Lucas 1 - La'qaatqa ñi qota'olec Qota'olec & Qota'olec Novita Na Qomyipi

Da 'avichiguiñi la'qaatec so Lucas

¹ Mashic 'xoico' so qom ỹahotaque quiyim ỹiriñi dá'ogue dá'maq 'neeta da no'ueenataxanaxac quena' hueetauguilo qomi'.

² Ca saua'maxare ỹichiñi chaqaida dá'maq qarapaxaguinegue sauá'maq ỹauanchirigui da no'ueenataxanaxac na' llaqatachiguiñi, chaqai rotaanaxandegue quiyim ỹa'xate' da na'qaatec.

³ Chaqai aỹim liỹa ỹaatqajam somatetac ñapaxaguintapega dá'ogue sa'maxate'tegue quecá'maq chicqochi'ñi. Ca vichiguiño', caỹim ỹa'maqachiguiñi nqaishin quiyim shiriñi dá'ogue da 'neeta, ca' selata qami' ñauochaxaua ỹaqaỹa Teófilo,

⁴ qaiyi ỹaatqajam 'yiiñite' quiyim llic dá'maq qarapaxaguiñitegue.

So chicqashiguim qota'a lamaxasec ỹa'xat da ne'xaỹoqsoxoc so nachilaxanataxanaq Juan

⁵ Co'na' so Herodes ñaq nashi, reloqota'a yi 'laua Judea, ca 'uo' so ỹale leenaxat Zacarías só'maq letaxaỹaxanqajnec na qomyipi quena' qaretaxaỹa'pegue' ñi qota'a. So'maxare ỹalequetaugui na netaxaỹaxanqajanqaipi chicqota'guit so Abías. Chaqai aso loua Elisabet, aso'maxare qai'neeta chi laual so netaxaỹaxanqajnec leenaxat Aarón.

⁶ Saua'maxare ỹaatqajam no'viiñi qomi', ỹa'maxarente' ñi qota'olec. Chaqai ỹaatqajam na'xaỹaxanteta dá'ogue da lelaataxanaxaquipi ñi qara'gaxala'. Ca vichiguiño' se qaishit 'ue ca qaipataxalec lasauaxasete' saua'maxare.

⁷ Qam saua'maxare qaica ca llaalegue', ma' aso Elisabet se co'o, chaqai saua'maxare mashic ỹaatqajam qo'xoiqa.

⁸ Ca 'uo' so na'xa'a co'na' ỹovita so laloqo' quiyim inoxono ro'ueenataxan ná'maq ỹalequetaugui so Zacarías quiyim ỹo'uet na lo'ueenatqaipi ná'maq retaqata'pegue' ñi qota'olec.

⁹ Qam dá'maq no'ueenataxaco' quen na netaxaỹaxanqajanqaipi queso na'xa'a nallijta', ca tajalco' so Zacarías, ca chaqaiso inoxonougui na lauel aso no'ueenaxanaxaqui late'ogue' quiyi Jerusalén, ma' yi huaugui quena' qaỹo'uen ñi qara'gaxala', qaiyi ỹavigaxat na nichiinaxanaxat ná'maq lo'daxaraic na lahita.

¹⁰ Ca co'na' ñaq ỹavigaxatetac so nichiinaxanaxat, ca sá'ogue so qomyipi nqouagaxaintac, pa'aatauec queso nasoxoc.

¹¹ Ca' qanachaxano' so Zacarías queso nelaatec piguim le'ec quiñi qara'gaxala'. So'maxare nachaatetañi, pa'aata'gue da loic aso ncopatoxonaxalate quena nichiinaxanaxat lo'daxaraic lahita.

¹² Ca co'na' iuana so nelaatec piguim le'ec so Zacarías, ca' ỹaatqajam se ỹa'den ca 'neeta, chaqai ỹaatqajam 'xoic da lqolonaxa.

¹³ Qam so nelaatec 'naaco': —Zacarías, se ro'chi'i', ma' ñi qota'olec 'qaatapega da nqouagaxainaxaqui'. Ca' nagui añi roua'e' Elisabet 'uo' ma'le ca llaalec. Ca' ca'maxare ñiteco' ma'le leenaxat Juan.

¹⁴ Ca' ỹaatqajam 'uo' ma'le ca ra'maxa'e' chaqai ca netoonaxaqui', chaqai ỹaatqajam 'xoic ma'le na netoonta'pegue da ne'xaỹoqsoxoc ca'maxare.

¹⁵ Ma' ca qachaalqui', ca'maxare ỹaatqajam lodegaxat ma'le nqohin quiñi qota'olec. Ca'maxare se ishit ni'chigui canchaqaica quena lataxa, ma' ỹaatqajam no'qaachigui queso Espíritu Santo ma' saqa' ne'qaañi.

¹⁶ Ca'maxare ỹo'uet quiyim ỹaatqajam 'xoic quena Israel llaalqaipi pila ñi qara'gaxala' qota'olec ñí'maq lashiilec.

¹⁷ Qam cajo Juan, ca'maxare 'aueta'gue ma'le ca taata'gue ñi qara'gaxala'. Qam ỹantañi ma'le da no'ueenataxac chaqai da la'ñaxac so qota'a la'qaataxanqajnec Elías, qaiyi ca neta'a huaguiguit ca llaalec qaiyi sqaicanqaida; chaqai ná'maq se na'xaỹaxan, ca' ỹa'den na'xaỹaxan. Chaqai ỹaqatqajantari' ma'le quena qomyipi, qaiyi leuoteta quiyim qaỹacoñiguit ca qara'gaxala'.

¹⁸ Ca' so Zacarías inato' so qota'a lelaatec: —¿Nega'ỹo' ca 'neeta ca leloxoỹaxac, qaiyi aỹim sa'deenta dajo? Ma' ỹim mashic aỹim qo'xoic, chaqai añi ỹoua.

¹⁹ Ca' so nelaatec 'naaco': —Aỹim chaqaỹim Gabriel, ma' sento'ot ñi qota'olec. Ca' ñi'maxare nela' aỹim quiyim setaxaỹa'pegue' qami' quiyim sa'xatem qami' da no'uen ra'xaỹaxaqui'.

²⁰ Qalaxam qami' sqai vi'relec dá'maq shinac, ca' nagui sqaicaua ma'le caua ra'qaataxahi'. Se ishit taxahi', toco' ma' ne'qaañi ca qachaalqui'. Ca da'maxare ipaquichigui ma'le ma' ỹovita ca laloqo'.

²¹ Qam so qomyipi pa'aatauec, nauaantaque so Zacarías, so'maxare ỹaatqajam 'uo' da le'laxa, ma' sqaua' nenoxonec so'maxare cañi no'ueenaxanaxaqui late'ogue'.

²² Ca co'na' nenoxonec so Zacarías, ca se ishit retaqa. Ca' qaỹa'den quiyim 'ue ca qaỹauanaxanaxanegue queda pa'aauo caso no'ueenaxanaxaqui late'ogue'. Ca so'maxare ra'qaataxanem so qomyipi, qam ỹahota'ahi naua napoquena, ma' qaicaua naua la'qaatqa.

²³ Ca co'na' inoxondec saua na'xata' lo'ueenataxanaxaqui' so Zacarías quiyim ro'ueenataxantapougui añi no'ueenaxanaxaqui, ca' queho, quepegue' ca la'a'.

²⁴ Qam co'na' shi'gom dajo, ca aso loua Elisabet 'manaxai. Ca so'maxare se nenoxonec quiñi lauo', ỹoviraqterauec saua cinco shiriguiri quiyim ra'deenataxantac queca 'neeta:

²⁵ “Ñi qara'gaxala' ỹo'ueeto' nagui dajo, qaiyi na qomyipi se ishit quiyim se nqo'chiiua'.”

So nelaatec chicqashiguim ỹa'xat ca ne'xaỹoqsoxoc so Jesús

²⁶ Ca co'na' mashic inoxondec saua seis shiriguiri, ca' ñi qota'olec ilata so Gabriel yi na'a' Nazaret huaugui yi 'laua Galilea,

²⁷ quiyim quepegue' nqai'en aso 'aalo ñaq nequetegaxai leenaxat María. Aso'maxare mashic ỹahotaque o'ñiguit so ỹale leenaxat José. So'maxare chi laual so nashi David.

²⁸ Ca' so chicqashiguim nelaatec inoxono queso 'imec quiñí'maq neetaugui aso'maxare. Ca' iquin, 'ne'tegue: —¡Qami' mashic qami' nqouaguegue ñi qara'gaxala' qota'olec! Ñi'maxare qami' ima'guit. Ñi'maxare ỹaanem qami' da lqouagaxa, ca' sqaca nqai 'nejem aqami' caná'ogue ana liỹa 'aalo.

²⁹ Qam aso'maxare co'na' iuana so nelaatec, ỹaatqajam no'daxatetec dajo na'qaatec. Ca aso'maxare chi nenateteguelta' queca 'neeta: “¿Negue' ca 'neeto' da ñiquinaxac?”

³⁰ Ca' sojo nelaatec 'naaco': —María, qami' se ro'chi'i', ma' ñi qota'olec ỹaatqajam ỹa'maxarenta qami'.

³¹ Nagui qami' 'manaxai ma'le. Ime, ca 'uo' ca qachaalqui'. Ca' ỹañitegue leenaxat Jesús.

³² Ma' ca'maxare ỹaatqajam lodegaxat, chaqai qaỹamata'gue ma'le llaalec ñi qota'olec maq lodegaxat. Ma' ñi qota'olec ñí'maq qara'gaxala' ỹano ma'le ca'maxare quiyim nashi, 'nejem so chigoxougui nashi David,

³³ qaiyi ca'maxare se neme ma'le quiyim reloqota'a na llaalqaipi so Israel. Qam dajo lo'ueenataxanaxac quiyim nashi, ca' sqaica lqodoc.

³⁴ Ca' aso María inato' so lelaatec ñi qota'olec, queca 'neeta: —¿Negue' ca 'neeta ma'le dajo? Ma' aỹim saqa' seuanapega ca ỹale.

³⁵ Ca' so nelaatec 'naaco': —Ca Espíritu Santo ta'ñigui qami' ma'le, ca' da la'ñaxac ñi qota'olec ma' lodegaxat ỹapolec qami', 'nejem ca naueguelec. Ca vichiguiño' cajo noctoqui' ma' ne'qaañi, ca'maxare ỹaatqajam qoỹaanot quiyim hueeto'ot ñi qota'olec. Ca' qaỹamata'gue llaalec ñi'maxare.

³⁶ Chaqai añi qauochi' lase Elisabet, añi'maxare 'uo' ma'le ca llaalec, 'eno' mashic qo'xoi. Añí'maq qohinac quen qaica ca llaalec, ca' nagui mashic ỹovite' naua seis shiriguiri quiyim 'manaxai.

³⁷ Ma' ñi qota'olec sqaica ca lqalanec.

³⁸ Ca' aso María 'naaco': —Aỹim chaqaỹim la'a ñi qara'gaxala'. Ca' no'uen quiyim ipaquichigui caỹim ma'le da la'qaatec ñi qota'olec. Ca' quiyi, ca' eec so nelaatec piguim le'ec.

Aso María ra'piichi, quepegue' aso Elisabet

³⁹ Ca' quesaua na'xata', ca aso María iỹala quiyim quepegue' yi na'a' huaalec yi qoỹoqoshi'megue 'laua, leenaxat Judea.

⁴⁰ Ca quepegue' so la'a' so Zacarías, ca' iquin aso Elisabet.

⁴¹ Ca' aso Elisabet co'na' 'xaỹaque da niquinaxanaxac, ca' so noctoqui' mashic hueetagui na lauel redaalec, ca' aso'maxare ỹaatqajam no'qaachigui queso Espíritu Santo.

⁴² Ca' aso'maxare ỹaatqajam nelamaxaren 'ne'teco': —Ñi qota'olec ỹaanem qami' da lqouagaxa, ca' sqai 'ñiite'm ná'ogue na liỹa 'aallipi. Chaqai ca qachaalqui' ỹaanem da lqouagaxa.

⁴³ ¿Negue' queto' aỹim quiyim aỹim nouoỹa adá'maq late'e ñi qara'gaxala'?

⁴⁴ Ma' cana' sa'xaỹaque da riquinaxanaxaqui', ca' idaxanac da netoonaxac yi noctoqui' mashic hueetaugui na iuel.

⁴⁵ Ca' ỹaatqajam ra'maqaichiriñi, ma' vi'relco' da qohinac, ma' ỹaatqajam ipaquichigui ma'le da 'naac ñi qara'gaxala'.

⁴⁶ Ca' aso María 'naaco': Na iuel ỹaatqajam ỹo'ueentac ñi qara'gaxala',

⁴⁷ chaqai da ñachaalataxac ỹaatqajam netoonta'pegue ñi qota'olec ñí'maq ica'laxala'.

⁴⁸ Ma' ñi'maxare ỹaconta'o' aỹim qaica ca imaqachic la'a, ca' nagui, ca chicqochi'ñi quiyim ná'ogue na qomyipi ỹamata'gue aỹim quiyim ỹaatqajam ya'maqachiguiñi.

⁴⁹ Ma' ñi qota'olec sqaica ca lqalanec chaqai ỹaatqajam lodegaxat dá'maq ỹo'uet caỹim; chaqai dá'maq leenaxat ñi'maxare ỹaatqajam se neualaxait.

⁵⁰ Ñi'maxare chaqai 'neetari' 'ue da le'xorenataxanaxa quená'ogue ná'maq ỹaatqajam no'cha'a ñi'maxare.

⁵¹ Chaqai ñi'maxare ỹaatqajam sqaica 'nejem da lquesaxanaxa da lo'ueenataxanaxac, chaqai loxonec ná'ogue na nemaqajnaxairipi.

⁵² Chaqai ná'maq 'ñaaxaiquipi ỹaxañiñi nqai'en naua lo'ueenataxanaxaco, qam na 'xoraiquipi, ca lot navicshiguim.

⁵³ Chaqai ná'maq 'xoic ca louenaxanaxa, ca ỹaanem quiyim qaica ca ỹouen nqai'en, qam na nesallaxanqaipi lotqai co'taxachichiguilo naua laua', ca' ilarec.

⁵⁴ Ca' ỹotauan na llaalqaipi so Israel só'maq lelaatqaipi, chaqai se coua'e da le'xorenataxanaxa queso'maxare.

⁵⁵ Quedá'maq chaqai'en ỹachaxantapeguem nallaaqo' so 'auaxaic qareta'allipi, so Abraham chaqai so llaalqaipi.

⁵⁶ Ca' aso María no'ueena'ansop aso Elisabet, 'uo' ca tres shiriguiri. Ca co'na' ime, ca pila ca la'a'.

Co'na' ne'qaañi so nachilaxanataxanaq leenaxat Juan

⁵⁷ Ca' ipaquichigui co'na' ỹovita ca laloqo' quiyim co'o aso Elisabet, ca 'uo' so llaalec.

⁵⁸ Ca ná'maq sqoỹoqaque quiyi la'a' chaqai na lauo' laseripi nqo'ta aso'maxare qanetoonta'pegue co'na' qaỹa'den quiyim ñi qara'gaxala' ỹaatqajam 'xoic da le'xorenataxanaxa caso'maxare.

⁵⁹ Ca co'na' ỹovite' saua ocho na'xata', ca qaỹodouo so noctoqui' quiyim qaỹa'ue ca netanec na loshicmaxa. Ca' qaỹahotaque quiyim qoỹanegue da leenaxat so leta'a Zacarías.

⁶⁰ Qam aso late'e 'naaco': —'E', na'maxare leenaxato' nqohin Juan.

⁶¹ Ca qohinapego' aso'maxare: —¿Chi'neco'? Ma' sqaica ca leenaxat dajo quena qauochi' laseripi.

⁶² Ca' qaỹahota'ahi naua poquena co'na' qainat so leta'a so noctoqui', qaiyi ỹa'den negue' ca neenaxat qaỹahotaque qoỹanegue so'maxare.

⁶³ Ca' so leta'a roỹaxanaque so leraxanaxala', ca' ỹiriñi: “Juan dá'maq leenaxat.” Ca 'xoic da ne'laxa quedajo.

⁶⁴ Ca' quiyi so Zacarías lotqai liỹa 'vii naua la'qaatqa, ca ỹo'ueentac ñi qota'a.

⁶⁵ Ca' quiyi, hua'ñi sá'ogue so la'aayaxauaripi ỹaatqajam 'uo' da le'laxa chaqai sá'ogue só'maq neetalec so qoỹoqoshi'megue 'laua Judea, so qomyipi chaqa'ma' na'xachigui da 'neeta dajo.

⁶⁶ Ca' ỹaatqajam ra'deenataxantac ná'ogue ná'maq ỹovira'oga quiyim ỹa'den dajo chaqai nenatetecta' queca 'neeta: —¿Tegue' canchaqai 'neeto' ma'le ca 'neeta so noctoqui'? Ma' ñi qara'gaxala' ỹaatqajam ỹotauantac so'maxare.

Da lo'ueenaxanaxac so Zacarías

⁶⁷ Ca so leta'a Zacarías ỹaatqajam no'qaachigui queso Espíritu Santo. Ca ỹa'xat da la'qaatec ñi qota'a mashic qoỹaanem, 'neetasa':

⁶⁸ Ỹaatqajam qaỹo'uen ma'le ñi qara'gaxala' ñí'maq lashiilec na Israel laseripi, ma' ñi'maxare novitalo qomi' quiyim qarca'laxatec, ma' mashic qomi' lalamqateripi.

⁶⁹ Ñi'maxare ỹaanema qomi' só'maq ỹaatqajam 'ñaaxaic nca'laxaqui, chicqotougui nqai'en na llaalqaipi só'maq lelaatec David.

⁷⁰ Qam da'maxare dá'maq ỹachaxantapeguema qomi' co'na' qaỹa'xateta'guit quesá'ogue só'maq lca'acsec letaxaỹaxanqajanqaipi nallaaqo':

⁷¹ ma' ỹahotaque nca'laxaterec qomi' quena qanpa'guenaxauaripi chaqai quená'ogue na qomi' loquiiqate',

⁷² chaqai ỹaatqajam 'uo' da le'xorenataxanaxa queso 'auaxaic qareta'allipi, chaqai se coua'e dá'maq na'maqataxac mashic ỹaanema saua'maxare.

⁷³ Ca' 'eda dá'maq ỹachaxano' ñi qota'olec co'na' ỹaan so la'qaatec, ỹaanem so qareta'a Abraham:

⁷⁴ quiyim nca'laxaterec qomi' quená'maq qarpa'guentac, qaiyi sqaica ca qaro'chiitaque ma' so'ueenaxanqatalec ñi'maxare,

⁷⁵ chaqai qaiyi ỹa'maxarente' qomi' quiyim ñañaanqot ñi'maxare ma' qomi' co'teete' quenaua'que naua na'xata' queda qanachaalataxac.

⁷⁶ Qam qami' ỹaalcolec, qaỹamata'gue ma'le quiyim qami' letaxaỹaxanqajnec ñí'maq qota'olec ma' sqaica nqai 'nejem da lquesaxanaxa, ma' qaỹaqatqajanta'gue qami' ma'le ca llic ñi qara'gaxala' qaiyi ỹa'maqatañi ca llicyaxac,

⁷⁷ ma' 'qaataxañitem ná'maq lalamqateripi quiyim qaỹapalaxat na lasauaxaseteripi, qaiyi ỹacoñiguit da nca'laxa.

⁷⁸ Ma' chaqaida dá'maq le'xorenataxanaxa chaqai dá'maq lqouagaxa ñi qota'olec quiyim ỹa'uo' ca chicqo'ot nqai'en na piguim quiyim ỹaanema qomi' ỹahotaque quiyim coỹarelec ca dalaxaic na'xa'a,

⁷⁹ qaiyi coỹarelec cá'maq hueetaugui na napalaxa chaqai ca hueeto'ot ca la'al da nelauaxa, chaqai quiyim ỹachaxanalo qomi' ca llicyaxac ca neuagaxa.

⁸⁰ Ca' so noctoqui' noquiiquetashiguim da llaqtaxac chaqai da lquesaxanaxa da la'deenataxanaxac. Qam chaqai neetalec so 'laua sqaica qom, chi ỹovireto'o' ca na'xa'a co'na' nachaxana so Israel llaalqaipi.