic letaxaỹaxaquiripi ñi qota'a quiyim 'ue ca liỹa nca'leuec.

⁹ Qam so Herodes 'naaco': —Chaqaỹim selaataxanlec na'le quiyim qaichaxauec ca lqahic so Juan, qam ¿chi' nega'ỹo' case'e sa'qaateguelec quiyim ỹaatqajam 'xoic na na'qaataxanaxac? Ca' so Herodes ỹaatqajam ỹahotaque ỹauana so'maxare.

So Jesús qui'ỹaxan so cinco mil qomyipi

¹⁰ Co'na' so lapaxaguinatqaipi so Jesús mashic rapil, ca qara'qaataxantapeguem quedá'maq lo'ueenatqaipi. Ca' so'maxare nodaqajantec so qomyipi quiyim ỹauega yi 'laua sqoỹoqaque quiyi na'a' Betsaida.

¹¹ Qam co'na' qaỹa'den dajo queso qomyipi, ca co'uaataxan. Ca' so Jesús ỹacoñi'chiguit sá'ogue, ca ra'qaataxantapeguem queda 'neeta ñi qota'olec chaqaiñi ỹoiquentac ná'ogue najo, chaqai ỹomatec so ralolaxaiquipi.

¹² Ca co'na' mashic vit, ca saua doce lapaxaguinatqa noquiictot so Jesús. Ca' qohinapega so'maxare: —Pilaxachi' na qomyipi, qaiyi pil, ca' nco'matec ma'le. Chaqai idaanaque ca loq quenaua na'aate', loqo'm quena sqoỹoqaque, ma' quena seuqate'e ỹaatqajam sqaica canchaqaica.

¹³ Qam so Jesús 'naapegalo': —Qamiri 'ỹaañim cá'maq loq na'maxare. Ca saua'maxare 'neraco': —Qaica ca liỹa qonoq. Qainauate' naua cinco paañi' chaqai naua doosolqai' nalliñi'. Qaidaata no'm qomi' seshiujnaxanqaque ca na'ic, qaiyi que'e ná'ogue najo qomyipi.

¹⁴ Ma' sham ỹovi' cinco mil so ỹalliripi. Qam so Jesús 'naapega so lapaxaguinatqaipi, 'naaco': —'Ñiỹapega quiyim nqa'xanñi, lapo'ojta' cincuentatac nqai'ñii.

¹⁵ Ca' chaqaida qohine'tegue, ca sá'ogue nqa'xanñi.

¹⁶ Ca' so Jesús ỹaconalo saua cinco paañi' chaqai saua dos nalliñi'. Ime, ca' ra'ishiguim quena piguim, ỹaanot da na'aachic ñi qota'olec. Ca co'na' ime, ca ỹasectaqchiguilo, ca ỹaanouguilo saua lapaxaguinatqa, ca imeendec queso qomyipi.

¹⁷ Ca sá'ogue so qomyipi que'e, ca co'na' sá'ogue quema'. Ca co'na' ime, ca qalapon so ni'ỹoxot, no'qaate' saua doce canastos quena lahillipi.

So Pedro ỹa'xat so Jesús quiyim chaqaiso so nashi nca'laxaqui

¹⁸ 'Uo' so na'xa'a co'na' so Jesús nqouagaxaintac, nodaatec, ca' saua lapaxaguinatqa liỹareta'pe co'na'le. Ca inate', 'naaco': —¿Negue' ca 'naaco' quen na qom quiyim negue' aỹim?

¹⁹ Ca saua'maxare 'neraco': —'Ue na qom 'naac qami' Juan nachilaxanataxanaq, chaqai na liỹa 'naac qami' Elías, chaqai 'ue na liỹa 'naac sqoue quiyim 'ue ca nca'leuec quesaua 'auaxaiqa la'qaataxanqajanqaipi ñi qota'a quiyim liỹa nca'leuec.

²⁰ Ca lot inate' saua'maxare, 'naaco': —Qam qamiri ¿negue' ca 'ñiỹac caỹim? Ca' so Pedro 'naaco': —Qami' chaqaqami' na' qami' nashi nca'laxaqui, chicqoiro'ot ñi qota'olec.

So Jesús ỹa'xatalec da naata lelauaxa

²¹ Qam so Jesús qatalo saua'maxare quiyim qaica ca qara'qaataxana quedajo.

²² Chaqai 'naac: —Najo ỹale llaalec ỹaatqajam 'xoic ma'le ca le'xoric, chaqai se qaicoñiguit quena qo'xoiquipi, chaqai na lashillipi na letaxaỹaxanqajanqaipi na qomyipi quena' qaretaxaỹa'pegue' ñi qota'a, chaqai ná'maq rapaxaguinataxanta'pegue na naqataxaquipi, chaqai qaỹalauat ma'le. Qam ma' ỹovirerec caua tres na'xata', ca' liỹa nca'leuec.

²³ Ime, ca' 'naapega sá'ogue so qomyipi: —No'm 'ue ca ỹahotaque quegue aỹim, ca 'maxaraic quiyim coua'e da chi no'ueenataxac, ca' quegue aỹim naua'que naua na'xata', 'eno'chi na'laañi da nachaalataxac.

²⁴ Ma' ca nishiitaque nca'laxatec da nachaalataxac, ca na'laxatañi. Qam ca na'laañi da nachaalataxac soualec aỹim, ca chaqaica ca nca'laxatec da nachaalataxac.

²⁵ Ma' ¿negue' ca 'negue queca qom no'm laueguec ná'ogue na hueetalec na 'laua, qam na'laañi, loqo'm chi nasauaxatalta'?

²⁶ Ma' ca npocoxolec aỹim chaqai da ỹa'qaatec, qai'neeta najo ỹale llaalec npocoxolec ma'le ca'maxare, ma' ỹovirelec quiyim rapil ma' ỹovita quiyim nashi, naquetaugui da lauaq ñi leta'a chaqai na co'teeta lelaatqaipi piguim laseripi.

²⁷ Ỹaatqajam llic da sa'xat caqamiri 'vio' caua quená'maq hueete'ena nagui ỹalequetaho saqa' ileu iuanchigui ma'le ñi qota'olec ỹoiquentac ná'ogue najo.

Qaỹadalaxat da no'ueenataxac so Jesús

²⁸ Ca co'na' mashic ỹovi' ocho na'xata' ỹa'xat dajo so Jesús, ca quishi'megue aso qa' ladocai, ca nqouagaxain, liỹareta'pe saua Pedro, Jacobo, chaqai so Juan.

²⁹ Ca co'na' so Jesús nqouagaxaintac, ca ỹoqa'a da no'ueenataxac, na lashic chaqai saua loho ỹañigui, qashilec da lalacqa'.

³⁰ Ca' quiyi, ca re'xoi' saua dos qomi' retaqata'pegueto so'maxare. Qa' chaqaisauo' saua Moisés chaqai so Elías.

³¹ Ỹaatqajam hueesaugui so nqashilegaxa, qaica ca 'nejem lauaq. Ca' retaqasapigui da 'neeta ca lelauaxa so Jesús ma' ỹovita yi Jerusalén.

³² Qam so Pedro chaqai saua nauegaxaua' ỹaatqajam 'xoic na lelaxague'. Qam liyi neloosauec. Ca iuanchirigui da lauaq so Jesús chaqai saua dos ỹale' lapoota'to so'maxare.

³³ Ca' queco'na' saua ỹale' sham ỹore'ogalo nqo'neesauec queso Jesús, ca retaqa so Pedro, 'naaco': —Qami' napaxaguinataxanaq, ¡chalego la'maxa quiyim quenajo seuqate'e! So'ueetaxai' caua tres ni'ỹaxaqui', 'óna caqami', chaqai ca liỹa queda Moisés, chaqai ca liỹa queda Elías. Qam so Pedro se ỹa'den ca 'neeta da la'qaatec.

³⁴ Ca co'na' ñaq retaqatac, ca novi' so naueguelec, ca ỹaatqajam lepajlgoto, ca' ỹaatqajam 'uo' da lqolonqa' co'na' iuanchirigui quiyim hueesaugui so naueguelec.

³⁵ Ca 'uo' so qara'xaỹaque na'qaatec, 'maqatougui so naueguelec, 'naac: —'Eda da ỹaalec ỹoqo'itaxat, chaqaida na'xaỹaxañiỹa.

³⁶ Ca co'na' ỹoxogue sojo na'qaatec, ca lotqai qaiuane'ta so Jesús qaidaatam. Ca saua'maxare i'maretem', chaqai sqaica ca ra'qaataxanta quedá'maq ỹauanchirigui.

So Jesús ỹomatec so ne'nec 'uo' so neetagui lecmaxaic

³⁷ Ca queca liỹa na'xa'a, co'na' rapilliñi caso qa' ladocai, 'xoico' na qom qateta'guit so Jesús.

³⁸ Ca 'uo' so ỹale 'maqachiguiñigui so qomyipi, retaqa, netenegue da la'qaatec, 'naaco': —Qami' napaxaguinataxanaq, ñaq qouaquiric 'ajñi' yi ỹaalec. Ma' ỹaatqajam qaiyiita 'oonoqui' ỹaalec.

³⁹ 'Uo' so le'ec lecmaxaic quena' ỹovitot, ca' ỹaualqachit chaqai ileueta nqai'en. Ca nac nqai'en na ro'i quena lap. Ỹaatqajam 'ue da lqa'viic, chaqai sqai ỹaxanec.

⁴⁰ Qam mashic shi'gue ñi'xoresene'toto daua rapaxaguinataxahi' quiyim ỹo'derauec, qam se ishite'.

⁴¹ Ca' so Jesús 'naaco': —¡Ca quena qomyipi sqaica nqai huelec chaqai hualoxonyipi! ¿Tegue' canchaqa lagui viitaque quiyim qamiri iỹaata'pe quiyim ñaqai eec da iualaxavic? Naviquitegue najo ca qachaalqui'.

⁴² Qam co'na' noquiigo so ne'nec, ca' so le'ec lecmaxaic nenaxañi quena 'laua, ca lotqai ileueta nqai'en. Qam so Jesús nelaxa so le'ec lecmaxaic, ca imeuec nqai'en so ne'nec. Ime, ca ỹopilaxatot so leta'a.

⁴³ Ca sá'ogue so qomyipi ỹaatqajam 'ue da le'laxa queda lquesaxanaxa ñi qota'a. Qam co'na' ñaqai sá'ogue i'laqatapega da lo'ueenataxanaxac so Jesús, ca so'maxare 'naapegalo saua lapaxaguinatqa, 'naaco':

So Jesús lotqai liỹa ỹa'xat da lelauaxa

⁴⁴ —Ñaqai ỹaatqajam na'xaỹaxañii'ta dajo, chaqai se couahi'e quiyim najo ỹale llaalec qoỹaanougui ma'le na qomyipi, ca na'maxare ỹoiquentac ma'le.

⁴⁵ Qam so lapaxaguinatqaipi se ỹa'den da qohintapega, ma' chi qohinegue se qaỹa'deenaxanaxanegue chaqai 'ue da lqolonaxa quiyim rashiilaxan quiyim qaỹa'xatem ca leloxaỹaxac da na'qaatec.

¿Negue' cá'maq paguec lecaic?

⁴⁶ Ca' so lapaxaguinatqaipi nqueuoreta'ta' quecá'maq paguec lecaic quesaua'maxare.

⁴⁷ Qam so Jesús ỹa'den da la'deenataxanaxac saua'maxare. Ca' ỹacone'oga so noctoqui', ca nauaxaỹaxane'e'.

⁴⁸ Ca 'naaco': —Ca icoñiguit najo noctoqui' quiyim ỹaatqajam huelec aỹim, ca' chaqaỹim icoñiguit. Ca cá'maq icoñiguit aỹim, icoñiguit qai'neeta ñí'maq yila'. Ma' cá'maq 'ec sqaica ca lemaqachic caqamiri, ca' chaqaica cá'maq paguec ma'le ca lecaic.

Ca mesqai qomi' npa'guenaxaua', ca chaqaica ca qomi' lqoshaxaua'

⁴⁹ Ca' so Juan 'naaco': —Qami' napaxaguinataxanaq, 'uo' so seuanaxa ỹale ỹo'deetapeguec na ne'ec lecmaxaic, ro'goxontapega da qadeenaxachi', qam se sa'maxarenaq, ma' se liỹareta'pe qomi'.

⁵⁰ Qam so Jesús 'naaco': —'E', sqo lliỹapeguem, ma' no'm se qanpa'guenaxaua, ca' chi qarotaua.

So Jesús nelaxalo saua Jacobo chaqai so Juan

⁵¹ Ca co'na' tot qoỹoqaque quiyim so Jesús taigue da piguim, ca ỹa'ñaxachigui na lauel quiyim taigue da Jerusalén.

⁵² Ca ỹa'auaxante' saua lelaatqa, ca saua'maxare querepegue' na hua'ñi na sqailligueme' na qom quiyi 'laua Samaria, qaiyi ỹa'maqatañi 'ue ca lanatqa'.

⁵³ Qam so qomyipi na'ñi yi Samaria se ỹacoñiguit so'maxare, ma' ỹa'den taata'gue da Jerusalén.

⁵⁴ Ca' saua lapaxaguinatqa Jacobo chaqai so Juan na' ỹa'deene' dajo, ca 'neraco': —Qami' qara'gaxala', ¿tegue' chaqai 'maxariñi' quiyim soỹaxanqaque ca norec chicqo'ot na piguim, qaiyi nomatañi ná'ogue na'maxare, 'nejem ca 'ne'tegue na'le so la'qaataxanqajnec ñi qota'a leenaxat Elías?

⁵⁵ Ca' so Jesús ra'ỹauguilo saua'maxare, ca retaxaỹalo, ca 'naapegalo': —Qamiri sqa 'yiiñii negue' ca se re'xogui chicqo'ot dajo se no'uen ra'deenataxanaxaguii.

⁵⁶ Ma' najo ỹale llaalec mesqa naque quiyim na'laxatañi na nachaalataxac na qomyipi. Chaqaidaata quiyim ỹahotaque nca'laxatec. Ime, ca' que', querepegue' ca liỹa na'a'.

Saua ỹahosaque quetegue so Jesús

⁵⁷ Ca co'na' queesa'gue so nayic, ca 'uo' so ỹale 'naac queso Jesús: —Qami' ỹa'gaxala', aỹim sahotaque shiguegue qami' quecanchaqa 'itegue.

⁵⁸ Ca' so Jesús 'naaco': —Aca nouaxaỹaxa 'ue lauac, chaqai ana qo'oole ná'ogue 'ue na lpa'gue', qam najo ỹale llaalec qaica ca lo'xaỹoqsoqo'.

⁵⁹ So Jesús ca lotqai 'naapega so liỹa: —Quitegue aỹim. Qam so'maxare 'naaco': —Qami' ỹa'gaxala', ñaq yayaxañirac ñaqa 'au seshinñi yi ita'a.

⁶⁰ Ca' so Jesús 'naaco': —Ñaqa 'xañirac ná'maq 'ec leuaxaiquipi ñaq ishinñi na lasouaxanqaipi. Qam qami' qui', 'xachi' quiyim ñi qota'olec ỹoiquentac ná'ogue najo.

⁶¹ Ca 'uo' so liỹa 'naac: —Qami' ỹa'gaxala', sahotaque shiguegue qami', qam ñaqai 'au spoyiguin yi iuo'.

⁶² Qam so Jesús 'naaco': —Ca qom quiyim mashic ỹashil-lec ca lasaugaxanaxat, ca nqovilca, ca' sqa taiguit da lo'ueenataxanaxac ñi qota'olec quiyim ỹoiquentac ná'ogue najo.