Juan 19 - La'qaatqa ñi qota'olec Qota'olec & Qota'olec Novita Na Qomyipi

¹ Co'na'le, ca' so Pilato relaataxanlec so Jesús quiyim qaỹouaxan.

² Ca so nouaataxanyipi ỹañigui na lqahic aso lo'ueenata le qaipaxajta', chaqai qoỹañiguilo saua noho naue' letocqa'.

³ Ime, ca' qanqo'neu'a so'maxare, ca qohinac: —¡La', qami' na' qami' lashi na judioipi! Ca' qaỹouaxantapigui na lashic.

⁴ Ca' so Pilato lotqai liỹa inoxone'oga so qomyipi, ca 'naaco': —Ñaqa 'ajñii, nagui ñaueguec, qaiyi ỹaatqajam 'yiiñita quiyim aỹim qaica quet cá'maq sanata lasauaxaset.

⁵ Ca' nenoxonec so Jesús neetagui na lqahic aso no'ueenata le qaipaxajta' chaqai ỹansañi saua noho naueralec da letocqa'. Co'na'le, ca 'naaco' so Pilato: —¡'Eda da ỹale!

⁶ Ca co'na' qaiuane'ta so'maxare, ca na la'gaxalateripi na netaxaỹaxanqajanqaipi chaqai na nouaataxanyipi chaqa'ma' ỹaualqagui, 'naac: —¡Pachiñiro! ¡Pachiñiro! Ca' so Pilato 'naaco': —Viguiuec qamiri, ca' pachiñiho, ma' ỹim qaica quet cá'maq sanata lasauaxaset da'maxare.

⁷ Qam so judioipi 'naaco': —Qomi' 'ue da naqataxac qoỹaanema qomi' na'le, ca dá'maq qanaqataxac 'neetasa' quiyim qaỹalauat, ma' da'maxare 'naac quiyim llaalec ñi qota'olec.

⁸ Ca co'na' 'xaỹa dajo so Pilato, ca' paguec da lqolonaxa.

⁹ Ca lotqai liỹa inoxonougui ñi lauo', ca' inat so Jesús, 'naaco': —¿Negue' ca chicqoira'gue? Qam so Jesús i'maqata, qaica ca ỹa'xat.

¹⁰ Ca' so Pilato 'naaco' queso'maxare: —Ca' ¿qaica ca 'ñirac caỹim? ¿Sqa 'yiiñi'o' quiyim aỹim 'ue da iquesaxanaxa quiyim selaataxanlec quiyim qaipateno qami', chaqai seshit quiyim sosouec aqami'?

¹¹ Ca' so Jesús 'naaco': —Qami' qaica quet cá'maq rquesaxanaxa'e' quiyim sqai ỹaañiraxarom ñi qota'olec, quiyim shichi' 'ue ca 'ñiisa'gue aỹim. Qam cá'maq yayaano caqami', ca'maxare ỹaatqajam paguec ca lasauaxaset, sqai 'nejem qami'.

¹² Co'na'le, ca so Pilato idaantaque ca la'maqa' quiyim ỹosouec so Jesús. Qam so judioipi ỹaualqatagui, 'naaco' quen: —¡No'm 'xañirec da'maxare, ca se nauochaxaua'e' ñi lashi na nashillipi neeta'ñi yi Roma! ¡Ma' canchaqaica quiyim npa'xan quiyim nashi, ca npa'guenaxaua ñí'maq lashi na nashillipi!

¹³ Ca co'na' 'xaỹa dajo so Pilato, ca talaxanegue quiyim qaỹauegue'oguiyi so Jesús. Ca so'maxare nqa'xanñi quiyi hua'ñi quena' qaỹo'uet na nasauaxaseteripi. Yi'maxare leenaxat nqohin Gabata quena hebreo la'qaatqa, ca' dajo leloxoỹaxac nco'ỹaaqa' nodaachiguiñi qa'.

¹⁴ Qam 'oonoqui' na'xa'a saqa'leca ca ỹovire'oga so na'xa'a quena' qaỹo'leente na' qoyique'e yi Egipto. Ca mashic na'xa'a lavinñi na' so Pilato 'naapega so judioipi: —¡'Eda dá'maq rashii!

¹⁵ Qam so'maxare ỹaualqagui, 'naaco': —¡Lauachi'! ¡Lauachi'! ¡Pachiñiro! Ca' so Pilato 'naaco' queso qomyipi: —¿Negue' quet cá'maq 'neeta quiyim spateno ca rashii? Qam so la'gaxala' na netaxaỹaxanqajanqaipi 'naaco': —Qomi' qaica ca liỹa qarashi, qaiñiita ñi lashi na nashillipi na'ñi yi Roma.

¹⁶ Ca' quedajo, ca so Pilato ỹaanec queso qomyipi so Jesús quiyim qaipateno. Ca qaỹauec so'maxare.

Qaipateno so Jesús

¹⁷ Ca' qaỹauec so Jesús i'xateta nqohin so npatenaxala', quepegue' yi 'laua leenaxat nqohin nqahic lpi'nec loma'. Qam quena hebreo la'qaatqa qohinac Gólgota.

¹⁸ Ca' quiyi, ca qaipateno chaqai qaipatendo qai'neeta saua liỹa' dos. 'Óna so qaipa'xana'gue da loic, chaqai so liỹa, ca' da nemaq. Ca' so Jesús qaillaañigui na lavinñi.

¹⁹ Ca' so Pilato relaataxanlec quiyim qoỹanagui na pa'aashiguim queso npatenaxala' so Jesús so nerec 'naac: “Jesús, Nazaret le'ec, lashi na judioipi.”

²⁰ 'Xoico' na judioipi retaqateguelec so nerec, ma' yí'maq hua'ño' na' qaipateno so Jesús sqoỹoqaque quiyi na'a' lodegaxat Jerusalén. Ca' quesojo nerec qoỹeretañi quenaua la'qaatqa na hebreo laseripi, chaqai na griegoipi, chaqai na latinoipi.

²¹ Ca' vichiguiño' so la'gaxalateripi na netaxaỹaxanqajanqaipi quena judioipi 'naaco' queso Pilato: —Sqai 'chiriñi “Lashi na judioipi.” Ta'ta'a quiyim 'chiriñi “Ñi'maxare chaqaiñi ñí'maq 'naac lashi na judioipi.”

²² Qam so Pilato 'naaco' queso qomyipi: —Dá'maq shiriñi, ca' chaqaida 'neetari'.

²³ Ca' so qomyipi neetaho quena nouaataxanaq co'na' ime pateno so Jesús, ca' qaỹaconalo saua loho, ca qaneuagaxachiguilo quesaua cuatro ỹale', 'óna taalec quiñi 'óna. Chaqai qaicona qai'neeta aso lapooto. Qam so'maxare qaica ca neuaarec, ma' ima'ta'.

²⁴ Ca' saua ỹale' neesaho quena nouaataxanaq 'neraco': —Se sasectaqataqac. Ta'ta'a quiyim ñallitaxagui, qaiyi ỹaataq cá'maq taalec. Ca' quiyi, ca ỹaatqajam ipaquichigui dá'maq naneretañi la'qaatec ñi qota'a: “Neuagaxachiguilo saua aỹoho, qanallichiguilo, qaiyi ỹaataq cá'maq taalec.” Ca' chaqaida dá'maq 'ne'tegue na'le so ỹalliripi.

²⁵ Yí'maq neeta'ñi so npatenaxala' so Jesús, ca hueete'e aso late'e, chaqai aso lqaỹa aso late'e, chaqai aso María, loua so Cleofas, chaqai aso María, Magdala lase.

²⁶ Ca co'na' so Jesús iuane'ta aso late'e nachaatetañi, huaqate'e' só'maq paguec lqo'itaxat lapaxaguinatec, ca 'naaco' na'le caso late'e: —Qami' 'aalo, hueete'ena ná'maq qachaalqui'.

²⁷ Ime, ca lotqai 'naapego' só'maq lapaxaguinatec: —'Ada hueete'ena dá'maq qachii'i'. Ca co'na'le, ca chaqaiso so na'xa'a, ca só'maq lapaxaguinatec ỹauegueu'a yi la'a' aso'maxare.

Da 'neeto' na'le da lelauaxa so Jesús

²⁸ Ca co'na' ime dajo, ma' so Jesús ỹa'den quiyim dá'ogue dajo ipaquichigui, chaqai quiyim ipaquichiguilo yaua naneresañi na'qaatqa, ca 'naaco': —Yalauat na ỹaquip.

²⁹ Qam 'uo' so 'taxaqui no'qaachigui quena lataxa lochiviaxaic. Ca' qailet aso 'ec huol, ca qoỹanagui lo'lo aso nanecse leenaxat hisopo. Ca' qoỹaanshi'ma, qaiyi nqo'goq.

³⁰ Ca' so Jesús ni'chigui so lataxa lochiviaxaic. Ime, ca 'naaco': —Ca nagui ná'ogue imigui. Co'na'le, ca nanaqañi na lqahic, ca' ileu.

So neetaho nouaataxanaq ỹa'deho na lahi so Jesús caso laqui

³¹ So lpa'axaua na'xa'a vigui quena' qaỹo'leente so na'xa'a quena' qoyique'e yi Egipto, ca' so judioipi se ỹa'maxaren quiyim saua qomi' neesagui saua npatenaxalate' queso na'xa'a co'mataxaqui. Ma' sojo na'xa'a co'mataxaqui ỹaatqajam qaỹoden. Ca vichiguiño' qaỹashiila so Pilato quiyim relaataxanlgoto quiyim qaỹaqaguite' naua lichil sauá'maq npatensaho, chaqai qanaqachiñi quesauá'maq npatenaxalate'.

³² Ca' saua neesaho quena nouaataxanaq ỹaqaguite' naua lichil saua npatenaxaua' so Jesús.

³³ Qam co'na' qanqo'neu'a so Jesús, ca qaỹa'den quiyim mashic ileu, ca' sqai qaỹaqaguite' naua lichil.

³⁴ Qam 'ue so ỹale neetaho quena nouaataxanaq ỹa'deho na lahi caso laqui, ca' ncopaata ca nenoxonec na leuo' chaqai na huaxaỹaq.

³⁵ Só'maq ỹa'xatetac dajo, so'maxare ỹaatqajam iuanchigui dajo, ca dá'maq ỹa'xat ỹaatqajam lliqueta. Ma' so'maxare ỹa'den quiyim ỹaatqajam llic da la'qaatec, qaiyi qamiri qai'neeta viilec.

³⁶ Ma' dajo 'ue qaỹovirau'a, qaiyi ipaquichigui da 'nerac naua naneresañi la'qaatqa ñi qota'a, ma' 'nerac: “Qaica ca qaỹaqaguit quena lpi'nec.”

³⁷ Chaqai da liỹa naneretañi na'qaatec 'neetasa': “Qaiuanchigui ma'le quená'maq ỹa'dac so'maxare.”

So Jesús qaishinñi

³⁸ Ca co'na' ime dajo, ca' so José na'ñi yi Arimatea, so'maxare ỹashiila so Pilato quiyim ỹodouec so loshicmaxa so Jesús. So José queeta'pegue' so Jesús, qam se nichoxot, ma' no'cha'a na judioipi. Ca' so Pilato ỹaanem so'maxare so rashiilaxanta'pegue. Ca' so José eec, ca' ỹodouec so loshicmaxa so Jesús.

³⁹ Chaqai so Nicodemo só'maq 'uo' so pe quepegue' so Jesús quiyim ỹahotaque retaxaỹa'pegue', so'maxare nodootaho so treinta kilos quena ỹaleque'ejta' na qo'paq louaq leenaxat mirra chaqai áloes.

⁴⁰ Ca' so José chaqai so Nicodemo ỹodoorec so loshicmaxa so Jesús. Ca lepajtegue queso lepataxaqui. Ca' qaỹocorelec queso qaỹalequenta' qo'paq louaq lo'daxaraic lahita, ma' da'maxare chi no'ueenataxac na judioipi quena' ỹovita qaishinñi na lasauaxanqaipi.

⁴¹ Ca quiyí'maq hua'ño' na' qaipateno so Jesús 'uo' so nanecse loma', ca' quesojo nanecse loma' 'uo' aso napal lahi' dalaxai saqa'leca ca qailla'ñigui.

⁴² Ma' sqoỹoqaque asojo napal lahi', ca' chaqaso' aso qailla'ñigui so Jesús, ma' mashic ipalata'a so laloqo' so na'xa'a nco'mataxaqui na judioipi.