Lucas 17 - La'qaatqa ñi qota'olec Qota'olec & Qota'olec Novita Na Qomyipi

Da lichic queca qom quiyim 'ue ca lasauaxaset

¹ So Jesús 'naaco' queso lapaxaguinatqaipi: —Aỹim ỹaatqajam sa'deenta quiyim sqoue ca 'em quena qom 'ue ca lasauaxaset; qam ¡'xoic le'xoric ca qom quiyim 'ue nqai'en ca lasauaxaset ca liỹa!

² Ca no'm 'ue ca sham chicqochigui ca lasauaxaset ca 'óna quenajo collo'olqaipioqui', ca'maxare paguec la'maxa quiyim qaicoñira'gue na lqosot ca qa' lodegaxat nopoxoiqataxanaxat, ime, ca' qainaxañigui aca huaaxai.

³ Ca' rovichiỹari'o'. No'm ca rqaỹa'e' ỹo'uet ca se ỹa'maxañi caqami', ca' taxahita ca'maxare. Ca no'm netogochigui na lauel, ỹadalaxat ca no'ueenataxac, ca' mesqo quirapeguem, 'xoriñi'.

⁴ 'Eno'm chaqai ỹovi' siete ỹo'uet ca se ỹa'maxañi queca na'xa'a, chaqai siete rapilau'a qami' quiyim 'naapega qami', 'naac: “Nagui tot sopilalec 'ue ca so'uet se ỹa'maxañi caqami'”, ca' qami' paguec la'maxa quiyim sqo quirapeguem chaqai 'xoriñisac ca'maxare.

Dá'maq 'neeta da lquesaxanaxa ca npi'ỹaxac

⁵ Ca' so lelaatqaipi 'nerapego' so Jesús, 'neraco': —Qami' qara'gaxala', noquigaqchirishiguim ma'le ca qarpi'ỹaxac.

⁶ Ca' so qara'gaxala' 'naapegalo' saua'maxare, 'naaco': —Qamiri quiyim 'ue ca rpi'ỹaxaguii quiyim lecaato'lli' ana la ana leenaxat mostaza, ca' 'ñiỹapega ada qo'paq late'ogue', 'ñiỹac: “Oquire'e na ñi'sa'ñi, ime, ca' nqo'ñiri'ingui aso huaaxai”, ca' ada qo'paq na'xaỹaxane'talo qamiri.

Da lo'ueenataxanaxac cá'maq qailaretac

⁷ No'm 'ue ca 'óna caqamiri 'ue ca lelaatec, quiyim ca'maxare chicqa'oga na no'ueenaxa quiyim ỹomat lasaugaxanaxac, loqo'm reloqota'a ca qaloi'ipi, ¿peeta'a qami' shichi' 'ñirapega: “Nenoxoñiro, nqa'amiriñi, qui'i'”?

⁸ 'E', ta'ta'a quiyim 'ñirapega: “'Maxachiriñi ca noq, chaqai quelollira'pegue' aỹim, toco' ma' ime sque'e chaqai ñi'et. Ca' qaigueme shichi' qui'i' chaqai ni'chi' qami'.”

⁹ Ca' ¿peeta'a shichi' quiyim 'ỹaañitem ca na'aachicyaxaqui' ca relaachiqui' quiyim mashic ỹomat cá'maq lachirelec? 'E'.

¹⁰ Ca' da 'neeta ma'le caqamiri ma' ỹovita quiyim ime dá'ogue da qailarelgoto qamiri quiñi qota'olec, ca' 'ñiỹac: “Qomi' ma' qomi' nelaatqa, ỹaatqajam qaica ca shinaxague, ma' ná'maq so'ueetqatac chaqainaata ná'maq chi qailaroxolec.”

So Jesús ỹomatec so diez qomyipi rishiita na loshicmaxa

¹¹ Ca co'na' mashic eec so Jesús taigue da Jerusalén, quiichiguilo' yaua 'lauari huauguilo yi Samaria chaqai yi Galilea.

¹² Ca co'na' ỹovita só'maq hua'ñi na na'aaterolqai', ca' qaỹanaqta'guit so'maxare queso diez qomyipi mashic rishiita na loshicmaxa, qam qoỹoqo'ta yi hueete'e queso'maxare.

¹³ Ca' ỹaualqagui, 'naaco': —Jesús, qami' napaxaguinataxanaq, qare'xoriñi'.

¹⁴ Ca' so Jesús co'na' iuana so qomyipi, ca' 'naapego': —Quiipegue', nachaxañiu'a cá'maq letaxaỹaxanqajanqaipi na qomyipi quena' qaretaxaỹa'pegue' ñi qota'a. Ca' co'na' queeta'gue so nayic so qomyipi, ca chaqa'ma' imeuec.

¹⁵ Ca so 'óna queso qomyipi co'na' iuana quiyim mashic imeuec na loshicmaxa, ca' pil, ỹaantacot da na'aachicyaxac ñi qota'olec, ỹaatqajam ỹaualqatari'.

¹⁶ Ca ỹa'yi'iñi naua le'cootal queca reloqota'ñi so Jesús, ỹaatqajam ỹoviraqta'guit na latap na 'laua, ca' ỹaantacot da na'aachic so'maxare. Qam sojo ỹale, so'maxare le'ec yi Samaria.

¹⁷ Ca' so Jesús 'naaco': —¿Mesqai diezo' ca imeuec nqohin na loshicmaxa? ¿Hueesa'gue caua liỹa' nueve?

¹⁸ Yijo chicqa'a ca liỹa 'laua, ¿chaqaiyiito' yi'maxare 'oonoqui' rapil ỹaanot da na'aachicyaxac ñi qota'olec?

¹⁹ Ca' 'naapega so ỹale, 'naaco': —Ñirishiguim ma'le. Ime, ca' qui'. Mashic qami' remi'rec, ma' qami' vi'relec.

Da 'neeta ca loviraxac dá'maq lo'ueenataxanaxac ñi qota'a ma' ỹoiquentac ná'ogue najo

²⁰ Ca' so fariseoipi inatetac so Jesús lagui novi' cá'maq lo'ueenataxanaxac ñi qota'a ma' ỹoiquentac ná'ogue najo. Ca' so'maxare saat, 'naaco': —Ca loviraxac da lo'ueenataxanaxac ñi qota'a ma' ỹoiquentac najo, ca'maxare se re'xogui.

²¹ Chaqai se qohinac: “'Ena hueeta'ñi”, loqo'm “'Eda hueeta'gue”; ma' da lo'ueenataxanaxac ñi qota'a mashic hueetanguilo qamiri.

²² Ca' 'naapega so lapaxaguinatqaipi, 'naaco': —'Vio' ma'le caua na'xata' quiyim qamiri viitaque huañiỹa 'eno'chaqai 'oonoqui' quecaua na'xata' najo ỹale llaalec ma' liỹa novi', qam sqai huañiỹa.

²³ Ca' quiyi ma'le, ca' qohiñiỹapegaxaua': “Najo hueete'e”, loqo'm “'Iyi hueeta'ñi.” Qam mesqo quii, chaqai se coỹari'tegue.

²⁴ Ma' 'nejem quiyim qaiuana ca lauaq ca nqai'legaxa quena' nqai'lliguiñi quená'ogue na piguim, ca' chaqaida 'neeta ma'le ca loviraxac najo ỹale llaalec ma' ỹovirelec quiyim ca na'xa'a quiyim rapil.

²⁵ Qam 'au quiyim 'xoic ma'le ca le'xoric, chaqai se qaicoñiguit quena qomyipi hueetauguilo nauajo na'xata'.

²⁶ Ca 'nejem ma'le da 'neete' saua ñaxari hueetauguilo nallaaqo' so Noé, ca' chaqaida 'neeta ma'le caua na'xata' ma' rapil najo ỹale llaalec.

²⁷ So qomyipi que'eetac, chaqai ne'teetac, shiltecta' chaqai ỹaantapeguec ana llaallipi quiyim 'on, chi ỹovireta'a so na'xa'a co'na' so Noé inoxonougui aso lo'ueenata qom lahi' huaxaỹaqse. Ca' naco' so ỹaxat, ca' nomachichiguiñi sá'ogue so qomyipi.

²⁸ Ca' chaqaida 'neete' saua ñaxari hueetauguilo so Lot: so qomyipi que'eetac, chaqai ne'teetac, chaqai chi nemeentecta', chaqai danaxantac, chaqai ỹo'ueeteta'pe naua la'aate'.

²⁹ Qam co'na' so Lot ca'e yi na'a' Sodoma, ca' naco' so norec ỹalliqui'chiguit na quiquiaxaic, chicqo'ot na piguim, ca' ỹalauat sá'ogue so qomyipi.

³⁰ Ca chaqaida 'neeta ma' ỹovi' ca na'xa'a quiyim liỹa nachaxan najo ỹale llaalec.

³¹ Ca' quecajo na'xa'a, no'm 'ue ca hueetalec na lelaq ca lauo', chaqai 'ue ca hueetaugui louenec ca lauo', se renotec quiyim queu'a; chaqai no'm 'ue ca hueeta'oga ca no'ueenaxa, mesqo pila'a ca la'a'.

³² Totaxan 'laxachiỹo' da 'neeta na'le aso loua so Lot.

³³ Ma' ca ỹahotaque nca'laxatec da nachaalataxac, ca' na'laxatañi; qam ca na'laxatañi da nachaalataxac, ca' chaqaica cá'maq nca'laxatec.

³⁴ Ca' ỹim shiñiỹapegaxaua' quecajo pe 'vio' ma'le caua napaata'anta', qam 'oonoqui' ma'le ca qaỹauec quecaua'maxare, qam ca liỹa qano'ueenaqtañi.

³⁵ Chaqai 'vio' ma'le caua dos 'aalo ra'daxanta'pe, huaqata'ta', ca' 'oono'lli' ma'le aca qaỹauec, chaqai aca liỹa qano'ueenaqtañi.

³⁶ Chaqai 'vio' ma'le caua dos ỹale' hueesalec na no'ueenaxa, ca' 'oonoqui' ma'le ca qaỹauec, qam ca liỹa qano'ueenaqtañi.

³⁷ Ca co'na' qara'qaachigui dajo, ca' qainat so'maxare, qohinaco': —Qami' qara'gaxala', ¿canchaqai hua'gue ma'le dajo? Ca' so'maxare 'naaco': —Cá'maq hueeta'gue ma'le ca leuaxaic, ca chaqaica ca hua'ñi ca lapooqo' na ratecsanyipi.